កូរ៉េខាងជើង បាញ់មីស៊ីលផ្លោងច្រើនគ្រាប់ ចំពេលត្រាំចាប់ខ្លួនលោកម៉ាឌូរ៉ូ 

កូរ៉េខាងជើងបានបាញ់មីស៊ីលផ្លោងជាច្រើនគ្រាប់ ឆ្ពោះទៅសមុទ្រខាងកើតនាថ្ងៃអាទិត្យទី៤ ខែមករា ដែលជាការបង្ហាញសាកល្បងអាវុធលើកដំបូងនៅដើមឆ្នាំ២០២៦។ ការបាញ់មីស៊ីលនេះកើតឡើងចំពេល លោក ដូណាល់ ត្រាំ ប្រកាសចាប់ខ្លួនមេដឹកនាំវ៉េណេស៊ុយអេឡា Nicolas Maduro និងស្របពេលប្រធានាធិបតី Lee Jae Myung គ្រោងនឹងចាកចេញទៅកាន់ទីក្រុងប៉េកាំង សម្រាប់កិច្ចពិភាក្សាជាមួយប្រធានាធិបតីចិន ស៊ីជិន ពីង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម koreatimes. អគ្គសេនាធិការចម្រុះ (JCS) នៃកូរ៉េខាងត្បូងបាននិយាយថា ខ្លួនបានរកឃើញមីស៊ីលដែលបានបាញ់ចេញពីជិតទីក្រុងព្យុងយ៉ាងនៅម៉ោងប្រហែល ៧:៥០ ព្រឹក។

JCS បានបញ្ចាក់បន្ថែមថា យោធារបស់យើងរក្សាជំហរត្រៀមខ្លួនយ៉ាងរឹងមាំ ហើយចែករំលែកព័ត៌មានមីស៊ីលផ្លោងរបស់កូរ៉េខាងជើងយ៉ាងជិតស្និទ្ធជាមួយភាគីសហរដ្ឋអាមេរិក និងជប៉ុន ចំពេលមានជំហរឃ្លាំមើលកាន់តែខ្លាំងប្រឆាំងនឹងការបាញ់បន្ថែម។

កូរ៉េខាងជើងបានបាញ់មីស៊ីលផ្លោងចម្ងាយខ្លីចុងក្រោយ ឆ្ពោះទៅសមុទ្រខាងកើតកាលពីថ្ងៃទី ៧ ខែវិច្ឆិកា ដែលជាការបាញ់មីស៊ីលផ្លោងលើកទី៦របស់កូរ៉េខាងជើងកាលពីឆ្នាំមុន។

យ៉ាងណាមិញ អ្នកជំនាញបានវាយតម្លៃថា ប្រតិបត្តិការយោធារបស់សហរដ្ឋអាមេរិក អាចជំរុញឲ្យប្រទេសកូរ៉េខាងជើងបាញ់មីស៊ីលទាំងនោះជាការតវ៉ាជាក់ស្តែងមួយ។

លោក Lim Eul-chul សាស្ត្រាចារ្យនៅវិទ្យាស្ថានសម្រាប់ការសិក្សាចុងបូព៌ានៃសាកលវិទ្យាល័យ Kyungnam បាននិយាយថា ការវាយប្រហាររបស់សហរដ្ឋអាមេរិកនៅវ៉េណេស៊ុយអេឡា និងការចាប់ខ្លួនប្រធានាធិបតី Maduro អាចនឹងផ្ញើសារដ៏មានឥទ្ធិពលមួយទៅកាន់លោក Kim Jong-un ដែលជាការគំរាមកំហែងដល់អត្ថិភាព និងជាសារស្តីពីយុត្តិកម្មនៃការប្រកាន់ខ្ជាប់នូវអាវុធនុយក្លេអ៊ែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ត្រាំ នឹងគ្រប់គ្រង វ៉េណេស៊ុយអេឡា រហូតដល់សុវត្ថិភាពពេញលេញ