ស្ថានទូតអាមេរិកព្រមានពលរដ្ឋខ្លួន​ឲ្យ​នៅឆ្ងាយ​យ៉ាងហោច​៥០​គ.ម ពីព្រំដែនកម្ពុជា-ថៃ

ស្ថានទូតអាមេរិកប្រចាំនៅប្រទេសថៃ បានចេញសេចក្តីប្រកាសអាសន្នផ្នែកសន្តិសុខដ៏កម្រ និងបន្ទាន់មួយ ដោយព្រមានពលរដ្ឋ​ខ្លួន​ឲ្យ​នៅ​ឆ្ងាយពីព្រំដែនថៃ–កម្ពុជាយ៉ាងតិច៥០​គីឡូម៉ែត្រ ខណៈដែលការប៉ះទង្គិចគ្នាដោយអាវុធរវាងប្រទេសជិតខាងទាំងពីរនៅតែបន្តកើនឡើង។

សេចក្តីជូនដំណឹងដែលបានចេញផ្សាយនៅថ្ងៃទី៨ខែធ្នូ​ឆ្នាំ​២០២៥ បានលើកឡើងថា របាយការណ៍ស្តីពីការបាញ់កាំភ្លើងធំ និងធុន​តូចបានកើនឡើងនៅ​តាម​តំបន់ព្រំដែនជាច្រើន ដោយភាគីទាំងពីរបានចោទប្រកាន់គ្នាទៅវិញទៅមកពីការវាយប្រហារឆ្លងដែន។ សេចក្តីជូនដំណឹងនេះបានពិពណ៌នាអំពីស្ថានភាពថា «ប្រែប្រួល​ឆាប់​រហ័ស» ហើយបានកត់សម្គាល់ថា រដ្ឋាភិបាល​អាមេរិកមានសមត្ថភាពមានកម្រិត ក្នុងការផ្តល់ជំនួយសង្គ្រោះបន្ទាន់នៅក្នុងខេត្តដែលរងផលប៉ះពាល់។

ស្ថានទូតបានថ្លែងថា «ពលរដ្ឋ​អាមេរិកគួរតែចៀសវាងរាល់ការធ្វើដំណើរក្នុងរង្វង់​ដី​៥០​គីឡូម៉ែត្រពីព្រំដែនថៃ–កម្ពុជា ដោយសារតែមានអរិភាពសកម្ម និងស្ថានភាពសន្តិសុខដែលមិនអាចទាយទុកជាមុនបាន»។

សេចក្តីណែនាំនេះបានជំរុញ​ឲ្យ​ជនជាតិអាមេរិកដែលរស់នៅ ឬធ្វើដំណើរនៅភាគខាងជើង និងខាងកើតប្រទេសថៃ អនុវត្តតាមការណែនាំពីកងកម្លាំងសន្តិសុខថៃ តាមដានសេចក្តីប្រកាសក្នុងតំបន់ និងធ្វើបច្ចុប្បន្នភាពផែនការសង្គ្រោះបន្ទាន់ផ្ទាល់ខ្លួនរបស់ពួកគេ។ ស្ថានទូត​បានអះអាងសាជាថ្មីថា ស្ថានភាពអាចនឹងកាន់តែអាក្រក់ទៅៗយ៉ាងឆាប់រហ័ស ខណៈដែលការប្រយុទ្ធគ្នារីករាលដាលពាសពេញ​តំបន់​​ព្រំដែនជាច្រើន។

អរិភាពរវាងកងកម្លាំងកម្ពុជា និងថៃបានកើនឡើងក្នុងប៉ុន្មានថ្ងៃថ្មីៗនេះ ដែលបង្ក​ឲ្យ​មានការព្រួយបារម្ភពីបណ្តារដ្ឋាភិបាលក្នុងតំបន់ និងដៃគូអន្តរជាតិជុំវិញហានិភ័យនៃជម្លោះកាន់តែរីកធំ៕

ប្រែសម្រួល៖ ឈាង