ជិះម៉ូតូបុកបង្កាន់ដៃស្ពានធ្លាក់ទឹកស្លាប់ពលរដ្ឋរក២ម៉ោងទើបឃើញសព

យោងតាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅ ទទួលបន្ទុកសណ្តាប់ធ្នាប់ ចរាចរណ៍បានឲ្យដឹងថា កាលពីវេលាម៉ោង២០និង៣០នាទីយប់ ថ្ងៃទី២២ ខែមិថុនា នេះ មានករណីគ្រោះថ្នាក់ចរាចរណ៍មួយកើតឡើងបណ្តាលឲ្យយុវជនម្នាក់ស្លាប់។

លោកអធិការរងបានបន្តថា នៅម៉ោងកើតហេតុជនរងគ្រោះឈ្មោះ ផល សុផាន់ណារិទ្ធ ភេទប្រុស អាយុ២៥ឆ្នាំ មុខរបរកម្មករស្នាក់នៅផ្ទះលេខ៥៣១ ភូមិតារាបដូនសរ ឃុំគគីរ ស្រុកកៀនស្វាយ ខេត្តកណ្តាល បានបើកបរម៉ូតូសេ​១២៥​សេរី២០២១ ពណ៌ខ្មៅ ពាក់ស្លាកលេខ កណ្តាល១AL១៦ ៦៣ បានបើកបរក្នុងទិសដៅពីលិចទៅកើត។ លុះមកដល់ស្ពានអ្នកតាវាំង ដែលស្ថិតនៅផ្លូវ១១០ ភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បានបុកនឹងបង្កាន់ដៃស្ពានធ្លាក់ចូលក្នុងទឹកបណ្តាលឲ្យស្លាប់។ ហើយភ្លាមៗនោះ ក៏មានបងប្អូនប្រជាពលរដ្ឋលោកចុះទៅជួយស្រង់ប៉ុន្តែចំណាយពេលជិត២ម៉ោងទើបរកឃើញ។

តាមមិត្តភ័ក្ដិជនរងគ្រោះបានអះអាងថា ជនរងគ្រោះទើបចេញពីផឹកជួបជុំគ្នាមុនពេលជួបគ្រោះថ្នាក់រហូតដល់ស្លាប់៕

អត្ថបទ៖ នរា