ដំណាំកសិកម្ម​​សក្តានុពល ៣ មុខ កសិករ​​ខេត្តក្រចេះជំរុញ​ការ​ដាំដុះ មានឈ្មួញ​ចុះ​ប្រមូលទិញនាំចេញទៅក្រៅប្រទេស

មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ​បានបង្ហាញទិន្នន័យ​ការដាំដុះដំណាំសក្តានុពល ៣ មុខ ក្នុង​ខេត្ត​ក្រចេះ​ដែលកសិករ​កំពុង​ជំរុញការ​ដាំដុះ​នៅ​លើផ្ទៃដី​រាប់សែនហិកតា ដែលក្រៅពីសម្រាប់ផ្គត់ផ្គង់ទីផ្សារក្នុងស្រុក ក៏មានឈ្មួញចុះ​មកប្រមូល​ទិញ​នាំចេញទៅប្រទេស​វៀតណាម។

បើ​តាម​មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ​ ខេត្តក្រចេះ​មានដំណាំម្រេចដែល​ដាំ​ជាលក្ខណៈគ្រួសារចំនួន ២៩៤ ហិកតា ដែល​​អាច​ទទួលបានទិន្នផលជាមធ្យម ៣ តោន ក្នុង ១ ហិកតា (ប្រភេទម្រេចស្ងួត)។

ការប្រមូលផលដំណាំម្រេចនេះ ចាប់ផ្ដើមប្រមូលផលពីខែមិនា ដល់ខែឧសភា ដោយទទួលបានបរិមាណផលសរុបចំនួន ៨៨២ តោន ខណៈដែលតម្លៃអាច​លក់បានចន្លោះពី ២៤ ០០០ រៀល ទៅ ២៨ ០០០ រៀល ក្នុងមួយគីឡូក្រាម។

ចំពោះស្វាយចន្ទី ដាំដុះលើផ្ទៃដី​ចំនួន ១០២ ៥២០ ហិកតា ក្នុងនោះស្វាយចន្ទីលក្ខណៈគ្រួសារមានចំនួន ៩៨ ៥២០,៥៣ ហិកតា ដោយទទួលបានទិន្នផលជាមធ្យមចំនួន ២ តោន ក្នុង១ហិកតា និងស្វាយចន្ទីប្រភេទ ELC ដាំដុះ​លើផ្ទៃដី​ចំនួន ៣ ៩៩៩,៤៧ ហិកតា។ ការប្រមូលផលគឺចាប់ផ្ដើមប្រមូលផលពីខែមករា ដល់ចុងខែមេសា ដោយទទួលបានបរិមាណ​ផល​សរុប​ចំនួន ២០៥ ០៤០ តោន ខណៈតម្លៃទីផ្សារស្វាយចន្ទី ក្នុង ១ គីឡូក្រាម ចន្លោះពី ៥ ០០០ រៀល ទៅ ៥ ៥០០ រៀល។

ចំពោះដំណាំដំឡូងមី គិតត្រឹមប្រចាំខែតុលា ឆ្នាំ២០២៥ ការដាំដុះសម្រេចបាន​លើផ្ទៃដី​ចំនួន ៧៧ ៥១៤ ហិកតា ក្នុងនោះ ដំឡូង​មី​គ្រួសារដាំដុះលើផ្ទៃដី​ចំនួន ៧៦ ៤៩០ហិកតា និងដំឡូងមីរបស់ក្រុមហ៊ុនដាំបានចំនួន ១ ០២៤ ហិកតា ដោយទទួលបានទិន្នផលជាមធ្យមចំនួន ២០ តោន ក្នុង១ហិកតា និងបរិមាណ​ផលសរុបទទួលបាន ១ ៥៥០ ២៨០​តោន ខណៈតម្លៃលក់នៅលើទីផ្សារបានត្រឹមតែ ១៤០ រៀល ទៅ ២៣០ រៀល ក្នុង​១​គីឡូក្រាម (តម្លៃដំឡូងមីស្រស់)។

ទិន្នផល​ដែល​ប្រមូល​បានត្រូវ​បាន​ប្រភពមន្ទីរកសិកម្មខេត្ត​អះអាង​ថា មាន​ឈ្មួញ​ចុះ​ប្រមូលទិញ​​យកទៅ​លក់បន្តសម្រាប់​ផ្គត់ផ្គង់ទីផ្សារ​ក្នុងស្រុក និងនាំទៅលក់បន្តនៅវៀតណាម៕

អត្ថបទ៖ ប្រុញ វិធិន