កម្ពុជាបន្តដាក់ឱ្យប្រើសាកល្បងប្រព័ន្ធ Cambodia v-Pass សម្រាប់អ្នកដំណើរបរទេស

អគ្គនាយកដ្ឋានអន្តោប្រវេសន៍ បានបន្តដាក់ឱ្យប្រើប្រាស់សាកល្បងប្រព័ន្ធ Cambodia v-Pass (Visitor Pass) ដើម្បីជំនួសការប្រើប្រាស់ត្រាជំនាញអន្តោប្រវេសន៍ ឬស្ទីកឃ័រ QR Code សម្រាប់អ្នកដំណើរជនបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបន្តដាក់ឱ្យប្រើប្រាស់ប្រព័ន្ធនេះ ដើម្បីចូលរួមអនុវត្តគោលនយោបាយអភិវឌ្ឍសេដ្ឋកិច្ច-សង្គមឌីជីថល និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា។ អគ្គនាយកដ្ឋានអន្តោប្រវេសន៍ លើកឡើងដូច្នេះក្នុងសេចក្ដីជូនដំណឹងមួយចុះថ្ងៃទី១ ខែមករា ឆ្នាំ២០២៦។

បើតាមសេចក្ដីជូនដំណឹងខាងលើ ប្រព័ន្ធ Cambodia v-Pass នេះ គឺសម្រាប់អ្នកដំណើរបរទេសទាំងអស់ដែលចូល-ចេញប្រទេសកម្ពុជា តាមច្រកទ្វារអាកាសយានដ្ឋានអន្តរជាតិ និងនៅច្រកទ្វារកំពង់ផែអន្តរជាតិ ដោយអ្នកដំណើរបរទេស អាចទាញយកព័ត៌មាន Cambodia v-Pass របស់ខ្លួនបាន តាមរយៈសារអេឡិចត្រូនិច (E-mail) គេហទំព័រផ្លូវការ Cambodia e-Arrival (https://arrival.gov.kh) និងតាមកម្មវិធីទូរស័ព្ទដៃរបស់ Cambodia e-Arrival៕