កីឡា

ការប្រកួតកីឡាកុមារអូឡាំពិក ដំបូងនៅកម្ពុជាមានជិត ៨០០ ប្រកួត

បានផុស

៣ ខែ មុន

នៅ

ថ្ងៃចន្ទ ២៦ មករា ២០២៦

ដោយ

កម្ពុជានឹងរៀបចំព្រឹត្តិការណ៍ប្រកួតកីឡាកុមារអូឡាំពិកជាលើកដំបូង ដើម្បីបំផុស្មារតីកុមារដែលមានចំណង់ចំណូលកីឡាស្របតាមពាក្យស្លោក«ពលរដ្ឋម្នាក់លេងកីឡាមួយប្រភេទ» និងបង្ហាញពីទេពកោសល្យរបស់ខ្លួនដែលអាចក្លាយជាកីឡាករ កីឡាការិនីអាជីពនាពេលអនាគត។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានថ្លែងក្នុងសន្និសីទសារព័ត៌មានកាលពីថ្ងៃទី២៤ ខែមករា ឆ្នាំ ២០២៦ ថា ព្រឹត្តិការណ៍ប្រកួតកីឡាកុមារអូឡាំពិកនេះមិនមែនជាការប្រកួតប្រជែងតាមកម្រិតបច្ចេកទេស ឬស្វែងរកគុណភាពឈ្នះចាញ់ឡើយ។ ការប្រកួតនេះធ្វើដើម្បីឲ្យកុមារា កុមារីបានយល់ ស្គាល់ពីកីឡា និងលេងកីឡាតាមចំណង់ចំណូលចិត្តរបស់ខ្លួនដែលអាចបំផុសស្មារតីឲ្យពួកគាត់ចូលចិត្ត និងស្រឡាញ់កីឡា។ ការធ្វើបែបនេះយូរៗ ទៅពួកគាត់នឹងកាន់តែស្រឡាញ់ កាន់តែចូលចិត្តតាមប្រភេទកីឡាណាមួយ ហើយបើកផ្លូវឲ្យពួកគាត់អភិវឌ្ឍទៅថ្ងៃអនាគត។ មិនត្រឹមតែប៉ុណ្ណោះ ការប្រកួតបែបនេះផ្តល់ឱកាសឲ្យពួកគាត់អភិវឌ្ឍរាងកាយរឹងមាំ ស្មារតី និងសាមគ្គីភាពក្នុងការជួយគ្នាទៅវិញទៅមក។

សម្រាប់ការរៀបចំកីឡាកុមារអូឡាំពិកលើកដំបូងនេះ មានកីឡា ១០ ប្រភេទ ដែលមានកុមារា កុមារី ក្រោមអាយុ ១០ ឆ្នាំ ចូលរួមប្រកួត។ កុមារម្នាក់អាចចូលរួមប្រកួតចាប់ពី ១ ដល់ ៣ ប្រកួត ហើយថិរវេលានៃការប្រកួតចន្លោះពី ២ ទៅ ៣ នាទី។ សរុបការប្រកួតទាំងអស់មានប្រមាណជិត ៨០០ ប្រកួត។

កីឡាទាំង ១០ ប្រភេទ និងមានចំនួនប្រកួតដូចខាងក្រោម៖

កីឡាវារ មាន ៧២ ប្រកួត
កីឡាប្រាជ្ញាអូឡាំពិក មាន ១២២ ប្រកួត
កីឡារត់ប្រណាំង មាន ១៤៧ ប្រកួត
កីឡាកង់ដោល មាន ៩០ ប្រកួត
កីឡាបាល់បោះ មាន ៥២ ប្រកួត
កីឡាលើកទម្ងងន់ មាន ៥៨ ប្រកួត
កីឡាបាល់ទាត់ មាន ៧៦ ប្រកួត
កីឡាគុនចម្រុះ មាន ៣៨ ប្រកួត
កីឡាវាយកូនហ្គោល មាន ៤១ ប្រកួត
កីឡាវាយសី មាន ៥១ ប្រកួត

សម្រាប់ការដឹកនាំប្រកួតមានគ្រូបង្វឹកចំនួន ១០នាក់ និងក្រុមគ្រូពេទ្យចំនួន ១០នាក់។

ចំណាត់ថ្នាក់ជ័យលាភីចាប់ពីលេខ ១ ដល់ លេខ ៣ ដែលមានមេដាយសរុប ៣៣ គ្រឿង គឺមាស ១១ គ្រឿង មេដាយប្រាក់ ១១ គ្រឿង និងសំរិទ្ធ ១១។ ក្រៅពីមេដាយតាមចំណាត់ថ្នាក់ ក៏មានពាន ៣ គ្រឿងទៀតសម្រាប់ Sportsmanship ដែលផ្តោតលើកុមារ ចេះជួយទុក្ខធុរៈអ្នកដទៃ សាមគ្គីភាព មិត្តភាព និងយុត្តិធម៌។ មិនត្រឹមតែប៉ុណ្ណោះកុមារដែលបានចុះឈ្មោះចូលរួមប្រកួតទាំងអស់សុទ្ធតែទទួលបានមេដាយ Born To Win។

សន្និសីទសារព័ត៌មានស្តីពីព្រឹត្តិការណ៍កីឡាកុមារអូឡាំពិក លើកដំបូងនៅកម្ពុជា ក្រោមព្រះរាជវត្តមានព្រះនាង នរោត្តម ចេណា និងលោក វ៉ាត់ ចំរើន ព្រមតាំងតំណាងដៃគូ មាតាបិតា កុមារា កុមារីយ៉ាងច្រើននៅផ្សារអ៉ីអ៊ន៣។ ការប្រកួតនឹងធ្វើនៅថ្ងៃទី១ ខែកុម្ភៈ ឆ្នាំ ២០២៦ នៅជាន់ទី១ ផ្សារអ៉ីអ៊ន៣៕