ខេត្តភាគខាងត្បូងចំនួន៧​របស់ថៃ ប្រឈម​ហានិភ័យនៃទឹកជំនន់ និងបំណាក់ដី

នាយកដ្ឋានឧតុនិយមថៃបានព្រមានពីស្ថានភាពភ្លៀងធ្លាក់ពីកម្រិតខ្លាំងទៅខ្លាំងបំផុត និងមានខ្យល់បោកបក់នៅទូទាំងខេត្តភាគខាងត្បូងចំនួន៧ ចាប់ពីថ្ងៃទី២៥ ដល់ថ្ងៃទី២៨ ខែធ្នូ ដែលបង្ក​ឲ្យ​មានហានិភ័យនៃទឹកជំនន់ឆាប់រហ័ស ការហក់ឡើងនៃទឹកទន្លេ និងការបាក់ដីនៅតំបន់ភ្នំ។

យោង​តាម Khaosod នៅក្នុងព្រឹត្តិបត្រព័ត៌មាន​ដែលចេញដោយមជ្ឈមណ្ឌលឧតុនិយមភាគខាងត្បូង អាជ្ញាធរបានលើកឡើងថា ខ្យល់មូសុងភាគឦសានដែលកំពុងមានឥទ្ធិពលខ្លាំង កំពុងគ្របដណ្តប់លើឈូងសមុទ្រថៃ បណ្តាខេត្តភាគខាងត្បូង និងសមុទ្រអង់ដាម៉ង់ ដែលនាំមកនូវភ្លៀងធ្លាក់កាន់តែខ្លាំង ជាពិសេសនៅប៉ែកខាងកើតនៃ​តំបន់​ភាគខាងត្បូង។

នៅថ្ងៃទី២៥ ខែធ្នូ ភ្លៀងធ្លាក់ពីកម្រិតខ្លាំងទៅខ្លាំងបំផុត ត្រូវបានព្យាករថានឹងកើតមាននៅផ្នែកខ្លះនៃខេត្ត Nakhon Si Thammarat, Phatthalung, Songkhla, Pattani, Yala និង Narathiwat។ ចាប់ពីថ្ងៃទី២៦ ដល់ថ្ងៃទី២៨ ខែធ្នូ តំបន់ដែលរងផលប៉ះពាល់ត្រូវបានរំពឹងថានឹងរីករាលដាលបន្ថែមដល់ខេត្ត Surat Thani រួមជាមួយខេត្តដែលបានរៀបរាប់ខាងលើផងដែរ។

នាយកដ្ឋានបានជំរុញ​ឲ្យ​ប្រជាពលរដ្ឋមានការប្រុងប្រយ័ត្នខ្ពស់ចំពោះគ្រោះថ្នាក់ដែលបង្កឡើងដោយផ្គររន្ទះ និងខ្យល់កន្ត្រាក់ ដោយព្រមានថា ភ្លៀងធ្លាក់ខ្លាំងជាប់ៗគ្នាអាចបង្កឲ្យមានទឹកជំនន់ឆាប់រហ័ស ការហូរយ៉ាង​គំហុកនៃទឹក និងការបាក់ដី ជាពិសេសនៅតំបន់ដីភ្នំ។

ស្ថានភាពតាមលំហសមុទ្រក៏ត្រូវបានរំពឹងថានឹងមានសភាពអាក្រក់ផងដែរ។ រលកសមុទ្រនៅផ្នែកខាងក្រោមនៃឈូងសមុទ្រថៃ ត្រូវបានព្យាករថាអាចឡើងដល់កម្ពស់ប្រហែល២ម៉ែត្រ ហើយអាចខ្ពស់ជាងនេះក្នុងកំឡុងពេលមានផ្គររន្ទះ។ អ្នកនេសាទ និងអ្នកបើកបរទូកតូចៗត្រូវបានណែនាំឲ្យបង្កើនការប្រុងប្រយ័ត្ន និងជៀសវាងការធ្វើដំណើរតាមសមុទ្រក្នុងតំបន់ដែលមានព្យុះ៕

ប្រែសម្រួល៖ ឈាង