ព័ត៌មានអន្ដរជាតិ

ក្រសួងការបរទេសអាមេរិកត្រដាងសមិទ្ធផលខ្លះៗ ក្នុងខួប១ឆ្នាំនៃការវិលកាន់អំណាចរបស់ត្រាំ

បានផុស

៣ ខែ មុន

នៅ

ថ្ងៃពុធ ២១ មករា ២០២៦

ដោយ

ចាប់តាំងពី លោក ដូណាល់ ត្រាំ ឡើងកាន់ដំណែងជាលើកទី២មក សហរដ្ឋអាមេរិកបានសម្រេចនូវគោលដៅធំៗមួយចំនួន ដែលអាមេរិកគិតថាជាប្រយោជន៍សម្រាប់ប្រទេស។ ប៉ុន្តែបើក្រឡេកមើលការអនុវត្តន៍មួយចំនួនវិញ វាជាការសម្លាប់ប្រជាជននៅទូទាំងពិភពលោកដោយប្រយោលប៉ុណ្ណោះ ជាពិសេសអាមេរិកកាន់តែឃ្លាតឆ្ងាយពីប្រទេសនៅសហភាពអឺរ៉ុបជាបណ្តើរៗ។

ការចេញផ្សាយលើគេហទំព័ររបស់ក្រសួងការបរទេសរបស់សហរដ្ឋអាមេរិក ឱ្យដឹងថា កាលពីមួយឆ្នាំមុន លោកប្រធានាធិបតី ដូណាល់ ត្រាំ បានឡើងកាន់ដំណែងជាមួយនឹងអាណត្តិដើម្បីធ្វើឱ្យអាមេរិកអស្ចារ្យម្តងទៀត។ ចាប់តាំងពីពេលនោះមក លោកបានទទួលជ័យជម្នះ បន្ទាប់ពីឈ្នះបេះដូងប្រជាជនអាមេរិក។

ក្រសួងការបរទេសលើកឡើងថា៖«អាមេរិកបានដកហូតទិដ្ឋាការជាង១០ម៉ឺនពីជនបរទេសដែលភាគច្រើនពីអ្នកដែលប្រព្រឹត្តបទឧក្រិដ្ឋដូចជាការវាយដំ ចោរកម្ម និងការបើកបរក្រោមឥទ្ធិពលស្រវឹង ឬអ្នកដែលសាទរចំពោះអំពើហិង្សាលើជនជាតិអាមេរិក»។

ជាពិសេសបានចាត់តាំងអង្គភាព Cartel de Los Soles ជាអង្គការភេរវករបរទេស។ បន្ទាប់មក លោកប្រធានាធិបតី ដូណាល់ ត្រាំ បានបញ្ជាឱ្យចាប់ខ្លួន លោក នីកូឡាស ម៉ាឌូរ៉ូ [Nicolás Maduro] និង លោកស្រី Cilia Flores ដែលជាភេរវករដោយជោគជ័យ ក្នុងបទចោទក្នុងប្រតិបត្តិការជនភេរវករ។

ក្រសួងការបទេសឱ្យដឹងទៀតថា ការឆ្លងចូលតាមព្រំដែនភាគខាងត្បូងបានធ្លាក់ចុះ ៩៩ភាគរយ ចាប់តាំងពីខែមករា ចំពេលមានកិច្ចខិតខំប្រឹងប្រែងរបស់រដ្ឋាភិបាលទាំងមូលដើម្បីបញ្ឈប់រំហូរនៃការធ្វើចំណាកស្រុកដ៏ច្រើន មកកាន់សហរដ្ឋអាមេរិក។

ជាងនេះទៅទៀត ការចេញទិដ្ឋាការជនអន្តោប្រវេសន៍ត្រូវបានផ្អាកដល់ប្រទេសចំនួន៧៥ ជុំវិញពិភពលោក ខណៈដែលក្រសួងកំពុងពិនិត្យមើលឡើងវិញនូវនីតិវិធីត្រួតពិនិត្យ ដើម្បីធានាថាជនអន្តោប្រវេសន៍ថ្មីមិនបានបំពានលើទឹកចិត្តរបស់ប្រជាជនអាមេរិក ដោយប្រែក្លាយជាការចោទប្រកាន់សាធារណៈលើសហរដ្ឋអាមេរិក។

មិនតែប៉ុណ្ណោះ ក្រសួងការបរទេសបានសម្របសម្រួលការអនុវត្តផែនការសន្តិភាពរបស់ប្រធានាធិបតីនៅតំបន់ហ្គាហ្សា បញ្ចប់សង្រ្គាម ធានាការវិលត្រឡប់របស់ចំណាប់ខ្មាំង និងការបង្កើនលទ្ធភាពទទួលបានជំនួយមនុស្សធម៌។

ក្រសួងការបរទេសត្រូវបានរៀបចំឡើងវិញដើម្បីឆ្លើយតបនឹងបញ្ហាប្រឈមនៃសតវត្សទី២១ ការផ្តល់សិទ្ធិអំណាចដល់ស្ថានទូត និងការិយាល័យក្នុងតំបន់ សម្រួលជំនួយឆ្លើយតបគ្រោះមហន្តរាយ ការលុបបំបាត់ការិយាល័យក្នុងស្រុកស្ទើរតែ ៤៥ភាគរយ និងការរៀបចំឡើងវិញនូវក្រសួងការបរទេសដើម្បីបម្រើផលប្រយោជន៍អាមេរិក។

តាមការណែនាំរបស់ប្រធានាធិបតី ត្រាំ ក្រសួងការបរទេសបានផ្តួចផ្តើមឱ្យសហរដ្ឋអាមេរិកដកខ្លួនចេញពីអង្គការអន្តរជាតិជាច្រើន។

លោក ត្រាំ សង្កត់ធ្ងន់ថា៖«ការដកខ្លួនចេញពីអង្គការទាំងនោះ គឺជាការល្អប្រសើរ ព្រោះពួកគេជាមនោគមវិជ្ជាបង្កឱ្យមានគ្រោះថ្នាក់ ខ្ជះខ្ជាយថវិកា និងធ្វើសកម្មភាពប្រឆាំងនឹងផលប្រយោជន៍របស់ប្រជាជនអាមេរិក»។

មិនតែប៉ុណ្ណោះ សហរដ្ឋអាមេរិកទទួលបានជោគជ័យក្នុងការចែករំលែកបន្ទុកជាមួយសម្ព័ន្ធមិត្តអឺរ៉ុប និងធានានៅក្នុងការប្តេជ្ញាចិត្តពីសមាជិកណាតូក្នុងការចំណាយ ៥ភាគរយនៃ GDP លើវិស័យការពារជាតិនៅឆ្នាំ ២០៣៥។ ការប្តេជ្ញាចិត្តនេះនឹងផ្តល់ផលចំណេញដល់ខ្ទង់ទ្រីលានដុល្លារជារៀងរាល់ឆ្នាំក្នុងការការពារ និងការវិនិយោគលើវិស័យការពារជាតិ។

គួរបញ្ជាក់ថា ភ្នាក់ងារអនុវត្តច្បាប់ដែលគាំទ្រដោយក្រសួងការបរទេសបានរឹបអូសថ្នាំញៀនម៉ាក methamphetamine ជិត ៣៥០តោន នៅម៉ិកស៊ិក លុបបំបាត់ដំណាំគ្រឿងញៀនខុសច្បាប់ជាង ៨០ ០០០ ហិកតាក្នុងប្រទេសប៉េរូ និងរឹបអូសបានកូកាអ៊ីន ៦៨៧.៧គីឡូក្រាម ក្នុងប្រទេស El Salvador ។

ជាពិសេសក្រសួងការបរទេសបានប្តូរឈ្មោះ«វិទ្យាស្ថានសន្តិភាពទៅជាវិទ្យាស្ថានសន្តិភាព Donald J. Trump» ដើម្បីឆ្លុះបញ្ចាំងពីសមិទ្ធផលដែលមិនធ្លាប់មានពីមុនមក របស់ប្រធានាធិបតីអាមេរិកក្នុងការបន្តបុព្វហេតុចែកចាយសន្តិភាពជុំវិញពិភពលោក។

ក្រសួងបានបន្តទៀតថា៖ «រដ្ឋបាល ត្រាំ នឹងបន្តផ្តល់ជ័យជម្នះសម្រាប់ប្រជាជនអាមេរិក ហើយតែងតែដាក់អាមេរិកជាអាទិភាពទី១ជានិច្ច»៕

ប្រែសម្រួល៖ ណឺ មិនា