លោក Jose ចំណេញលុយ​ជាង ១០០ លាន​ដុល្លារ​ ក្រោយត្រូវក្លិប​បញ្ចប់​កុងត្រា ៧ លើក

គ្រូបង្វឹកសញ្ជាតិ ព័រទុយហ្គាល់ លោក Jose Mourinho ទទួលបានលុយសំណងរហូតដល់​ជាង ១០០​លានដុល្លារអាមេរិក បន្ទាប់ពីលោកត្រូវបានក្លិប​បណ្តេញចេញពីតំណែងចំនួន ៧ លើក។

លោក Jose Mourinho ត្រូវបានគេចាត់ទុក ជាគ្រូបង្វឹកដ៏ឆ្នើមម្នាក់ក្នុងពិភពលោក ប៉ុន្តែនៅក្នុងអាជីពរបស់លោក​មានប្រវត្តិត្រូវបានក្លិប​បញ្ចប់​កុងត្រា​​មុន​ថ្ងៃ​កំណត់​ច្រើនលើកផងដែរ ពោលរហូតដល់ទៅ ៧ លើកឯណោះ។

លោក Jose Mourinho ធ្លាប់ដឹកនាំក្លិបសរុបចំនួន ១១ ក្លិប ក្នុងនោះមានក្លិប ៥ ដែលលោកបានដឹកនាំរហូតដល់បញ្ចប់កិច្ចសន្យា។ ចំណែកក្លិប ៦ ទៀត សុទ្ធតែបានបញ្ចប់តំណែងលោកមុនពេលកំណត់ ខណៈក្លិប Fernebahce នៃលីគកំពូលតួកគី គឺជាក្លិបចុងក្រោយគេបង្អស់ ដែលទើបបញ្ចប់តំណែងលោកនាពេលថ្មីៗនេះ។

យោងតាមរបាយការណ៍ពីសារព័ត៌មាន The Sun បានបង្ហាញថា លោក Jose Mourinho បានទទួលលុយសំណងរហូតដល់ទៅ ១៣៤ លានដុល្លារអាមេរិក បន្ទាប់ពីត្រូវបានក្លិប ៦ បណ្តេញលោកចេញពីតំណែងសរុបចំនួន ៧ លើក។

ខាងក្រោមនេះ ជាទិន្នន័យសំណងរបស់ក្លិបនីមួយៗ ក្រោយពេលបណ្តេញលោក Jose Mourinho ចេញពីតំណែង៖

• ឆ្នាំ ២០០៧ ក្លិប Chelsea បានផ្តល់សំណងចំនួន ២៤.៣៤ លានដុល្លារអាមេរិក
• ឆ្នាំ ២០១៣ ក្លិប Real Madrid បានផ្តល់សំណងចំនួន ២២.៩៩ លានដុល្លារអាមេរិក
• ឆ្នាំ ២០១៥ ក្លិប Chelsea បានផ្តល់សំណងចំនួន ១៦.៩០ លានដុល្លារអាមេរិក
• ឆ្នាំ ២០១៨ ក្លិប Manchester United បានផ្តល់សំណងចំនួន ២៦.៥១ លានដុល្លារអាមេរិក
• ឆ្នាំ ២០២១ ក្លិប Tottenham Hotspur បានផ្តល់សំណងចំនួន ២១.៦៤ លានដុល្លារអាមេរិក
• ឆ្នាំ ២០២៤ ក្លិប AS Roma បានផ្តល់សំណងចំនួន ៤.០៥ លានដុល្លារអាមេរិក
• ឆ្នាំ ២០២៥ ក្លិប Fernebahce បានផ្តល់សំណងចំនួន ១៧.៥៨ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ The Sun