ព័ត៌មានជាតិ

ពលរដ្ឋខ្មែរនៅជប៉ុនធ្វើបាតុកម្មប្រឆាំងការឈ្លានពានរបស់ថៃលើកម្ពុជា

បានផុស

៥ ខែ មុន

នៅ

ថ្ងៃអាទិត្យ ១៤ ធ្នូ ២០២៥

ដោយ

ប្រជាជនខ្មែរប្រមាណ៥០០នាក់រួមគ្នាធ្វើបាតុកម្មនៅប្រទេសជប៉ុន ប្រឆាំងនឹងការឈ្លានពានរបស់ថៃលើទឹកដីកម្ពុជា។ ក្រុមអ្នកតវ៉ាក៏បានដាក់ញាត្តិទៅកាន់រដ្ឋាភិបាលជប៉ុន ស្ថានទូតអាមេរិក ស្ថានទូតស៊ុយអែត និងតំណាងសហភាពអឺរ៉ុបប្រចាំនៅប្រទេសជប៉ុនផងដែរ។

បាតុកម្មនេះដឹកនាំដោយប្រធានសមាគមជនជាតិខ្មែររស់នៅប្រទេសជប៉ុនលោក ហៃ វណ្ណា នៅទីក្រុងតូក្យូ ថ្ងៃទី១៤ ខែធ្នូ ឆ្នាំ២០២៥ នេះដោយជំរុញឱ្យថៃបញ្ឈប់ជាបន្ទាន់នូវការវាយប្រហារលើកម្ពុជា ងាកមកបន្តការសន្ទនាការទូតឡើងវិញស្វែងរកដំណោះស្រាយដោយសន្តិវិធីរវាងប្រទេសទាំងពីរ។ ជំរុញការដោះលែងទាហានខ្មែរទាំង១៨នាក់។

បាតុកម្មនេះក៏ចង់បង្ហាញការពិតអំពីការឈ្លានពានរបស់កងទ័ពថៃលើប្រទេសកម្ពុជា និងការឈឺចាប់នៃសង្គ្រាមឈ្លានពាននេះដល់សហគមន៍អន្តរជាតិផងដែរ។

បាតុករអហិង្សាបានជួបជុំគ្នាបញ្ចេញមតិយោបល់ ចាក់បញ្ជាំងវីដេអូពីការឈឺចាប់របស់ជនភៀសខ្លួន និងជនរងគ្រោះពីសង្គ្រាម ដើរដង្ហែរក្បួនសួនហ៊ីប៊ីយ៉ា (Hibiya Park) ឆ្លងកាត់តំបន់ជុំវិញ ស្ថានីយរថភ្លើងតូក្យូ ដោយមានការចែកខិតប័ណ្ណ ពន្យល់អំពី ការឈ្លានពានរបស់កងទ័ពថៃ ព្រមទាំងបង្កើតមូលនិធិសម្រាប់ជួយដល់ជនភៀសខ្លួនផងដែរ។

ពួកគេសង្ឃឹមថារាជរដ្ឋាភិបាលជប៉ុន ដែលមានចិត្តស្រឡាញ់សន្តិភាព នឹងចូលរួមជំរុញឱ្យប្រទេសថៃ បញ្ឈប់សង្គ្រាមនេះជាបន្ទាន់ និងបន្តការសន្ទនាការទូត ដើម្បីកសាងសន្តិភាព និងផ្តល់នូវសេចក្តីសុខ សេចក្តីចម្រើន និងការរស់នៅដោយសុខដុមរមនា ដល់ប្រជាជនស្លូតត្រង់នៃប្រទេសកម្ពុជា និងថៃ។

ប្រទេសថៃបើកការបាញ់ប្រហារជាថ្មីលើកម្ពុជានៅថ្ងៃទី៧ ខែធ្នូ ដោយប្រើប្រាស់អាវុធធុនធ្ងន់ និងយន្តហោះទម្លាក់គ្រាប់បែកមកលើកម្ពុជាបំពានលើកិច្ចព្រមព្រៀងសន្ដិភាពជាមួយកម្ពុជា។ ទោះបីជាមានការសម្របសម្រួលពីប្រធានាធិបតីអាមេរិកដើម្បីបញ្ចប់សង្គ្រាមនេះក្ដី ក៏ថៃនៅតែបន្តសង្គ្រាមកាន់តែខ្លាំងឡើងលើកម្ពុជាថែមទៀតរហូតមកដល់ថ្ងៃទី១៤ ខែធ្នូនេះ។ អំពើឈ្លានពាននេះបានសម្លាប់ពលរដ្ឋខ្មែរចំនួន១១នាក់ និងរងរបួសមនុស្សចំនួន៧៦នាក់ ខណៈរាប់ម៉ឺននាក់ផ្សេងទៀតត្រូវភៀសខ្លួនទៅកាន់ទីតាំងសុវត្ដិភាព។

នាយករដ្ឋមន្ត្រីចាំផ្ទះថៃ អនុទីន បានសរសរលើហ្វេសបុករបស់ខ្លួនកាលពីព្រឹកថ្ងៃទី១៣ ខែធ្នូថា ថៃនឹងបន្តសកម្មភាពយោធាលើកម្ពុជារហូតដល់ពេលដែលមានអារម្មណ៍ថាគ្មានការគំរាមកំហែងទឹកដី និងប្រជាជនថៃ។ បន្ថែមលើនេះសារព័ត៌មានថៃក៏បានដកស្រង់សំដីរបស់នាយករដ្ឋមន្ត្រីនេះមកចុះផ្សាយផងដែរថា «ពេលនេះថៃមិនត្រូវការស្ដាប់អ្នកណាទាំងអស់»៕