សមត្ថកិច្ចចម្រុះខេត្តក្រចេះ ចុះបង្ក្រាបទីតាំងសិប្បកម្មឈើ​មួយកន្លែង គ្មានច្បាប់អនុញ្ញាតិ

ទីតាំងសិប្បកម្មគ្រឿងសង្ហារឹមធ្វើពីឈើធម្មជាតិមួយកន្លែង ស្ថិតនៅឃុំស្រែជិះ ស្រុកអូរក្រៀងសែនជ័យ ខេត្តក្រចេះ ត្រូវបានសមត្ថកិច្ចចម្រុះ ចុះបង្ក្រាប នៅថ្ងៃទី៣ ខែធ្នូ ឆ្នាំ២០២៥ម្សិលម៉ិញនេះ។

យោងតាមប្រភពព័ត៌មានពីសមត្ថកិច្ច បានឱ្យដឹងថា នៅថ្ងៃទី០៣ ខែធ្នូ ឆ្នាំ២០២៥ វេលាម៉ោង ១៥ និង៣០នាទី សមត្ថកិច្ចចម្រុះរួមមាន មន្ត្រីសង្កាត់រដ្ឋបាលព្រៃឈើរលួសមានជ័យ កម្លាំងកងរាជអាវុធហត្ថស្រុកអូរគ្រៀងសែនជ័យ មន្ត្រីបរិស្ថានខេត្តក្រចេះ និងកម្លាំងប៉ុស្តិ៍នគរបាលរដ្ឋបាលស្រែជិៈ បានសហការគ្នាចុះបង្រ្កាបទីតាំងរោងសិប្បកម្មកែច្នៃផល-អនុផលព្រៃឈើ និងធ្វើសន្និធិផល-អនុផលព្រៃឈើ ចំនួន ០១ កន្លែង ដែលគ្មានលិខិតអនុញ្ញាតពីរដ្ឋបាលព្រៃឈើ ស្ថិតនៅត្រង់ចំណុចនិយាមកា៦៦០៣៤៤-១៤៣១៣២៧ ក្នុងភូមិសាស្រ្តភូមិស្រែរុង ឃុំស្រែជិះ ស្រុក​អូរគ្រៀងសែនជ័យ ខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដដែលបានបន្តឱ្យដឹងថា ក្នុងប្រតិបត្តិការណ៍នោះ សមត្ថកិច្ចចម្រុះបានចាប់ឃាត់វត្ថុតាងល្មើស ដូចជា៖
– តួម៉ាស៊ីនបញ្ឈរ ចំនួន០១គ្រឿង
– តុឈូស ចំនួន០១
– ម៉ាស៊ីនគោយន្ត២២សេស ចំនួន០១គ្រឿង
– ធុងខ្យល់ ចំនួន០១គ្រឿង
– រណារថាស ចំនួន០១
– ម៉ូទូរឈូស ចំនួន០១គ្រឿង
– ម៉ូទ័រលក ចំនួន០២គ្រឿង
– ម៉ូទ័រកាត់ ចំនួន០២គ្រឿង
– ម៉ូទ័រខាត់ ចំនួន០២គ្រឿង និងឈើអារលេខ១ (សុក្រម) ចំនួន ៥១ដុំ ស្មើនឹង១.២៤៤ (មួយម៉ែត្រត្រីគុណពីររយសែសិបបួន) និងដោយគ្មានម្ចាស់ទទួលខុសត្រូវ (អញ្ញាតជន)។

វត្ថុតាងល្មើសបានប្រគល់ជូនលោក រុន តូនី នាយសង្កាត់រដ្ឋបាលព្រៃឈើរលួសមានជ័យ យកមករក្សាទុកក្នុងបរិវេណសង្កាត់រដ្ឋបាលព្រៃឈើរលួសមានជ័យ ដើម្បីថែរក្សាទុកជាបណ្តោះអាសន្ន ស្ថិតនៅភូមិប៉ាក្លែ ឃុំរលួសមានជ័យ ស្រុកអូរគ្រៀងសែនជ័យ ខេត្តក្រចេះ ។

ពាក់ព័ន្ធជុំវិញករណី សមត្ថកិច្ចខេត្តក្រចេះចុះបង្ក្រាបទីតាំងសិប្បកម្មគ្រឿងសិង្ហារឹមធ្វើពីឈើធម្មជាតិដុះស្លែមួយកន្លែង ស្ថិតនៅឃុំស្រែជិះ ស្រុកអូរក្រៀងសែនជ័យ ខេត្តក្រចេះ កម្ពុជាថ្មីបានធ្វើការទាក់ទង់ទៅលោក ទ្រី សុភក្ត្រ័ ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តក្រចេះ និងលោក គា ប៊ូ ប្រធានមន្ទីរបរិស្ថានខេត្តក្រចេះ ប៉ុន្តែ​គ្មានអ្នកទទួលនិងឆ្លើយតបឡើយរហូតមកដល់វេលាម៉ោង ២:៤០នាទីថ្ងៃទី០៤ ខែធ្នូ ឆ្នាំ២០២៥នេះ៕

អត្ថបទ៖ ប្រុញ វិធិន