កម្ពុជាចង់ឱ្យថៃយកគំរូតាមឡាវ និងវៀតណាម ចំពោះដំណោះស្រាយបញ្ហាព្រំដែនជាមួយកម្ពុជា

កម្ពុជាចង់ឱ្យថៃយកគំរូតាមកម្ពុជា ឡាវ និងវៀតណាម ចំពោះការដោះស្រាយបញ្ហាព្រំដែនដែលជាដំណោះស្រាយធ្វើឡើងដោយសន្តិវិធី ផ្អែកតាមលក្ខណៈបច្ចេកទេស ច្បាប់អន្តរជាតិ និងផែនទីដែលទទួលស្គាល់ដោយអន្តរជាតិ ដើម្បីបញ្ចប់ជម្លោះព្រំដែន កុំឱ្យបន្តបញ្ហាដល់កូនចៅជំនាន់ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការលើកឡើងរបស់អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា ក្នុងសន្និសីទសារព័ត៌មាន កាលពីថ្ងៃអាទិត្យ ទី៨ ខែកុម្ភៈ ស្ដីពីលទ្ធផលរួមនៃកិច្ចប្រជុំថ្នាក់ដឹកនាំកម្ពុជា ឡាវ វៀតណាម។ តាមលោក សួស យ៉ារ៉ា កម្ពុជា ឡាវ និងវៀតណាម បានបញ្ជាក់ឡើងវិញពីការប្ដេជ្ញាចិត្តដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ ហើយប្រឆាំងដាច់ខាតការប្រើកម្លាំងដើម្បីកំណត់ខ្សែព្រំដែន។

កម្ពុជា ឡាវ និងវៀតណាម ក៏បានជជែកពីការជំរុញការដោះស្រាយបញ្ហាព្រំដែន ដែលនៅសេសសល់ឱ្យបានឆាប់រហ័ស ធ្វើយ៉ាងណាធានាព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។ ចំពោះលោក សួស យ៉ារ៉ា ការប្ដេជ្ញាចិត្តរបស់ប្រទេសទាំងបីក្នុងការដោះស្រាយបញ្ហាព្រំដែនតាមច្បាប់អន្តរជាតិនេះ គឺជាគំរូមួយដែលប្រទេសថៃគួរយកតាម ព្រោះប្រទេសទាំងពីរ ទោះបីខឹងគ្នាយ៉ាងណា ក៏មិនអាចលើកព្រំដែនទៅណាបានដែរ ត្រូវតែនៅជិតគ្នារហូត។

លោក សួស យ៉ារ៉ា បាននិយាយយ៉ាងដូច្នេះថា «អីចឹងទេ មើលតែគំរូនៃកម្ពុជា ឡាវ វៀតណាម ដែលដោះស្រាយបញ្ហាដោយសន្តិវិធី ដោះស្រាយបញ្ហាតាមបច្ចេកទេស ដោះស្រាយដោយផ្អែកលើគោលការណ៍ច្បាប់អន្តរជាតិ ដោះស្រាយតាមផែនទី និងយន្តការដែលមានស្រាប់ អ្វីដែលយើងធ្វើនេះ ជាគំរូដែលល្អមួយ»។

អ្នកនាំពាក្យគណបក្សប្រជាជនកម្ពុជាខាងលើ បានសង្កត់ធ្ងន់ថា នេះជាក្ដីរីករាយរបស់ប្រជាជន ដែលថ្នាក់ដឹកនាំកំពូលនៃប្រទេសទាំងបី បានឯកភាពយកការដោះស្រាយដោយសន្តិវិធី ហើយមិនប្រើប្រាស់កម្លាំងក្នុងការគំរាមកំហែងដល់ជម្លោះព្រំដែននោះទេ។

កម្ពុជាមានព្រំដែនគោកជាប់នឹងប្រទេសថៃ ឡាវ វៀតណាម ខណៈស្ថិតនៅភាគខាងត្បូង ជាព្រំដែនសមុទ្រជាប់នឹងឈូងសមុទ្រថៃ។ ជុំវិញការងារព្រំដែននេះ កម្ពុជា និងឡាវ ក៏ដូចជាកម្ពុជា និងវៀតណាម គឺសម្រេចបាននូវការឯកភាពលើការបោះបង្គោលព្រំដែនស្ទើរតែរួចរាល់ទាំងស្រុងទៅហើយ ពោលគឺព្រំដែនកម្ពុជា-ឡាវ ភាគីទាំងពីរបានបោះបង្គោលព្រំដែនបានប្រមាណ៨៦% ហើយកម្ពុជា-វៀតណាម បានឯកភាពលើខ្សែព្រំដែនចំនួន៨៤% ខណៈព្រំដែនដែលនៅសេសសល់ ប្រទេសទាំងបីកំពុងបន្តជំរុញការដោះស្រាយឱ្យបានឆាប់រហ័ស ដើម្បីទុកជាកេរ្តិ៍មរតកដល់កូនចៅជំនាន់ក្រោយនូវព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ តាមគោលការណ៍ដោះស្រាយជម្លោះដោយសន្តិវិធី និងគោរពច្បាប់អន្តរជាតិ។

ដោយឡែក ព្រំដែនកម្ពុជា និងថៃ កំពុងមានបញ្ហាជម្លោះដ៏ចម្រូងចម្រាសជាមួយគ្នា តាមរយៈការប្រើកម្លាំងប្រដាប់អាវុធពីសំណាក់ភាគីថៃ ចូលឈ្លានពានមកលើដែនអធិបតេយ្យ និងបូរណភាពទឹកដីរបស់កម្ពុជា ក្នុងចេតនាចង់កែប្រែខ្សែបន្ទាត់ព្រំដែនរវាងប្រទេសទាំងពីរដោយប្រើប្រាស់កម្លាំងក្នុងការគំរាមកំហែងដណ្ដើមកាន់កាប់ទឹកដីរបស់កម្ពុជា។ ប៉ុន្តែកម្ពុជាមិនទទួលស្គាល់នោះឡើយនូវការកែប្រែខ្សែព្រំដែនដែលកើតចេញពីការប្រើកម្លាំង ហើយកម្ពុជាទាមទារឱ្យភាគីថៃងាកមករកការដោះស្រាយបញ្ហាព្រំដែននេះដោយសន្តិវិធី ផ្អែកលើច្បាប់អន្តជាតិឡើងវិញ៕

អត្ថទ៖ ធឿន វ៉ាន់សុង