លោក ប្រាក់ សុខុន នឹងធ្វើជាសហប្រធានកិច្ចប្រជុំគណៈកម្មការចម្រុះជាមួយសមភាគីឡាវ នៅទីក្រុងវៀងចន្ទន៍

រដ្ឋមន្ត្រីការបរទេស លោក ប្រាក់ សុខុន នឹងទៅបំពេញទស្សនកិច្ចផ្លូវការនៅប្រទេសឡាវ ដោយក្នុងពេលនោះ លោកនឹងធ្វើជាសហប្រធានកិច្ចប្រជុំលើកទី១៥ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីរវាងកម្ពុជា និងឡាវ។

ដំណើរទស្សនកិច្ចរបស់លោក ប្រាក់ សុខុន ទៅកាន់ប្រទេសឡាវ តបតាមការអញ្ជើញរបស់សមភាគី លោក ថងសាវណ្ណ កុមវិហាន រដ្ឋមន្ត្រីការបរទេសឡាវ ដែលនឹងចាប់ផ្ដើមពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៥។

តាមសេចក្ដីប្រកាសព័ត៌មានរបស់ក្រសួងការបរទេស ក្នុងអំឡុងពេលទស្សនកិច្ចនេះ លោក ប្រាក់ សុខុន នឹងអញ្ជើញជួបសម្តែងការគួរសមចំពោះលោក ថងលុន ស៊ីសុលីត ប្រធានាធិបតី និងលោក សនសៃ ស៊ីផាន់ជន នាយករដ្ឋមន្ត្រីឡាវ។

ក្រសួងការបរទេសកម្ពុជា ថា ដំណើរទស្សនកិច្ចផ្លូវការនេះបញ្ជាក់ជាថ្មីនូវទំនាក់ទំនងមិត្តភាព និងសាមគ្គីភាពដ៏យូរអង្វែង រវាងប្រទេសទាំងពីរ ដែលបង្ហាញពីការប្តេជ្ញាចិត្តរួមនៃប្រជាជាតិទាំងពីរ ក្នុងការធ្វើឱ្យកាន់តែស៊ីជម្រៅនូវចំណងមិត្តភាពជាប្រពៃណី ភាពជាអ្នកជិតខាងល្អ និងកិច្ចសហប្រតិបត្តិការពហុវិស័យ៕