សិស្សសាលាទូទាំងប្រទេសថៃ ប្រឈមគ្រោះថ្នាក់ដល់សុខភាព ព្រោះខ្យល់ពុល

ខ្យល់ពុល PM2.5 នៅថៃ កាន់តែធ្ងន់ធ្ងរទៅៗ ហើយពេលនេះ ក៏មានការព្រមានឲ្យសាលារៀនទូទាំងប្រទេស ត្រូវត្រៀមចាត់វិធានការការពារ ដោយសារតែហានិភ័យប៉ះពាល់ដល់សុខភាពសិស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Bangkok Post បានដកស្រង់សម្តីរដ្ឋមន្ត្រីក្រសួងអប់រំថៃលោកស្រី Narumon Pinyosinwat ដែលនិយាយកាលពីថ្ងៃពុធទី៣ខែធ្នូឆ្នាំ២០២៥ថា សូមសាលារៀនទាំងឡាយប្រាប់ឲ្យសិស្សផ្អាកសកម្មភាពខាងក្រៅនិងត្រូវពាក់ម៉ាសជាប់ជានិច្ចព្រោះស្ថានភាពខ្យល់ពុល PM2.5 ពេលនេះ កាន់តែធ្ងន់ធ្ងរ លើសកម្រិតសុវត្ថិភាពហើយ។

ទន្ទឹមនោះ លោកស្រីបានអំពាវនាវដល់ភ្នាក់ងារពាក់ព័ន្ធទាំងអស់ ត្រូវតាមដានស្ថានភាពខ្យល់ពុលឲ្យបានដិតដល់ ដើម្បីស្រួលវាយតម្លៃហានិភ័យដល់សិស្ស គ្រូបង្រៀននិងបុគ្គលិកសាលារៀន។

មុននេះដែរ រដ្ឋមន្ត្រីក្រសួងសុខាភិបាល Phatthana បានឲ្យដឹងថា ខ្យល់ពុល PM2.5 ដ៏អាក្រក់ នឹងវាយប្រហារប្រទេសថៃ រហូតដល់ដើមឆ្នាំក្រោយឯណោះ។ ទន្ទឹមនោះ លោកបានព្រមានឲ្យពលរដ្ឋមានការប្រុងប្រយ័ត្នជាពិសេសក្រុមមនុស្សងាយរងគ្រោះដូចជាកុមារតូចៗ ស្រ្តីមានផ្ទៃពោះ មនុស្សចាស់ និងអ្នកមានជំងឺរ៉ាំរ៉ៃ ជាពិសេសអ្នកមានជំងឺផ្លូវដង្ហើម ត្រូវចៀសវាងសកម្មភាពខាងក្រៅ ឬពាក់ម៉ាសឲ្យបានជាប់ជានិច្ចពេលចេញទៅណាមកណា។

ការព្រមាននេះកើតឡើងស្របពេល ខ្យល់ពុល PM2.5 បានឈានដល់កម្រិតប្រកាសអាសន្នពណ៌ក្រហម នៅក្នុងទីក្រុងបាងកកនិងខេត្តចំនួន១៤។ 

ខ្យល់ពុលកម្រិតប្រកាសអាសន្នពណ៌ក្រហមបានគ្របដណ្តប់ទីក្រុងបាងកក, ខេត្ត Samut Sakhon, Nonthaburi, Nakhon Pathom, Samut Prakan, Pathum Thani, Chonburi, Chachoengsao, Rayong, Ratchaburi, Chanthaburi, Trat, Prachinburi, Samut Songkhram និង Phetchaburi។

ទីភ្នាក់ងារអវកាសនិងភូមិសាស្ត្រព័ត៌មានវិទ្យាជាតិនៃប្រទេសថៃ (GISTDA) បានឲ្យដឹងថា ពេលឡើងដល់ចំណុចកំពូលនៅថ្ងៃអង្គារ ខ្យល់ពុល PM2.5 ក្នុងខ័ណ្ឌ Nong Khaem នៃទីក្រុងបាងកក បានឈានកម្រិតគ្រោះថ្នាក់ខ្លាំង ១០២.៥មីក្រូក្រាមក្នុងមួយម៉ែត្រគូបនៃខ្យល់ ពោលគឺលើសឆ្ងាយណាស់ពីកម្រិតសុវត្ថិភាពកំណត់ដោយរដ្ឋាភិបាលថៃ ដែលដាក់ត្រឹម២៥មីក្រូក្រាមក្នុងមួយម៉ែត្រគូបនៃខ្យល់ប៉ុណ្ណោះ៕

អត្ថបទ៖ សុខ សុវណ្ណ