សេដ្ឋកិច្ច

កម្ពុជារកចំណូលបានជាង $៦០០ លាន ពីការនាំចេញដំឡូងមី នៅឆ្នាំ ២០២៥

បានផុស

៤ ខែ មុន

នៅ

ថ្ងៃសុក្រ ៩ មករា ២០២៦

ដោយ

កម្ពុជារកប្រាក់ចំណូលបាន ៦៤៦ លានដុល្លារ ពីការនាំចេញដំឡូងមី នៅក្នុងឆ្នាំ ២០២៥ ខណៈមន្ត្រីក្រសួងពាណិជ្ជកម្មបានអះអាងថា កម្ពុជាបានបង្កើនការកែច្នៃលើកកម្ពស់គុណភាពដំឡូងមីស្របតាមតម្រូវការទីផ្សារ។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍នៅថ្ងៃទី ០៨ ខែមករា ឆ្នាំ ២០២៦ថា ការអនុវត្តគោលនយោបាយជាតិស្ដីពីស្វាយចន្ទី ២០២០-២០២៥ ទទួលបានលទ្ធផលវិជ្ជមាន ទាំងផលិតកម្ម ការកែច្នៃ និងការនាំចេញ ដែលអាចរក្សាបានឧត្តមភាពប្រកួតប្រជែង។

នៅក្នុងឆ្នាំ ២០២៥ ក្រសួងពាណិជ្ជកម្មបានជំរុញ និងពង្រីកទីផ្សារនាំចេញដំឡូងមីរហូតដល់ប្រមាណ ១០ លានតោន ទៅកាន់ទីផ្សារអន្តរជាតិ។

កសិកររស់នៅស្រុកបាណន់ ខេត្តបាត់ដំបង លោក ឈៀង ភ័ណ្ឌ បានឲ្យដឹងថា លោកបានប្រមូលផលដំឡូងមីតាំងពីដើមខែ១ ឆ្នាំ២០២៦ ហើយលោកក៏បានលក់អស់ដែរ។

លោក ឈៀង ភ័ណ្ឌបានបញ្ជាក់ថា ឆ្នាំនេះបានចំណូលគ្រាន់បើជាងឆ្នាំទៅ ដោយសារតែមើមដាក់ម្សៅបានល្អ ហើយក៏ជាតម្រូវការទីផ្សារផងដែរ ខណៈតម្លៃកើនជាងឆ្នាំមុនគ្រាន់បើ ហើយលោកកំពុងធ្វើដីហាលដើម្បីធ្វើការដាំបន្តទៀត។

តម្លៃទីផ្សារដែលឈ្មួញទទួលទិញតាមស្រុកមានដូចជា ស្រុកសំឡូត មើមស្រស់តម្លៃ ២០០ រៀល ក្នុងមួយគីឡូក្រាម និងមើមស្ងួតលក់បាន ៥៨០ រៀលក្នុង ១ គីឡូក្រាម។ ស្រុកគាស់ក្រឡ មើមស្រស់តម្លៃ ១៨០ រៀល ក្នុង ១គីឡូក្រាម មិនមានលក់មើមស្ងួតនោះទេ។

លោក អិល ឈិញ ប្រធានសមាគមកសិករដំឡូងមីខ្មែរ ប្រាប់កម្ពុជាថ្មីថា តម្លៃទីផ្សារដំឡូងមីនៅតែជាបញ្ហាចោទសម្រាប់កសិករ តម្លៃដំឡូងមីស្រស់បន្តស្ថិតក្នុងកម្រិតទាប ១៥០ រៀល ទៅ ២៥០ រៀលក្នុងមួយគីឡូក្រាម ខណៈកសិករភាគច្រើនធ្វើក្រៀម លក់ឱ្យសៃឡូបានតម្លៃពី ៥៨០ រៀល ទៅ ៦២០ រៀល ក្នុងមួយគីឡូក្រាម។ បច្ចុប្បន្នទីផ្សារនាំចេញដំឡូងមីកម្ពុជា មានប្រទេសវៀតណាម ចិន និងការប្រើប្រាស់ក្នុងស្រុក៕

អត្ថបទ៖ ឡេង ដេត