ត្រាំ គ្រោងធ្វើជំនួបតាមទូរស័ព្ទជាមួយប្រធានាធិបតីវេណេស៊ុយអេឡា

យោងតាមរបាយការណ៍របស់ Axios នៅថ្ងៃទី ២៥ ខែវិច្ឆិកា ប្រធានាធិបតីអាមេរិក លោក ដូណាល់ ត្រាំ កំពុងរៀបចំធ្វើជំនួបតាមទូរស័ព្ទជាមួយប្រធានាធិបតីវេណេស៊ុយអេឡា លោក Nicolas Maduro ទោះបីជាទីក្រុងវ៉ាស៊ីនតោនបានកំណត់ជាផ្លូវការថាលោក Maduro ជា «ភេរវករគ្រឿងញៀន» និងបានហៅក្រុម Cartel de los Soles មានមូលដ្ឋាននៅវេណេស៊ុយអេឡាថាជាអង្គការភេរវករបរទេសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីសហរដ្ឋអាមេរិកបានប្រាប់ Axios ថា ការរៀបចំផែនការជំនួបតាមទូរស័ព្ទរវាងលោក ត្រាំ និងលោក Maduro នេះបង្ហាញពីការផ្លាស់ប្តូរយុទ្ធសាស្ត្រ ហើយវាទំនងជាមានន័យថា សហរដ្ឋអាមេរិកមិនមានបំណងបើកការវាយប្រហារយោធាលើប្រទេសវេណេស៊ុយអេឡានៅពេលនេះទេ។ ផ្ទុយទៅវិញ ទីក្រុងវ៉ាស៊ីនតោននឹងបន្តកំណត់គោលដៅលើនាវារត់ពន្ធគ្រឿងញៀន ដែលជាផ្នែកមួយនៃយុទ្ធនាការយោធានៅទូទាំងអាមេរិកឡាទីនដោយប្រ់ើប្រាស់កងទ័ពជើងទឹក នាវាចម្បាំង យន្តហោះចម្បាំង យន្តហោះទម្លាក់គ្រាប់បែក នាវាមុជទឹក និងយន្តហោះគ្មានមនុស្សបើក។

មន្ត្រីអាមេរិកម្នាក់បាននិយាយថា នៅពេលនេះមិនទាន់មានផែនការណាមួយដើម្បីចាប់ខ្លួន ឬវាយប្រហារលោក Maduro នៅឡើយទេ ប៉ុន្តែសហរដ្ឋអាមេរិកនឹងបន្តកំណត់គោលដៅប្រតិបត្តិការរត់ពន្ធគ្រឿងញៀន។ ចំណែកមន្ត្រីម្នាក់ទៀតបាននិយាយថា ជំនួបតាមទូរស័ព្ទរវាងលោក ត្រាំ និងលោក Maduro មិនទាន់មានកាលបរិច្ឆេទនៅឡើយទេ ហើយកំពុងរៀបចំ។

បើទោះបីជាមានភាពតានតឹងកើនឡើងក៏ដោយ លោក Maduro បាននិយាយថា ប្រទេសវេណេស៊ុយអេឡាបានត្រៀមខ្លួនរួចជាស្រេចសម្រាប់ការសន្ទនា «ទល់មុខគ្នា» ជាមួយសហរដ្ឋអាមេរិក៕

អត្ថបទ៖ ប៊ុន សុភាព