ព័ត៌មានអន្ដរជាតិ

កុមារនៅតំបន់ហ្គាហ្សាទទួលបានសម្ភារៈសិក្សាលើកដំបូង ចាប់ពីសង្គ្រាមផ្ទុះឡើង

បានផុស

៣ ខែ មុន

នៅ

ថ្ងៃពុធ ២៨ មករា ២០២៦

ដោយ

ទីភ្នាក់ងារកុមាររបស់អង្គការសហប្រជាជាតិ [UNICEF] បាននិយាយនៅថ្ងៃអង្គារថា ខ្លួនបានផ្តល់សម្ភារៈសិក្សាជាលើកដំបូងក្នុងរយៈពេល២ឆ្នាំកន្លះទៅកាន់ហ្គាហ្សាសម្រាប់ការផ្តល់ជូនកុមារឲ្យទទួលបានការសិក្សា បន្ទាប់ពីពួកគេត្រូវបានរារាំងដោយអាជ្ញាធរអ៊ីស្រាអែល។

គ្រូម្នាក់កំពុងបង្រៀននៅហ្គាហ្សា។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មានរ៉យទ័រ អង្គការយូនីសេហ្វ [UNICEF] បាននិយាយថា ឧបករណ៍រាប់ម៉ឺនកញ្ចប់ ដែលមានសម្ភារដូចជា ខ្មៅដៃ សៀវភៅលំហាត់ និងគូបឈើសម្រាប់លេងជាមួយ ពេលនេះបានចូលទៅដល់តំបន់ដែលមានក្មេងរស់នៅហើយ។

អ្នកនាំពាក្យអង្គការ UNICEF លោក James Elder លើកឡើងថា៖«ពួកយើងមានពេលនេះហើយ ជាថ្ងៃដែលក្មេងៗរង់ចាំ ដែលអាចទទួលបានឧបករណ៍កម្សាន្តជាច្រើន ដូចជាឈុតសាលារៀនរាប់រយក្នុងប្រអប់នីមួយៗ។ យើងកំពុងសម្លឹងមើលការទទួលបានសម្ភារៈសិក្សាចំនួន ២ ៥០០ បន្ថែមទៀត នៅសប្តាហ៍ក្រោយ ដោយសារសម្ភារៈទាំងនោះទើបទទួលបាន»។

អ្នកសម្របសម្រួលសកម្មភាពរដ្ឋាភិបាលក្នុងដែនដី COGAT ដែលជាភ្នាក់ងារយោធាអ៊ីស្រាអែល គ្រប់គ្រងការផ្តល់ជំនួយចូលទៅក្នុងតំបន់ហ្គាហ្សា មិនបានឆ្លើយតបភ្លាមៗចំពោះសំណើសាកសួរព័ត៌មានរបស់រ៉យទ័រ។

លោក Elder បានបន្តថា កុមារនៅហ្គាហ្សាបានប្រឈមមុខនឹងការរំលោភសិទ្ធិលើផ្នែកអប់រំ ដែលមិនធ្លាប់មានពីមុនមក ក៏ដូចជាការរឹតបន្តឹងលើការបញ្ចូនសម្ភារៈជំនួយមួយចំនួន រួមទាំងសៀវភៅសិក្សា និងខ្មៅដៃ ជាដើម។ មានន័យថា គ្រូបង្រៀនត្រូវធ្វើការក្នុងរយៈពេលកំណត់ណាមួយ ខណៈកុមារព្យាយាមសិក្សានៅពេលយប់ក្នុងតង់ងងឹតដោយពុំមានភ្លើងបំភ្លឺជាដើម។

អំឡុងពេលជម្លោះ កុមារមួយចំនួនបានខកខានសិក្សាទាំងស្រុង ដោយប្រឈមមុខនឹងបញ្ហាមូលដ្ឋាន ដូចជាការស្វែងរកទឹក កង្វះអាហាររូបត្ថម្ភ ចំពេលមានវិបត្តិមនុស្សធម៌នានាក្នុងតំបន់នេះ។

លោក Elder បានបន្ថែមថា៖«វាមានរយៈពេលពីរឆ្នាំហើយសម្រាប់កុមារ និងអង្គការនានា ដូចជា UNICEF បានព្យាយាម និងធ្វើការ ដើម្បីបង្រៀនកុមារ ដោយគ្មានសម្ភារៈទាំងនោះ។ តែនៅទីបំផុត វាហាក់ដូចជាយើងឃើញការផ្លាស់ប្តូរពិតប្រាកដ»៕

ប្រែសម្រួល៖ ណឺ មិនា