ព័ត៌មានអន្ដរជាតិ

EU ត្រៀមវិធានការវាយបក បើការចរចាពន្ធជាមួយ ត្រាំ មិនសម្រេច

បានផុស

១ year មុន

នៅ

ថ្ងៃអង្គារ ៣ មិថុនា ២០២៥

ដោយ

សហភាពអឺរ៉ុប (EU) កាលពីថ្ងៃចន្ទ បានឱ្យដឹងថា ខ្លួនកំពុងត្រៀមលើ «វិធានការវាយបក» ប្រសិនបើការចរចាពន្ធជាមួយសហរដ្ឋអាមេរិកត្រូវបរាជ័យ បន្ទាប់ពីប្រធានាធិបតីអាមេរិក លោក ដូណាល់ ត្រាំ ប្រកាសដំឡើងពន្ធលើដែនថែប និងអាលុយមីញ៉ូមនាំចូល ៥០ ភាគរយ ដែលធ្វើឱ្យការចរចាទ្វេភាគីកាន់តែពិបាក។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគណៈកម្មការសហភាពអឺរ៉ុបលោកស្រី Ursula von der Leyen និងលោក ត្រាំ បានព្រមព្រៀងគ្នាកាលពីសប្តាហ៍មុន លើការពន្លឿនកិច្ចចរចាឆ្ពោះទៅរកកិច្ចព្រមព្រៀងពាណិជ្ជកម្មមួយ ក្រោយ ត្រាំ គំរាមដំឡើងពន្ធដល់ ៥០ ភាគរយ ដោយថា ប្លុកនេះពិបាកចរចាគ្នា។

យ៉ាងណាមិញ អ្នកនាំពាក្យគណៈកម្មការអឺរ៉ុបលោក Olof Gill បាននិយាយនៅថ្ងៃចន្ទថា ប្រសិនបើកិច្ចពិភាក្សាទាំងនោះបរាជ័យ «យើងក៏បានត្រៀមខ្លួនដើម្បីពន្លឿនការងាររបស់យើងលើផ្នែកការពារផងដែរ»។ លោកបន្តយ៉ាងដូច្នេះថា៖ «ក្នុងករណីដែលការចរចារបស់យើងមិននាំទៅរកលទ្ធផលមានតុល្យភាព សហភាពអឺរ៉ុបបានត្រៀមរួចរាល់ ដើម្បីដាក់វិធានការតបត រួមទាំងការឆ្លើយតបទៅនឹងការដំឡើងពន្ធចុងក្រោយនេះ»។

លោកបាននិយាយថា EU កំពុងធ្វើការលើបញ្ជីវិធានការវាយបក ដែលច្រើនជាងមុន ដោយនឹងចាប់ផ្តើមអនុវត្តដោយស្វ័យប្រវត្តិនៅថ្ងៃទី ១៤ ខែកក្កដា ឬឆាប់ជាងនេះ។

គួរគូសបញ្ជាក់ថា ពន្ធគយបដិការរបស់អាមេរិកលើ EU ត្រូវផ្អាកដូចប្រទេសដទៃទៀតដែរ រយៈពេល ៩០ ថ្ងៃ រហូតដល់ថ្ងៃទី ៩ កក្កដា ដើម្បីទុកពេលចរចាគ្នា។ យ៉ាងណាមិញ វឌ្ឍភាពជាដុំកំភួនរវាងភាគីទាំង២ មិនទាន់លេចចេញជារូបរាងនៅឡើយទេ៕