ថៃ បង្កើនការបញ្ចេញទឹក ខណៈទឹកនៅទំនប់ក្នុងខេត្ត Tak ឡើងជិតហួសសមត្ថភាពផ្ទុក

យោងតាមការចេញផ្សាយរបស់សារព័ត៌មាន Khaosod នៅថ្ងៃទី១១ខែ វិច្ឆិកា កម្រិតទឹកនៅទំនប់ Bhumibol ក្នុងខេត្ត Tak ប្រទេសថៃបានឈានដល់ ៩៩.៣៣% នៃសមត្ថភាពរបស់វា ដែលនាំឱ្យមន្ត្រីបង្កើនការបញ្ចេញទឹក ដើម្បីកាត់បន្ថយសម្ពាធលើទំនប់ និងការពារទឹកជំនន់ដែលអាចកើតមាន។

យោងតាមការអាប់ដេតចុងក្រោយបំផុតនៅម៉ោង ៨:៤៩ ព្រឹកថ្ងៃអង្គារ ទំនប់នេះកំពុងផ្ទុកទឹកចំនួន ១៣.៣៧១,៨០ លានម៉ែត្រគូប ដោយមានទឹកចំនួន ៩.៥៧១,៨០ លានម៉ែត្រគូបសម្រាប់ប្រើប្រាស់ស្មើនឹងប្រហែល ៩៩% នៃសមត្ថភាពប្រើប្រាស់របស់វា។ កម្រិតទឹកបច្ចុប្បន្នមានកម្ពស់ ២៥៩,៧១ ម៉ែត្រពីលើនីវ៉ូទឹកសមុទ្រ។ ទំបន់នេះអាចទទួលយកទឹកបានតែចំនួនបន្តិចទៀតប៉ុណ្ណោះ ព្រោះកម្រិតទឹកឡើងខ្ពស់ជិតលើសសម្ថភាពផ្ទុកទៅហើយ។

ដើម្បីគ្រប់គ្រងស្ថានការណ៍ នាយកដ្ឋានធារាសាស្ត្រថៃបានប្រកាសផែនការបញ្ចេញទឹកថ្មីមួយ។ នៅថ្ងៃទី១០ ខែវិច្ឆិកា ទំនប់បានបញ្ចេញទឹកចំនួន ៤៨ លានម៉ែត្រគូប។ នៅថ្ងៃទី១១ ខែវិច្ឆិកា ការបញ្ចេញទឹកបានកើនឡើងដល់ ៥៣លានម៉ែត្រគូប ហើយនៅថ្ងៃទី១២ ខែវិច្ឆិកា វានឹងកើនឡើងទៀតដល់ ៥៥លានម៉ែត្រគូបក្នុងមួយថ្ងៃ។

គួរបញ្ជាក់ថា Bhumibol គឺជាទំនប់វារីអគ្គិសនីធំជាងគេរបស់ប្រទេសថៃ និងជាប្រភពទឹកដ៏សំខាន់សម្រាប់កសិកម្ម ការផលិតអគ្គិសនី និងការគ្រប់គ្រងទឹកជំនន់នៅក្នុងអាងទន្លេចៅប្រាយ៉ា។ អាជ្ញាធរថៃក៏បានព្រមានប្រជាជននៅតំបន់ទំនាបខាងក្រោមឱ្យប្រុងប្រយ័ត្ន ខណៈដែលភ្លៀងធ្លាក់ខ្លាំងនៅតែបន្តធ្លាក់នៅភាគខាងជើងប្រទេសថៃ៕

អត្ថបទ៖ ប៊ុន សុភាព