ក្រុមអាស៊ីទាំង ៦ មានតែ ១ ក្រុមគត់ នឹងឡើងវគ្គ ១៦ ក្រុម ជើងឯក​បាល់ទះពិភព​លោក

ការប្រកួតវគ្គសន្សំពិន្ទុក្នុងពូល នៃពានរង្វាន់បាល់ទះជើងឯកពិភពលោក FIVB Men’s Volleyball World Championship ២០២៥ នៅសល់ត្រឹមតែ ១ ប្រកួតទៀតប៉ុណ្ណោះ នឹងរកឃើញក្រុមខ្លាំងឡើងទៅកាន់វគ្គ ១៦ ក្រុម ខណៈក្រុមមកពីតំបន់ អាស៊ី វិញ មានតែ ១ ក្រុមប៉ុណ្ណោះ ដែលមានឱកាសនឹងឡើងទៅវគ្គបន្ត។

ក្រុមបាល់ទះក្នុងទ្វីប អាស៊ី ដែលទទួលបានកៅអីចូលលេងពានរង្វាន់បាល់ទះពិភពលោក គឺមានសរុបចំនួន ៦ ក្រុម។ គិតត្រឹមពេលនេះ មានតែក្រុមបាល់ទះជម្រើសជាតិ អ៉ីរ៉ង់ និង ហ្វីលីពីន ប៉ុណ្ណោះ ដែលអាចឡើងទៅវគ្គ ១៦ ក្រុមចុងក្រោយ ប៉ុន្តែ​នឹងមាន ១ ក្រុមត្រូវធ្លាក់ចេញ ដោយសារពួកគេស្ថិតក្នុងពូល A ជាមួយគ្នា។ ការប្រកួតចុងក្រោយ ពួកគេត្រូវជួបគ្នា ដូច្នេះបើក្រុមណាឈ្នះនឹងត្រូវឡើងទៅវគ្គបន្ត ហើយបើក្រុម​ណាចាញ់​គឺធ្លាក់វិញ។

ចំណែកក្រុម អាស៊ី ផ្សេងៗទៀត រួមមាន កាតា (ស្ថិតនៅពូល B), កូរ៉េខាងត្បូង (ស្ថិតនៅពូល C), ជប៉ុន (ស្ថិតនៅពូល G) និង ចិន (ស្ថិតនៅពូល H) សុទ្ធតែបានធ្លាក់ចេញពីពានរង្វាន់ជើងឯកបាល់ទះជើងឯកពិភពលោកហើយ ទោះ​នៅ​សល់ ១ ប្រកួតទៀតក៏ដោយ។

តាមរយៈលទ្ធផលប្រកួត ២ ប្រកួតក្នុងពូលកន្លងមក កាតា ឆ្លងកាត់ ២ ប្រកួតចាញ់ទាំង ២ ប្រកួត ស្ថិតនៅលេខ ៣ ក្នុងពូល B។ កូរ៉េខាងត្បូង ឆ្លងកាត់ ២ ប្រកួត ចាញ់ទាំង ២ ប្រកួត ស្ថិតនៅលេខ ៤ ក្នុងពូល C។ ជប៉ុន ឆ្លងកាត់ ២ ប្រកួត ចាញ់ទាំង ២ ប្រកួត ស្ថិតនៅលេខ ៤ ក្នុងពូល G។ រីឯ ចិន ឆ្លងកាត់ ២ ប្រកួត ចាញ់ទាំង ២ ប្រកួត ស្ថិតនៅលេខ ៤ ក្នុងពូល H។

អត្ថបទ៖ សេម កុសល