ចរាចរណ៍

ចេញពីធ្វើម្ហូបឲ្យអ្នកជំងឺកូវីដ ត្រូវរថយន្ដបុកស្លាប់នៅច្បារអំពៅ

បានផុស

៤ years មុន

នៅ

ថ្ងៃអាទិត្យ ១៦ ឧសភា ២០២១

ដោយ

បុរសម្នាក់មានមុខរបរជាចុងភៅ បានជួបគ្រោះថ្នាក់ចរាចរណ៍រហូតដល់ស្លាប់ ខណៈពេលដែលជនរងគ្រោះត្រឡប់ពីធ្វើម្ហូបជូនដល់អ្នកជំងឺដែលកំពុងសម្រាកនៅមន្ទីរពេទ្យ។

ហេតុការណ៍គ្រោះថ្នាក់នេះ បានកើតឡើងនៅវេលាម៉ោង១៩និង៣០នាទីយប់ ថ្ងៃទី១៥ ខែឧសភាស្ថិតនៅតាមបណ្តោយផ្លូវជាតិលេខ១ ភូមិបឹងឈូកសង្កាត់និរោធ ខណ្ឌច្បារអំពៅ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅទទួលបន្ទុកសណ្តាប់ធ្នាប់ចរាចរណ៍បានឲ្យដឹងថា នៅម៉ោងកើតហេតុមានរថយន្តសណ្តោងស៊ីទែនហ្គាស (L P G)ពណ៌ខៀវពាក់ស្លាកលេខភ្នំពេញ៤A ២៩៣៣ បានធ្វើដំណើរតាមបណ្តោយផ្លូវជាតិលេខ១ ក្នុងទិសដៅពីលិចទៅកើត។ លុះទៅដល់ចុងខាងកើតវត្តនិរោធស្ថិតនៅក្នុងភូមិបឹងឈូកក៏ទៅបុកម៉ូតូមួយគ្រឿងម៉ាកវ៉េវ ពណ៌ខ្មៅ ពាក់ស្លាកលេខកណ្តាល១S ១៨ ៤៨ បើកបរដោយឈ្មោះយៀត ជាវហង្ស ភេទប្រុសអាយុ៥៥ឆ្នាំ មុខរបរចុងភៅ ស្នាក់នៅភូមិវាលស្បូវ សង្កាត់វាលស្បូវ ខណ្ឌច្បារអំពៅ បណ្តាលឲ្យស្លាប់នៅនឹងកន្លែង។ ដោយឡែកអ្នកបើកបររថយន្តបង្កត្រូវបានសមត្ថកិច្ចតាមចាប់បាន ឈ្មោះ ឡាំ ពិសី ត្រូវបានបញ្ជូនទៅការិយាល័យនគរបាលចរាចរណ៍ផ្លូវគោកទាំងយប់។

តាមភរិយាសពបាននិយាយថា ប្តីរបស់គាត់ទើបត្រឡប់មកពីធ្វើម្ហូបឲ្យអ្នកជំងឺដែលកំពុងសម្រាកព្យាបាលនៅខណ្ឌសែនសុខ។ លុះត្រឡប់មកដល់ចំណុចកើតហេតុមិនទាន់ដល់ផ្ទះផងក៏ជួបគ្រោះថ្នាក់ដល់បាត់បង់ជីវិតតែម្តង៕

អត្ថបទ ៖ នរា