ព័ត៌មានជាតិ

មេគ្រាប់បែកចង្កោមដ៏គ្រោះថ្នាក់ធ្លាក់មុជដីជម្រៅជិត ២ ម៉ែត្រប្រទះឃើញតាមផ្លូវជាតិលេខ ៥៨ ចេញពីតំបន់បឹងត្រកួន ទៅប្រាសាទតាមាន់

បានផុស

៣ ខែ មុន

នៅ

ថ្ងៃពុធ ៤ កុម្ភៈ ២០២៦

ដោយ

មេគ្រាប់បែកចង្កោមដ៏ប្រល័យ ត្រូវបានអាជ្ញាធរប្រទះឃើញមុជក្នុងជម្រៅដីជិត ២ ម៉ែត្រនៅក្បែរស្ពានកំបុតនៅតាមបណ្តោយផ្លូវជាតិលេខ ៦៨ ចេញពីតំបន់បឹងត្រកួនទៅប្រាសាទតាមាន់ក្នុងខេត្តឧត្តរមានជ័យ។

មេគ្រាប់បែកដ៏គ្រោះថ្នាក់នេះ បើតាមមន្រ្តីស៊ីម៉ាក់ឈរជើងប្រចាំការនៅទិសខេត្តបន្ទាយមានជ័យបានគូសបញ្ជាក់ថា មានទំហំ ១៥៥ មីលីម៉ែត្រ មានឈ្មោះ NR 269 ដែលជាមេគ្រាប់ (ម្ដាយគ្រាប់) ប្រភេទ M46 ផលិតនៅប្រទេសអ៊ីស្រាអែល។ គ្រាប់នេះត្រូវបានរកឃើញនៅចំណុចភូមិអូរកំបុត្រ ឃុំគោករមៀត ស្រុកថ្មពួក ខេត្តបន្ទាយមានជ័យ ជាសំណល់ដែលបន្សល់ទុកដោយយោធាសៀមដែលបាញ់ចូលក្នុងទឹកដីកម្ពុជា ក្នុងសង្រ្គាមឈ្លានពានកាលពីអំឡុងខែធ្នូ ឆ្នាំ២០២៥។

លោក ឡុង វុទ្ធីយ៉ា នាយផ្នែកទទួលបន្ទុកកម្ទេចយុទ្ធភ័ណ្ឌមិនទាន់ផ្ទុះក្នុងទិសខេត្តបន្ទាយមានជ័យបានប្រាប់ថា មេគ្រាប់នេះមានមុខកាត់ ១៥៥ មីលីម៉ែត្រ និងបណ្ដោយប្រហែល ៧០ មីលីម៉ែត្រ។ នៅពេលដែលដំណើរការ វានឹងបញ្ចេញកូនគ្រាប់ចំនួន ៤៩ គ្រាប់ ចេញពីក្នុងខ្លួន។

ក្នុងចំណោមកូនគ្រាប់ទាំងនោះ ខ្លះអាចនឹងផ្ទុះនិងខ្លះទៀតមិនផ្ទុះ។ កូនគ្រាប់ដែលមិនទាន់ផ្ទុះនឹងក្លាយទៅជាមីន ដែលបង្កគ្រោះថ្នាក់យ៉ាងខ្លាំងប្រសិនបើមានមនុស្សដើរជាន់ឬប៉ះពាល់ដោយអចេតនា។

លោក ឡុង វុទ្ធីយ៉ា បានបន្តថា តាមរយៈការស្រាវជ្រាវចាប់ពីថ្ងៃទី១ ដល់ថ្ងៃទី៣០ ខែមករា ឆ្នាំ២០២៦ អាជ្ញាធរបានរកឃើញមេគ្រាប់ប្រភេទ NR269 និងប្រភេទ M396 ឬ M395 សរុបចំនួនប្រហែល ៦០ គ្រាប់ នៅក្នុងខេត្តបន្ទាយមានជ័យ។

គ្រាប់បែកទាំងនេះត្រូវតែធ្វើការដកចេញ ឬកម្ទេចចោលដើម្បីសុវត្ថិភាព។ លោក ឡុង វុទ្ធីយ៉ា បញ្ជាក់បន្ថែម៕