ព័ត៌មានអន្ដរជាតិ

ក្រុមហ៊ុនយក្សអាមេរិក និងអាល្លឺម៉ង់ ចុះកិច្ចព្រមព្រៀង ផលិតមីស៊ីល ATACMS រួមគ្នា

បានផុស

១៣ វិនាទី មុន

នៅ

ថ្ងៃពុធ ៨ កក្កដា ២០២៦

ដោយ

ក្រុមហ៊ុនការពារជាតិ Lockheed Martin ដ៏ធំរបស់សហរដ្ឋអាមេរិក និង Rheinmetall របស់អាល្លឺម៉ង់បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីឈានទៅរកការផលិតមីស៊ីល ATACMS រួមគ្នានៅអឺរ៉ុប។ នេះបើយោងតាមប្រធានក្រុមហ៊ុន លើកឡើងកាលពីថ្ងៃអង្គារ ទី៧ ខែកក្កដា ឆ្នាំ២០២៦ និងចុះផ្សាយដោយទីភ្នាក់ងារសារព័ត៌មាន Reuters ។

ការប្រកាសនេះធ្វើឡើង អំឡុងវេទិកាឧស្សាហកម្មការពារជាតិ របស់កិច្ចប្រជុំកំពូលណាតូនៅទីក្រុងអង់ការ៉ា ប្រទេសតួកគី ហើយជាការគូសបញ្ជាក់ ពីផែនការបណ្តាក់ទុនរួមគ្នាមួយ ដែលនឹងបង្កើតមជ្ឈមណ្ឌលឧត្តមភាពអឺរ៉ុបដំបូងគេសម្រាប់ការផលិត ធ្វើសមាហរណកម្ម និងការចែកចាយមីស៊ីល ATACMS នៅទូទាំងប្រទេសជាសមាជិកណាតូ និងកងកម្លាំងអឺរ៉ុបសម្ព័ន្ធមិត្ត។

ការតាំងបង្ហាញសព្វាវុធរបស់អាល្លឺម៉ង់។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ATACMS គឺជាមីស៊ីលបាញ់ចេញពីដី ត្រូវបានរចនាឡើងដើម្បីបាញ់ចេញពីប្រព័ន្ធកាំភ្លើងធំរ៉ុកកែត ក្នុងការវាយប្រហាររយៈចម្ងាយឆ្ងាយ។

លោក Jay Pitman ប្រធានក្រុមហ៊ុន Lockheed Martin International លើកឡើងថា៖ « ភាពជាដៃគូនេះ គឺជាពេលវេលាដ៏សំខាន់មួយ សម្រាប់សន្តិសុខអឺរ៉ុប និងកិច្ចសហប្រតិបត្តិការឧស្សាហកម្មសម្ព័ន្ធមិត្ត។ ការរួមបញ្ចូលគ្នា នូវបទពិសោធន៍មីស៊ីលរបស់ Lockheed Martin ជាមួយនឹងមូលដ្ឋានផលិតរបស់ Rheinmetall នឹងជួយផ្តល់សមត្ថភាពឱ្យឃើញពីការប្រយុទ្ធបានលឿន និងមានប្រសិទ្ធភាពជាងមុនដល់សម្ព័ន្ធមិត្តរបស់យើង»។

ដោយឡែក លោក Armin Papperger នាយកប្រតិបត្តិក្រុមហ៊ុន Rheinmetall និយាយថា ផែនការនេះគឺដើម្បីបង្កើតផលិតកម្មនៅទីតាំង Unterluess របស់ក្រុមហ៊ុន Rheinmetall ភាគខាងជើងប្រទេសអាល្លឺម៉ង់។

លោក Papperger បន្តថា៖ « គោលបំណងរបស់យើង គឺពង្រឹងសមត្ថភាពការពារជាតិរបស់អាល្លឺម៉ង់ និងអឺរ៉ុប។ តាមរយៈការបង្កើតផលិតកម្មមីស៊ីល ATACMS នៅទីតាំង Unterluess របស់ Rheinmetall យើងកំពុងបង្កើតសមត្ថភាពថ្មីៗសម្រាប់អាល្លឺម៉ង់ និងអឺរ៉ុប ដោយធានាការផ្គត់ផ្គង់សម្រាប់អតិថិជននិងពង្រឹងស្វ័យភាពរបស់យើង ក្នុងគោលនយោបាយការពារជាតិ»៕

សម្រួល៖ ណឺ មិនា