ក្រុមហ៊ុន Aeon Mall រៀបចំពិធីសូត្រមន្តលើករាសី និងបញ្ចៀសគ្រោះឧបទ្ទវនៅផ្សារទំនើបអ៊ីអនមានជ័យ

នៅថ្ងៃទី៣០ ខែតុលា ឆ្នាំ២០២៥ ក្រុមហ៊ុន Aeon Mall Cambodia CO., Ltd. បានរៀបចំពិធីសូត្រមន្តលើករាសី និងឧទ្ទិស​កុសលដល់ប្រជាជនដែលបានបាត់បង់ជីវិត ក្នុងជម្លោះ ព្រំដែន​​​ កម្ពុជា–ថៃ រួមទាំងសោកនាដកម្ម នៃការលោតពីលើអាគារកាលពីថ្ងៃទី២៧ ខែតុលា កន្លងទៅ នៅផ្សារទំនើបអ៉ីអនម៉លមានជ័យ (Aeon 3) ។

កម្មវិធីនេះ រៀបចំឡើងក្នុងគោលបំណងបួងសួងដល់វត្ថុស័ក្តិសិទ្ធិ និងសុំពរជ័យជូនដល់ដៃគូអាជីវកម្ម អតិថិជន និងបុគ្គលិកទាំងអស់ ដើម្បីទទួលបានសុខសន្តិភាព ស្របតាមចក្ខុវិស័យស្នូលរបស់ក្រុមហ៊ុន ដែលផ្តោតសំខាន់លើ អតិថិជន ដៃគូអាជីវកម្ម បុគ្គលិក និងប្រទេសកម្ពុជា។

សូមជម្រាបថា កាលពីថ្ងៃទី២៧ ខែតុលា ឆ្នាំ២០២៥ មានហេតុការណ៍ដ៏គួរឱ្យរន្ធត់មួយកើតឡើង ដោយបុរសជនជាតិខ្មែរម្នាក់ បានលោតពីលើអគារជាន់ទី៣ នៃផ្សារទំនើបអ៉ីអន ម៉ល មានជ័យ បាត់បង់ជីវិត នាវេលាម៉ោង ១៖៣១ នាទីរសៀល។ ក្រោយមានករណីនេះកើតឡើង អាជ្ញាធរមូលដ្ឋាន និងសមត្ថកិច្ចជំនាញបានទៅដល់កន្លែងកើតហេតុ ដើម្បីហ៊ុំព័ទ្ធទីតាំង និងចាប់ផ្តើមការងារស៊ើបអង្កេតភ្លាមៗ។

ជាមួយគ្នានេះ ក្រុមហ៊ុន អ៊ីអន ម៉ល ខេមបូឌា ប្តេជ្ញាចិត្តបន្តផ្តល់ជូននូវសុវត្ថិភាព និងការចូលរួមជាមួយសាធារណជន ដើម្បីឱ្យទទួលបានសេចក្ដីសុខ និងបន្តផ្តល់នូវលទ្ធភាពថ្មីៗដល់ប្រជាជនបន្តទៀត៕