ព័ត៌មានជាតិ

សម្តេច ម៉ែន សំអន បួងសួងសុំសេចក្តីសុខ សេចក្តីចម្រើនជូនដល់ថ្នាក់ដឹកនាំ វីរកងទ័ព និងពលរដ្ឋកម្ពុជាទូទាំងប្រទេស

បានផុស

៣ ខែ មុន

នៅ

ថ្ងៃចន្ទ ១២ មករា ២០២៦

ដោយ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានបួងសួងសុំសេចក្តីសុខ សេចក្តីចម្រើនជូនដល់ប្រមុខដឹកនាំ ក៏ដូចជាវីរកងទ័ព និងពលរដ្ឋកម្ពុជាទូទាំងប្រទេស ជារៀងរហូត។

សម្តេចកិត្តិសង្គហបណ្ឌិត ម៉ែន សំអន បួងសួងបែបនេះ ខណៈពេលអញ្ជើញថ្វាយគ្រឿងសក្ការៈ និងថ្វាយបង្គំសម្តេចព្រះឧត្តមបញ្ញា កិត្តិបណ្ឌិត ដូង ផង់ នន្ទិយោ ព្រះអនុប្រធានថេរសភាព្រះពុទ្ធសាសនាកម្ពុជា ព្រះអគ្គាធិការរង នៃអគ្គាធិការដ្ឋានពុទ្ធិកសិក្សាជាតិ និងជាព្រះចៅអធិការវត្តព្រែកប្រាំង ស្ថិតក្នុងស្រុកពញាឮ ខេត្តកណ្តាល នាព្រឹកថ្ងៃចន្ទ ៩រោច ខែបុស្ស ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី១២ ខែមករា ឆ្នាំ២០២៦។

ក្នុងពិធីនោះផងដែរក៏បានការអញ្ជើញចូលរួមពីសំណាក់ អ្នកឧកញ៉ា អ៉ឹង ស៊ីស្រ៊ន លោកស្រីឧត្ដមសេនីយ៍ឯក តុប សារ៉ន លោកស្រី ភឹម សំភ័ស ព្រមទាំង ឯកឧត្តម លោកជំទាវ លោក លោកស្រីច្រើននាក់ ដែលបានញាំងឲ្យកម្មវិធីដំណើរទៅដោយរលូន។

សម្តេចកិត្តិសង្គហបណ្ឌិត បាននាំយកនូវទេយ្យវត្ថុ ប្រគេនសម្តេចសង្ឃ រួមមាន ទឹកសុទ្ធ មី ទឹកដោះគោ ផ្លែឈើ ទឹកក្រូច ស្ករស ត្រីងៀត សាច់ក្រក និងបច្ច័យមួយចំនួន។

សម្តេចកិត្តិសង្គហបណ្ឌិត បានបួងសួងថ្វាយព្រះពរជ័យព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ ប្រគេនពរដល់ព្រះសង្ឃគ្រប់ព្រះអង្គ និងសូមគោរពជូនពរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ថ្នាក់ដឹកនាំ សមាជិក សមាជិកា ព្រឹទ្ធសភា រដ្ឋសភា មន្ត្រីរាជការ ព្រមទាំងប្រជាពលរដ្ឋនៅទូទាំងប្រទេស សូមឲ្យជួបសេចក្តីសុខ សេចក្តីចម្រើន គ្រប់ក្រុមគ្រួសារ៕

អត្ថបទ ៖ វិមាន

Related Topics:សម្តេច ម៉ែន សំអន