ម៉ាដូណា ជម្រុញមហាជនបន្តស្រាក់ដៃគ្នាបោះឆ្នោតឱ្យបវរកញ្ញាខ្មែរ ដើម្បីចូល Top ជ្រៅ Miss Universe

តារាសម្តែង និងកំប្លែងភេទទី៣ លោក ម៉ាដូណា បានចេញមុខបំផុសក៏ដូចជាស្នើសុំជំនួយពីសំណាក់មហាជនខ្មែរ ដើម្បីរួមដៃគ្នាក្នុងការគាំទ្រដោយការបោះឆ្នោតឱ្យបវរកញ្ញាខ្មែរ ហ្វីយ៉ាតា កាន់តែអស្ចារ្យនឹងកាន់តែខ្លាំងលើឆាកអន្តរជាតិ។

ការចេញមុខរបស់លោក ម៉ាដូណា នេះធ្វើឡើងស្របពេលដែលស្រីស្រស់ ហ្វីយ៉ាតា កំពុងតែតំណាងឱ្យកម្ពុជាចូលរួមការប្រកួតលើឆាកអន្តរជាតិ Miss Universe លើកទី៧៤ នៅប្រទេសថៃ ខណ:មានអ្នកគាំទ្រមួយចំនួនបានបង្ហាញការផ្តល់កំលាំងចិត្ត និងចំណាយលុយផ្ទាល់ខ្លួន ដើម្បីចូលរួមបោះឆ្នោតឱ្យនាងផងនោះ។

លោក ម៉ាដូណា បានលើកឡើងថា “ខឹងឫស្អប់សូមទុកមួយឡែកសិន សំខាន់ពេលនេះគាត់បានតស៊ូនៅការវាយប្រហាផ្ទះលេខ២ ច្រើនណាស់ តែគាត់ប្រឹងដើម្បីប្រទេសជាតិយើង ខ្មែរជួយខ្មែរចូលរួមបោះឆ្នោតទាំងអស់គ្នា”។

លោកបន្តថា “ចង់ឱ្យបវរកញ្ញាខ្មែរកាន់តែអស្ចារ្យ នឹងកាន់តែខ្លាំងក្លាទៅកាន់ពិភពលោក ឱ្យគេស្គាល់ថា ខ្មែរមិនធម្មតា មានតែពឹងទៅលើបងប្អូនខ្មែរ ជួយបោះឆ្នោតហើយ”។

ទោះយ៉ាងណា បវរកញ្ញាតំណាងឱ្យកម្ពុជាប្រកួតលើឆាកអន្តរជាតិ ហ្វីយ៉ាតា បានបង្ហាញអារម្មណ៍ភើបខ្លាំង ក្រោយឃើញអ្នកគាំទ្រនៅកម្ពុជាសាមគ្គីគ្នាផ្តល់កម្លាំងចិត្តចំពោះរូបនាងដែលធ្វើឱ្យរូបនាងបេ្តជ្ញាតស៊ូអស់ពីសមត្ថភាព។ ហ្វីយ៉ាតាបានបង្ហើបដែរថា “នៅក្រោយភាពស្រស់ស្អាត ភាពជឿជាក់ និងការខិតខំ មានពោរពេញទៅដោយភាពអស់ក ម្លាំងនឿយហត់ ជាពិសេសនាងក៏ទទួលរងនូវការមិនសប្បាយចិត្ត ប៉ុន្តែក៏មិនអាចនិយាយចេញ”។

គួរបញ្ជាក់ថា គិតមកដល់ពេលនេះ អ្នកនាង ថៃ នារីសុជាតា ហៅ ហ្វីយ៉ាតា ដែលជា Miss Universe Cambodia 2025 គឺបានចាកចេញពីប្រទេសកម្ពុជាមានរយ:ប្រមាណជិត១០ថ្ងៃហើយ ដោយនាងបានចេញទៅកាលពីថ្ងៃទី០២ ខែវិច្ឆិកាឆ្នាំ២០២៥ ដើម្បីតំណាងឱ្យកម្ពុជាទៅចូលរួមការប្រកួត Miss Universe លើកទី៧៤៕ ចាន់រ៉ា