អ្នកទោសជាង២០០ នាក់រត់គេចពីគុកនៅប៉ាគីស្ថាន ចំពេលមានរញ្ជួយដី

អ្នកទោសជាង ២០០នាក់បានរត់គេចពីគុកនៅទីក្រុង Karachi ប្រទេសប៉ាគីស្ថានកាលពីល្ងាចថ្ងៃទី០២ ខែមិថុនា ក្នុងអំឡុងពេលមានរញ្ជួយដីបានបង្កឱ្យមានការភ័យស្លន់ស្លោក្នុងចំណោមអ្នកទោស និងបុគ្គលិក​ពន្ធ​នាគារ​។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី០៣ខែមិថុនានេះ។

យោងតាមរដ្ឋមន្ត្រីច្បាប់ ភាពចលាចលបានផ្ទុះឡើង នៅពេលដែលអ្នកទោសប្រហែល១០០០នាក់ បានប្រមូលផ្តុំគ្នានៅទីវាលអំឡុងពេលរញ្ជួយដី ដែលបង្កការលំបាកដល់ឆ្មាំគុកក្នុងការថែរក្សាសណ្តាប់ធ្នាប់។ អ្នកទោសខ្លះត្រូវបានគេរាយការណ៍ថា បានប្រើកម្លាំងឆក់យកអាវុធ​ពី​ឆ្មាំគុក​ ហើយបានទម្លុះទ្វារធំ បណ្តាលឱ្យមានការបាញ់ប្រហារមួយ បណ្តាលឲ្យអ្នកទោសម្នាក់ស្លាប់ និងបុគ្គលិកពន្ធនាគារចំនួន ៣នាក់រងរបួស។

មក​ដល់​ថ្ងៃ​អង្គារ អ្នក​រត់​គេច​ខ្លួន​ប្រហែល ៨០​នាក់ ត្រូវ​បាន​ចាប់​ខ្លួន​ឡើង​វិញ។ អ្នករត់គេចខ្លួនជាច្រើននាក់ត្រូវបានគេនិយាយថាជាឧក្រិដ្ឋជនតូចតាច ប៉ុន្តែក្រុមមន្ត្រីបានព្រមានថាការរត់គេចពីមន្ទីរឃុំឃាំងអាចនាំឱ្យមានការចោទប្រកាន់ពាក់ព័ន្ធនឹងអំពើភេរវកម្មកាន់តែធ្ងន់ធ្ងរ។

ប៉ូលិស និងកងកម្លាំងប្រដាប់អាវុធរបស់ទីក្រុង Karachi កំពុងបន្តការតាមប្រមាញ់ ខណៈដែលឧបទ្ទវហេតុបង្កការព្រួយបារម្ភយ៉ាងខ្លាំងអំពីសន្តិសុខពន្ធនាគារ និងការឆ្លើយតបគ្រាអាសន្ននៅក្នុងប្រទេស៕

អត្ថបទ៖​ ប៊ុន សុភាព