នយោបាយ

នាយករដ្ឋមន្ត្រី៖ ពេលនេះជាពេលដែលប្រទេសជាតិយើងទាំងមូលត្រូវរួមគ្នាដើម្បីត្រៀមលក្ខណៈការពារជាតិ ទឹកដី របស់យើង

បានផុស

១១ ខែ មុន

នៅ

ថ្ងៃចន្ទ ២ មិថុនា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានអំពាវនាវដល់អ្នកមាននិន្នាការនយោបាយសូមទុករឿងនយោបាយនិយាយពេលផ្សេង និងរួមគ្នាជាធ្លុងមួយលើកទឹកចិត្ត ឈរពីក្រោយកងទ័ពកម្ពុជាដើម្បីការពារទឹកដីកម្ពុជា។

ថ្លែងក្នុងពេលបើកសមាជរដ្ឋសភា ព្រឹទ្ធសភា ព្រឹកថ្ងៃទី២ ខែមិថុនា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានបញ្ជាក់ថារដ្ឋាភិបាលមានស្បៀងគ្រប់គ្រាន់ក្នុងការផ្គត់ផ្គង់ដល់ទាហានតែយ៉ាងណាក្ដីការចូលរួមពីពលរដ្ឋដែលបានឧបត្ថម្ភដល់កងទ័ពកន្លងមកនេះបានផ្ដល់នូវកម្លាំងចិត្តយ៉ាងខ្លាំងដល់ទាហានដែលបង្ហាញពីការគាំទ្រគ្នាទៅវិញទៅមករវាងជួរមុខនិងជួរក្រោយ។

សម្ដេចបន្ថែមថាពេលនេះមិនមែនជាពេលដើម្បីយកធ្វើជាហេតុផលដើម្បីចំណេញនយោបាយនោះទេ។

សម្ដេចធិបតី៖ «បើទោះជាមាននិន្នាការណាក៏ដោយសុំកុំធ្វើសកម្មភាពណាដែលប៉ះពាល់ដល់ទឹកចិត្តកម្ពុជារបស់យើង។ ពេលនេះជាពេលដែលប្រទេសជាតិរបស់យើងទាំងមូលត្រូវរួមគ្នាដើម្បីត្រៀមលក្ខណៈការពារជាតិ ទឹកដីរបស់យើងជាពិសេសរួមគ្នានៅក្រោយកងទ័ពរបស់យើងដើម្បីការពារទឹកដី»។

បើតាមសម្ដេចធិបតីក្រោយផ្ទុះព្រឹត្តិការណ៍ប៉ះទង្គិចគ្នាកាលពីព្រឹកថ្ងៃទី២៨ ខែឧសភា ស្ថានភាពព្រំដែនកម្ពុជាថៃកន្លែងផ្សេងទៀតក៏ចាប់ផ្ដើមកើនឡើងកម្ដៅផងដែរ ខណៈដើម្បីដោះស្រាយបញ្ហានេះសម្ដេចថាកម្ពុជានឹងប្ដឹងទៅតុលាការអន្តរជាតិដើម្បីដោះស្រាយនូវបញ្ហានេះ និងបញ្ជៀសការប្រឈមមុខគ្នាជាថ្មីផងដែរ។

សម្ដេចធិបតីបញ្ជាក់ថាកម្ពុជាមិនចង់បានទឹកដីរបស់គេមួយមីលីម៉ែត្រណានោះទេ តែបើគេបំពានកម្ពុជាត្រៀមខ្លួនរួចជាស្រេចក្នុងការឆ្លើយតប៕