កីឡា

ទីតាំងហ្វឹកហាត់ម៉ូតូទឹករបស់ សាលី អ៊ូមើត ដែលសាងសង់លើដីរាប់ហិចតាដំណើរការដល់ណាហើយ…

បានផុស

១១ ខែ មុន

នៅ

ថ្ងៃពុធ ៦ សីហា ២០២៥

ដោយ

ជើងខ្លាំងផ្នែកកីឡាម៉ូតូទឹក (Jetski) កីឡាករ សាលី អ៊ូមើត សាងសង់ទីលានសម្រាប់ហ្វឹកហាត់កីឡាមួយនេះលើទំហំដី ១១ ហិចតា នៅឯស្រុកស្នូល ខេត្តក្រចេះ រហូតមកដល់ពេលនេះបានប្រមាណ ៨០% និងអាចដំណើរការហ្វឹកហាត់នៅឆ្នាំក្រោយបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ សាលី អ៊ូមើត និងសម្ដេច តេជោ

សាលី អ៊ូមើត បានឲ្យដឹងថា ការហ្វឹកហាត់ប្រភេទកីឡាម៉ូតូទឹកនេះនៅឯក្រៅប្រទេសត្រូវចំណាយច្រើនលើការស្នាក់នៅហូបចុក និងធ្វើដំណើរជាដើម។ ប៉ុន្តែបើមានទីលានហ្វឹកហាត់នៅក្នុងស្រុកគឺល្អ និងជួយកាត់បន្ថយបានច្រើនចំពោះកីឡាករដែលចង់ហ្វឹកហាត់។

កីឡាករ សាលី អ៊ូមើត

ម្ចាស់មេដាយមាសអន្តរជាតិជាច្រើនគ្រឿងរូបនេះបន្ថែមទៀតថា ទីលានដែលកំពុងសាងសងនេះមិនមែនសម្រាប់រូបខ្លួននោះទេគឺសម្រាប់ប្រទេសកម្ពុជា និងសម្រាប់យុវជនជំនាន់ក្រោយដែលមានបំណងចង់ហ្វឹកហាត់ ឬចង់ក្លាយជាកីឡាករម៉ូតូទឺកអាជីពអាចមកហ្វឹកហាត់នៅទីនោះបាន។ ទីលានដែលកំពុងជីកធ្វើជាបឹងនេះមានទំហំ ១១ហិចតា និងអាចចូលហ្វឹកហាត់បាននៅឆ្នាំក្រោយនេះហើយសម្រាប់ត្រៀមការប្រកួតផ្សេងៗ។

ទីតាំងកំពុងសាងសង់

បញ្ជាក់ដែរថា ទីតាំងហ្វឹកហាត់ដែលកីឡាករ សាលី អ៊ូមើត កំពុងសាងសង់នេះគឺនៅភូមិគ្រញ៉ូងសែនជ័យ ឃុំគ្រញ៉ូងសែនជ័យ ស្រុកស្នូល ខេត្តក្រចេះ។ ទីតាំងហ្វឹកហាត់នេះមានទំហំដីរហូតដល់ ១១ហិចតាឯណោះដែលវានឹងក្លាយជាទីលានបណ្ដុះធនធានកីឡាម៉ូតូទឹកដ៏សំខាន់នៅពេលខាងមុខ។ សាលី អ៊ូមើត ជាវីរះកីឡាករដែលមានស្នាដៃរបស់ប្រទេសកម្ពុជា រូបគេធ្លាប់ឈ្នះមេដាយមាស ពានរង្វាន់ គ្រប់កម្រិតលើពិភពលោកជូនជាតិមាតុភូមិ។ រូបគេជាធនធានថ្នាក់ដឹកនាំ ជាគ្រូ ជាកីឡាករ ដ៏សំខាន់ផងក្នុងការពង្រីកផ្សព្វផ្សាយកីឡាមួយនេះ៕

អត្ថបទដោយ៖ នួន ស៊ីណា