កម្មកររោងចក្រ ២៧ នាក់​រងរបួសធ្ងន់​ស្រាល​ក្នុងហេតុការណ៍ក្រឡាប់រថយន្ត​នៅកំពង់ស្ពឺ

រថយន្តកូរ៉េចំណុះ ២,៥ តោនមួយគ្រឿងដឹកកម្មករកម្មការិនីរោងចក្រ ៥០ នាក់ បានក្រឡាប់នៅត្រង់ចំណុចផ្លូវកោង បណ្ដាលឱ្យកម្មករ ២៧ នាក់ រងរបួសធ្ងន់ស្រាល នៅវេលាម៉ោង ៦៖១៥ នាទី ព្រឹកថ្ងៃទី ២៥ ខែមិថុនា ស្ថិតនៅចំណុចភូមិពពូល ឃុំជំពូរព្រឹក្ស ស្រុកឧដុង្គ ខេត្តកំពង់ស្ពឺ។

អភិបាលខេត្តកំពង់ស្ពឺ លោក វ៉ី សំណាង បានឱ្យដឹងថា ករណីគ្រោះថ្នាក់ក្រឡាប់រថយន្តនេះ​បណ្ដាលមកពីតៃកុងបើក​លើសល្បឿន​ដល់ចំណុចផ្លូវកោងក៏ក្រឡាប់ បណ្ដាលឱ្យកម្មករកម្មការិនី ២៧ នាក់រងបួស ក្នុងនោះមានចំនួន ១១ នាក់រងរបួសធ្ងន់។

លោក វ៉ី សំណាងបានអំពាវនាវយ៉ាងទទូចដល់ម្ចាស់ឡានដឹកកម្មករ-កម្មការិនី ឱ្យមានការប្រុងប្រយ័ត្នខ្ពស់ក្នុងការបើកបរដោយ ដោយត្រូវគោរពច្បាប់ឱ្យបានម៉ឺងម៉ាត់ កុំវ៉ាជែង ក្នុងស្ថានភាពមិនល្អ កុំបើកបរលើសល្បឿនកំណត់ ខណៈកម្មការិនី រាប់សិបនាក់បានស្ម័គ្រផ្ញើអាយុជីវិតនៅលើអ្នកបើកបរតែម្នាក់គត់៕