ព័ត៌មានជាតិ

មនុស្សជាង ១ ពាន់នាក់ នៅកោះកុង នាំគ្នារត់ប្រណាំងដើម្បីសុខភាព និងស្មារតីរួមកម្លាំងបុព្វហេតុជាតិមាតុភូមិ

បានផុស

៣ ខែ មុន

នៅ

ថ្ងៃអាទិត្យ ៨ កុម្ភៈ ២០២៦

ដោយ

មនុស្សជាង ១ ពាន់នាក់ បានមកចូលរួមរត់ប្រណាំងដើម្បីសុខភាព និងស្មារតីរួមកម្លាំងបុព្វហេតុជាតិមាតុភូមិ នៅក្នុងក្រុងខេមរភូមិន្ទ ខេត្តកោះកុង ក្នុងរយៈចម្ងាយជាង ៤ គីឡូម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងហោចណាស់ មានថ្នាក់ដឹកនាំដឹកនាំខេត្ត មន្ត្រីរាជការ ដៃគូសហការ កងកម្លាំង ក្រុមយុវជន និងកីឡាករស្ម័គ្រចិត្តប្រមាណ ១ ពាន់នាក់ បានជួបជុំគ្នារត់ប្រណាំងនៅក្នុងបរិវេណស្តូបអនុស្សាវរីយ៍នយោបាយ ឈ្នះ-ឈ្នះ ដែលទើបស្ថាបនារួចរាល់ហើយ។

លោកស្រី មិថុនា ភូថង ប្រធានសហភាពសហព័ន្ធយុវជនកម្ពុជាខេត្តកោះកុង ថ្លែងនៅថ្ងៃទី ៨ ខែកុម្ភៈ នេះថា ការរត់ប្រណាំងដែលមានរយៈចម្ងាយជាង ៤ គីឡូម៉ែត្រនេះ ធ្វើឡើងដើម្បីបំណង ៖ រំលឹកស្មារតី ២ ធ្នូ ដឹងគុណសន្តិភាព និងលើកកម្ពស់សុខភាពសាធារណៈ។

លោកស្រី មិថុនា ភូថង បន្ថែមថា ម្យ៉ាងវិញទៀត ការរត់ប្រណាំងក៏បង្ហាញពីកម្លាំងសាមគ្គីភាព មោទនភាពជាតិ និងការប្តេជ្ញាចិត្តរបស់យុវជនក្នុងការកសាងជាតិ។ មិនត្រឹមតែដើម្បីផ្សារភ្ជាប់សុខភាពប៉ុណ្ណោះទេ ប៉ុន្តែគឺជាការបង្ហាញនូវស្មារតីស្នេហាជាតិ និងការរួមរួមកម្លាំងដើម្បីអនាគតកម្ពុជា។

គួរជម្រាបថា តាមគម្រោងកម្មវិធីនេះ គ្រោងធ្វើឡើងនៅដើមខែធ្នូ ឆ្នាំ ២០២៥ កន្លងទៅ ប៉ុន្តែដោយសារតែស្ថានភាពបញ្ហាព្រំដែន ក៏ត្រូវបានពន្យារមកដល់ថ្ងៃទី ៨ ខែកុម្ភៈ នេះ។ ជាក់ស្តែងថវិកាសប្បុរសជន ក៏ត្រូវបានយកទៅជួយវីរកងទ័ពជួរមុខផងដែរ។

យុវនារី ណាត ស្រីនាង និងយុវជន ពិន ស៉ីផៃ តំណាងយុវជនដែលបានចូលរួមរត់ប្រណាំង បង្ហាញចំណាត់អារម្មណ៍ថា ពួកគេពិតជាសប្បាយរីករាយដែលបានចូលរួមកម្មវិធីអបអរសាទរខួបលើកទី ៤៧ ថ្ងៃបង្កើតសហភាពសហព័ន្ធយុវជនកម្ពុជា និងបង្ហាញស្មារតីសាមគ្គីភាពតែមួយគាំទ្រមាតុភូមិយើងដែលកំពុងរងគ្រោះព្រោះតែការឈ្លានពានរបស់យោធាថៃ។

តំណាងយុវជនខាងលើ មើលឃើញថា សសយក បច្ចុប្បន្នបានចូលរួមសកម្មភាពជួយសង្គមជាតិច្រើនទ្វេដង ស្ទើរតែគ្រប់វិស័យ ពិសេសវិស័យអប់រំ កីឡា សុខភាព បរិស្ថាន និងផ្សព្វផ្សាយអំពីកិច្ចការងារសង្គមជាតិទៅមហាជន។ ពួកគេសង្ឃឹមថា ស្មារតី និងសកម្មភាពថ្លៃថ្លារបស់យុវជនទាំងអស់ នឹងនៅបន្តរួបរួមគ្នាដោយមិនអាចនរណាមកបំបែកបានឡើយ៕

អត្ថបទ ៖ សិរីវឌ្ឍនៈ