ចរាចរណ៍

រថយន្តបុកគោយន្តពីក្រោយស្លាប់៤នាក់ និងរបួសធ្ងន់ម្នាក់

បានផុស

៥ years មុន

នៅ

ថ្ងៃពុធ ១ ធ្នូ ២០២១

ដោយ

យ៉ាងហោចណាស់មនុស្ស៤នាក់បានស្លាប់ភ្លាមៗ និងម្នាក់របួសធ្ងន់ នៅក្នុងករណីគ្រោះថ្នាក់ចរាចរណ៍លើកំណាត់ផ្លូវជាតិលេខ៧៨ ស្ទឹងត្រែង-រតនគិរី រវាងរថយន្តហ៊ីយ៉ាន់ដាយបុកពីក្រោយគោយន្ត។

គ្រោះថ្នាក់ចរាចរណ៍នេះបានកើតឡើងនៅលើកំណាត់ផ្លូវជាតិលេខ៧៨ស្ទឹងត្រែង-រតនគីរី នៅចំណុចចន្លោះគីឡូម៉ែត្រលេខ០៤៣ ០៤៤ ព្រំប្រទល់ស្ទឹងត្រែង-មណ្ឌលគិរី កាលពីវេលាម៉ោង២១និង០០នាទី ថ្ងៃទី៣០ ខែវិចិ្ឆកា ឆ្នាំ២០២១ ស្ថិតក្នុងភូមិសាស្ត្រភូមិរវាក់ ឃុំរយ៉ ស្រុកកោះញែក ខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចចរាចរណ៍បានបញ្ជាក់ថា គ្រោះថ្នាក់ចរាចរណ៍រវាងរថយន្តម៉ាកហ៊ីយ៉ាន់ដាយពណ៌ស ពាក់ស្លាកភ្នំពេញលេខ២B N ៧២១៤ បានបើកបុកពីក្រោយគោយន្តកន្ត្រៃក្នុងទិសដៅស្របទិសគ្នា។

លោកបន្តថា គ្រោះថ្នាក់នេះបណ្តាលឱ្យអ្នកបើកបររថយន្តឈ្មោះ សាន វ៉ាន់ឌី រងរបួសធ្ងន់បញ្ជូនទៅព្យាបាលនៅមន្ទីរពេទ្យខេត្តស្ទឹងត្រែង និងបណ្តាលអោយស្លាប់អ្នករួមដំណើរចំនួន០២នាក់ទី១-ឈ្មោះ ជឹម សុភារ៉េត ភេទប្រុសអាយុ១៥ឆ្នាំ មុខរបរសិស្ស។ ទី២-ឈ្មោះ ស៊ីម ស្រីឌឿន ភេទស្រី អាយុ២០ឆ្នាំ មុខរបរបុគ្គលិកក្រុមហ៊ុនបម្រើការងារក្រុមហ៊ុនកាពីតូល។ អ្នកទាំងពីររស់នៅភូមិត្បូងឃ្មុំ ឃុំតាងក្រាង ស្រុកបាធាយ ខេត្តកំពង់ចាម។ ចំណែកអ្នកបើកគោយន្តកន្ត្រៃនិងអ្នករួមដំណើរបានស្លាប់ទាំងពីរនាក់ផងដែរ ទី១-ឈ្មោះ ឡាយ សុខវ៉ាត ភេទប្រុសអាយុ២៥ឆ្នាំ ជនជាតិខ្មែរ មុខរបរកសិករ រស់នៅភូមិឈូក ឃុំតាប្រុក ស្រុកចំការលើ ខេត្តកំពង់ចាម ជាអ្នកបើកបរគោយន្ត។ ទី២-ឈ្មោះ ឡាយ លាភ ភេទប្រុស អាយុ១៧ឆ្នាំជនជាតិខ្មែរ មុខរបរកសិករ ត្រូវជាប្អូនប្រុសបង្កើតនិងគ្នា។

អ្នកឃើញហេតុការណ៍បានបញ្ជាក់ថា មូលហេតុមកពីគោយន្តកន្ត្រៃមិនបានដាក់ចំណាំងផ្លាតបំភ្លឺខាងក្រោយទើបបង្កឱ្យរថយន្តបើកបរមើលមិនឃើញក៏បុកបង្កឱ្យកើតមានគ្រោះថ្នាក់កើតឡើង។

ក្រោយកើតហេតុត្រូវបានប៉ូលីសចរាចរណ៍ចុះមកធ្វើការវាស់វែងបញ្ជូនរថយន្តនិងគោយន្តទៅកាន់ការិយាល័យចរាចរណ៍ផ្លូវគោកខេត្តមណ្ឌលគិរី ដើម្បីដោះស្រាយទៅតាមផ្លូវច្បាប់។ ចំណែកសពជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ ងិនលីម