ប៉ាតាយ៉ា ប្រទេសថៃ ប្រឈមភ្លៀងធ្លាក់ខ្លាំង និងទឹកជំនន់រហូតដល់ចុងខែតុលា

យោងតាមការចេញផ្សាយរបស់សារព័ត៌មាន Pattaya Mail នៅថ្ងៃទី១៣ខែ តុលា នាយកដ្ឋានឧតុនិយមថៃ បានចេញសេចក្តីជូនដំណឹងមួយ សម្រាប់ទីក្រុងប៉ាតាយ៉ា និងខេត្តជិតៗ ដោយសារភ្លៀងធ្លាក់ខ្លាំង និងទឹកជំនន់ភ្លាមៗ ត្រូវបានគេរំពឹងថា នឹងបន្តរហូតដល់ចុងខែតុលាឯណោះ។

ខ្យល់មូសុងនិរតីនិងខ្យល់មូសុងសកម្មកំពុងវាយលុកភាគខាងកើត និងកណ្តាលប្រទេសថៃ ដែលនាំមកនូវអាកាសធាតុមិនស្ថិតស្ថេរ ខ្យល់បក់ខ្លាំង និងរលកខ្ពស់ទៅកាន់តំបន់ឆ្នេរតាមឈូងសមុទ្រថៃ។ ជាការឆ្លើយតបអាជ្ញាធរ​ថៃអំពាវនាវ​ដល់​ប្រជាពលរដ្ឋ និង​ភ្ញៀវ​ទេសចរណ៍​ប្រុង​ប្រយ័ត្ន​ចំពោះ​ភ្លៀង​ធ្លាក់​ភ្លាមៗ ដែល​អាច​បណ្តាល​ឱ្យ​មាន​ជំនន់​ទឹក​លិច​ផ្លូវ និង​ការ​បិទ​ផ្លូវ ជាពិសេស​តំបន់​ទំនាប និង​កន្លែង​មាន​លូ​បង្ហូរ​ទឹក។ អ្នកស្រុកត្រូវបានណែនាំឲ្យផ្លាស់ទីវត្ថុមានតម្លៃទៅកាន់ទីទួលខ្ពស់ និងជៀសវាងការធ្វើដំណើរក្នុងពេលមានភ្លៀងធ្លាក់ខ្លាំង ឬស្ថានភាពទឹកជំនន់។

នាយកដ្ឋានឧតុនិយមថៃ ​ព្យាករណ៍​ថា តំបន់ទាំងនេះជាពិសេសនៅប៉ាតាយ៉ានឹងជួបប្រទះភ្លៀង​ធ្លាក់​រាយប៉ាយ​ជា​បន្តបន្ទាប់ ជាមួយ​ខ្យល់​បក់​ពី ១០-២០ គីឡូម៉ែត្រ​ក្នុង​មួយ​ម៉ោង និង​រលក​សមុទ្រ​មាន​កម្ពស់​ដល់​ទៅ ២​ម៉ែត្រ នៅពេល​មាន​ខ្យល់​ព្យុះ។ អ្នកអុំទូក និងអ្នកនេសាទត្រូវបានណែនាំយ៉ាងម៉ឺងម៉ាត់កុំឱ្យចេញទៅសមុទ្រអំឡុងពេលមានព្យុះ។

ហានិភ័យទឹកជំនន់នៅប៉ាតាយ៉ានឹងនៅតែមានកម្រិតខ្ពស់រហូតដល់ខ្យល់មូសុងចុះខ្សោយនៅចុងខែនេះ ហើយបានជំរុញសហគមន៍ឱ្យមានការប្រុងប្រយ័ត្នដើម្បីការពារអាយុជីវិត និងទ្រព្យសម្បត្តិ៕

អត្ថបទ៖ ប៊ុន សុភាព