ព័ត៌មានជាតិ

លោកជំទាវបណ្ឌិត ពេជ ចន្ទមុន្នី ដឹកនាំចលនាដាំបន្លែបង្ការ ដើម្បីយកទៅផ្គត់ផ្គង់សមរភូមិមុខ

បានផុស

៤ ខែ មុន

នៅ

ថ្ងៃពុធ ១៧ ធ្នូ ២០២៥

ដោយ

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា នៅព្រឹកថ្ងៃទី ១៧ ខែធ្នូ នេះ បានអញ្ជើញចូលជាអធិបតីក្នុងកម្មវិធី ចលនា “យើងរួមគ្នាដើម្បីជាតិ” ស្ថិតនៅសាលាបឋមសិក្សាភ្នំពេញថ្មី រាជធានីភ្នំពេញ ដោយមានការចូលរួមពីសមាជិកសមាជិកាកាយឫទ្ធិនារីកម្ពុជា និងលោកគ្រូ អ្នកគ្រូ សិស្សានុសិស្ស ចូលរួមដាំបន្លែបង្ការនៅក្នុងបរិវេណសាលារៀន។

នៅក្នុងពិធីនេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានថ្លែងថា បន្ទាប់ពីប្រទេសថៃបានចូលឈ្លានពានទឹកដីប្រទេសកម្ពុជា បានធ្វើឲ្យពលរដ្ឋខ្មែរនៅជាប់ព្រំដែនជាបន្តបន្ទាប់ត្រូវបង្ខំចិត្តចាកចេញពីផ្ទះសំបែង ដែលធ្វើឲ្យចំនួនជនភៀសសឹកមានការកើនឡើងពីមួយថ្ងៃទៅមួយថ្ងៃ ម្ល៉ោះហើយ ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការផ្គត់ផ្គង់ស្បៀងអាហារដល់ជនភៀសសឹក និងវីរកងទ័ពកម្ពុជា ទើបលោកជំទាវបានណែនាំឲ្យសាខាកាយឫទ្ធិនារីកម្ពុជាទាំងអស់ បំផុសបំផុលសកម្មភាពធ្វើការចាប់ផ្ដើមដាំបន្លែ នៅតាមសាលារៀន វត្តអារាម និងសហគមន៍ ដើម្បីយកបន្លែទាំងអស់នេះទៅសមរភូមិជួរមុខ និងជនភៀសសឹក។ លើសពីនេះ លោកជំទាវបណ្ឌិត ពេជ ចន្ទមុន្នី បានលើកទឹកចិត្តដល់សិស្សានុសិស្សដែលបានចូលរួមដាំបន្លែនៅសាលាបឋមសិក្សាភ្នំពេញ ត្រូវចូលរួមថែទាំបន្លែឲ្យបានល្អ។

លោកគ្រូ និងសិស្សនៅសាលាបឋមសិក្សាភ្នំពេញ បានប្ដេជ្ញាថែទាំបន្លែបង្ការឲ្យបានដិតដល់ ដូចជាស្រោចទឹក និងដាក់ជី ដើម្បីឆាប់ធំយកទៅចែកជូនដល់ទ័ពកម្ពុជា និងជនភៀសសឹក។ សាលាបឋមសិក្សាភ្នំពេញថ្មី មានបន្លែបង្ការជាច្រើនប្រភេទដែលអាចឆាប់ប្រមូលផលបាន ក្នុងនោះមានដូចជា ៖ ត្រកួន ស្ពៃតឿ ស្ពៃជើងទា និងសាឡាត់ជាដើម។

គួរបញ្ជាក់ដែរថា ចលនា “យើងរួមគ្នាដើម្បីជាតិ” ផ្ដួចផ្ដើមគំនិតដោយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ក្នុងគោលបំណងផុសសកម្មភាពដាំបន្លែដែលអាចឆាប់ប្រមូលផលបាននៅតាមសាលារៀន ផ្ទះសំបែង វត្តអារាម និងដីសហគមន៍ សំដៅកសាងកសិផលជាតិ ដើម្បីទ្រទ្រង់ដល់វីរកងទ័ព វីរនគរបាលជួរមុខការពារព្រំដែន និងជនភៀសសឹកដោយសារការឈ្លានពានពីប្រទេសថៃ៕