អាជ្ញាធរខេត្តក្រចេះ ណែនាំឱ្យកងកម្លាំងត្រៀមអន្តរាគមន៍​បង្ការ​ករណី​កើតមាន​អគ្គិភ័យ

លោក ហង្ស ចាន់ឌី អភិបាលរងខេត្តក្រចេះបានជម្រុញណែនាំឱ្យកងកម្លាំងនគរបាលនៃស្នងការដ្ឋាននគរបាលខេត្ត ត្រូវត្រួតពិនិត្យបច្ចេកទេស និងត្រៀមរថយន្តពន្លត់អគ្គិភ័យ និងកងកម្លាំងជាប្រចាំក្នុងកិច្ចការជួយអន្តរាគមន៍ និងចុះផ្សព្វ​ផ្សាយអប់រំណែនាំដល់ប្រជាពលរដ្ឋឱ្យយល់ដឹង និងចេះបង្កា ការពារ ពីករណីភ្លើងឆេះផ្ទះ និងចេះរក្សាទុកដាក់នូវឯកសារសំខាន់ៗមួយចំនួន ដូចជា សៀវភៅស្នាក់នៅ សៀវភៅគ្រួសារ អត្តសញ្ញាណប័ណ្ណ សំបុត្រកំណើត នៅកន្លែងដែលមានសុវត្ថិភាព ជៀសវាងបាត់បង់ជាយថាហេតុ ជាពិសេស ពលរដ្ឋរស់នៅតាមជនបទដាច់ស្រយាល។

ការណែនាំខាងលើធ្វើឡើងក្នុងឱកាសដែលលោក ហង្ស ចាន់ឌី អភិបាលរងខេត្ត ចូលរួមក្នុងពិធីសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការ ប្រចាំឆ្នាំ២០២៥ និងដាក់ចេញទិសដៅការងារ ឆ្នាំ២០២៦ របស់ស្នងការរដ្ឋាននគរបាលខេត្តក្រចេះ នាថ្ងៃទី១១ ខែធ្នូ ឆ្នាំ២០២៥ ម្សិលម៉ិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ស្នងការដ្ឋាននគរបាលខេត្តក្រចេះ នៅក្នុងឆ្នាំ២០២៥ គ្រោះអគ្គិភ័យបានកើតឡើងចំនួន ២២ លើក បើប្រៀបធៀបនឹងឆ្នាំ២០២៤ មានការថយចុះ ៨លើក ស្មើនឹង ២៧% បណ្តាលឲ្យស្លាប់មនុស្សចំនួន ៣នាក់ ស្រី ២នាក់, ឆេះផ្ទះ ចំនួន ១៥ខ្នង, ក្រុមហ៊ុនកែច្នៃកង់ឡានចាស់ៗ ១កន្លែង, ហាងបាយ ១កន្លែង, សាលាឆាន់ ១ខ្នង, កុដិ ២ខ្នង, ឡចំហុយថ្នាំជក់ ១កន្លែង, ឡសម្អាតជ័រកៅស៊ូ ១កន្លែង និងសម្ភារៈ ថវិកាមួយចំនួនទៀត៕

អត្ថបទ៖ ប្រុញ វិធិន