ចរាចរណ៍

រថយន្តដឹកអ្នកដំណើរ បុករះម៉ូតូ-រថយន្ត ចំនួន ៤ គ្រឿង ស្លាប់មនុស្ស ៣ នាក់

បានផុស

១ ខែ មុន

នៅ

ថ្ងៃចន្ទ ៩ កញ្ញា ២០២៤

ដោយ

មនុស្សប្រុស-ស្រី ៣ នាក់ បានបាត់បង់ជីវិត និងរងរបួសម្នាក់ ក្នុងហេតុការណ៍គ្រោះថ្នាក់ចរាចរណ៍ រវាងរថយន្ត ៤ គ្រឿង និងម៉ូតូ ១ គ្រឿង កាលពីវេលាម៉ោង ៤ និង ៣០ នាទីរសៀល ថ្ងៃទី ៨ ខែកញ្ញា ឆ្នាំ ២០២៤ លើផ្លូវជាតិលេខ ៥ ត្រង់ចំណុចបង្គោលគីឡូម៉ែត្រលេខ ១២០-១២១ ស្ថិតនៅភូមិអូររំចេក ឃុំចក ស្រុកបរិបូណ៌ ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឱ្យដឹងថា ជនរងគ្រោះដែលបានបាត់បង់ជីវិតរួមមាន ៖ ទី១.ឈ្មោះ អ៊ុយ យ៉ាងគួយ ភេទស្រី អាយុ ១៩ ឆ្នាំ, ទី២.ឈ្មោះ ឡាំ សុផាន ភេទស្រី អាយុ ២៧ ឆ្នាំ ,និង ទី៣.ឈ្មោះ ឆ គ ឃ អាយុ ៣ ឆ្នាំ ជាកូនប្រុស របស់ឈ្មោះ ឡាំ សុផាន។ ជនរងគ្រោះទាំង ៣ នាក់ រស់នៅភូមិសន្លង់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។

យោងតាមសាក្សីបានឱ្យដឹងថា រថយន្តក្រុងដឹកអ្នកដំណើរ ពាក់ស្លាកលេខ ភ្នំពេញ 3F-4166 បានធ្វើដំណើរពីលិចមកកើត ក្នុងល្បឿនយ៉ាងលឿន ស្រាប់តែមកដល់ចំណុចកើតហេតុ ក៏រ៉េចង្កូតទៅប៉ះ រថយន្តសាំងយ៉ុង រួចបន្តបុករថយន្តកូរ៉ូឡា ដែលកំពុងចតនៅចិញ្ចើមផ្លូវ ប៉ើងធ្លាក់ប្រឡាយទឹក បណ្ដាលឱ្យបុរសម្នាក់ ជិះលើរថយន្តរងរបួស។

ប្រភពបន្តថា រថយន្តក្រុងមិនទាន់អស់ល្បឿន ក៏បានបន្តទៅបុកម៉ូតូហុងដា សេ ១២៥ ពណ៌ខ្មៅ ជិះគ្នា ៣ នាក់ (ស្លាប់ទាំង ០៣) ពេញទំហឹង ហើយស្របពេលនោះក៏មានរថយន្ត FORD ពណ៌ស មកបុកពីក្រោយរថយន្តក្រុងដឹកអ្នកដំណើរ បណ្ដាលឱ្យខូចខាតរថយន្តផ្នែកខាងមុខ។

ក្រោយកើតហេតុ អ្នកបើកបររថយន្តក្រុងដឹកអ្នកដំណើរ បានរត់គេចខ្លួនបាត់ ចំណែកវត្ថុតាងត្រូវបានសមត្ថកិច្ច នៃអធិការដ្ឋាននគរបាលស្រុកបរិបូរណ៍ យកមករក្សាទុក និងកសាងសំណុំរឿង បញ្ជូនទៅតាមនីតិវិធីច្បាប់៕

អត្ថបទ ៖ សំណាង