អាជ្ញាធរស្រុកបាទី ឲ្យម្ចាស់ឃ្លាំងជួសជុលរថយន្ដឈ្មោះ​ នី អៀម រុះរើ​សំយ៉ាបដែលសង់រំលោភលើខ្នងប្រឡាយជាង​២០ម៉ែត្រចេញ តែគិតត្រឹមថ្ងៃទី​២៦​តុលានេះ នៅមិនទាន់រុះរើនៅឡើយ

រដ្ឋបាលស្រុកបាទី ខេត្តតាកែវ បានណែនាំឲ្យម្ចាស់ឃ្លាំងជួសជុលរថយន្ដមួយកន្លែងឈ្មោះ នី អៀម ដែលមានទីតាំងនៅតាមបណ្ដោយផ្លូវជាតិលេខ២ ស្ថិតនៅភូមិស្មៅខ្ញី ឃុំត្រពាំងសាប ត្រូវរុះរើសំយ៉ាងដែលបានសាងសង់រំលោភគ្របលើខ្នងប្រឡាយប្រវែងជាង២០ម៉ែត្រចេញ ខណៈម្ចាស់ទីតាំងឃ្លាំងក៏បានយល់ព្រមរុះរើតាមការណែនាំរបស់អាជ្ញាធរ តែគិតត្រឹមថ្ងៃទី២៦ ខែតុលា ឆ្នាំ២០២៥នេះ ម្ចាស់ទីតាំងនៅមិនទាន់មានសកម្មភាពរុះរើនៅឡើយ។

ការណែនាំឲ្យរុះរើសំណង់សាងសង់រំលោភលើខ្នងប្រឡាយនេះ ធ្វើឡើងបន្ទាប់ពីមានសារព័ត៌មានក្នុងស្រុកមួយបានចុះផ្សាយពីការសាងសង់សំណង់រឹងមាំគ្របខ្នងប្រឡាយ ដែលជាសម្បត្តិរដ្ឋ មកធ្វើជាកម្មសិទ្ធផ្ទាល់ខ្លួន។

តាមរយៈសេចក្ដីបំភ្លឺព័ត៌មានរបស់រដ្ឋបាលស្រុក កាលពីថ្ងៃទី១៦ ខែតុលា និងទើបបង្ហោះចែកចាយនៅលើទំព័រហ្វេសប៊ុក​ផ្លូវការរបស់រដ្ឋបាលស្រុកនៅព្រឹកថ្ងៃទី២៦ ខែតុលា ឆ្នាំ២០២៥នេះ បានឲ្យដឹងថា ក្រោយពីទទួលបានព័ត៌មាននៅថ្ងៃទី១៦ ខែតុលា ឆ្នាំ២០២៥ វេលាម៉ោង ១០និង១៥នាទីព្រឹក ក្រុមការងាររបស់រដ្ឋបាលស្រុកបានចុះទៅពិនិត្យដល់ទីតាំងផ្ទាល់ និងរកឃើញថា ប្រឡាយមានទំហំ ១៧ម៉ែត្រ និងត្រូវបានម្ចាស់ឃ្លាំងជួសជុលរថយន្តឈ្មោះ នី អៀម បានដាំដើមឬស្សី និងយករថយន្តទៅចតបាំងខ្នងប្រឡាយខាងក្រោយ និងបានតសំយ៉ាបគ្របលើខ្នងប្រឡាយប្រវែង ២២ គុណ ៣.៥៣ម៉ែត្រ។

បន្ទាប់ពីពិនិត្យជាក់ស្ដែង ក្រុមការងារបានណែនាំឱ្យម្ចាស់ឃ្លាំងឈ្មោះ នី អៀម ត្រូវរុះរើសំយ៉ាប និងដើមឬស្សីដែលរាំងបិទខាងក្រោយមិនឱ្យមានការបិទបាំងបន្តទៀត និងមិនឱ្យសាងសង់សំណង់លើខ្នងប្រឡាយទៀតនោះឡើយ។ បើតាមការប្រកាសរបស់រដ្ឋបាលស្រុក ម្ចាស់ឃ្លាំងឈ្មោះ នី អៀម បានឯកភាពរុះរើ ដើមឬស្សី និងសំយ៉ាបដែលសាងសង់រំលោភលើខ្នងប្រឡាយនោះចេញតាមការណែនាំរបស់ក្រុមការងាររដ្ឋបាលស្រុក។

ទោះបីយ៉ាងណា គិតត្រឹមថ្ងៃទី២៦ ខែតុលា ឆ្នាំ២០២៥នេះ ម្ចាស់ទីតាំងឃ្លាំងជួសជុលរថយន្ដដែលបានសាងសង់សំណង់រឹងមាំរំលោភលើខ្នងប្រឡាយសាធារណៈនេះ នៅមិនទាន់មានសកម្មភាពរុះរើតាមការណែនាំរបស់អាជ្ញាធរដូចការព្រមព្រៀងគ្នានៅឡើយ ខណៈមហាជននឹងរង់ចាំមើល តើអាជ្ញាធរនឹងមានវិធាការអ្វីបន្ទាប់ទៀត៕

អត្ថបទ៖ សុខុម