សេដ្ឋកិច្ច

ហាងឆេងមាសធ្លាក់ចុះក្រោម ៦ ពាន់ដុល្លារ មួយតម្លឹង

បានផុស

២ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

តម្លៃហាងឆេងមាសបានធ្លាក់ចុះក្រោម ៦០០០ ដុល្លារ ក្នុងមួយតម្លឹង នៅថ្ងៃអង្គារនេះ បន្ទាប់ពីបានហក់កើនឡើងខ្ពស់កាលពីដើមខែកុម្ភៈ ឆ្នាំ ២០២៦ ដោយសារភូមិសាស្ត្រនយោបាយ សង្គ្រាម និងសម្ពាធពន្ធដែលដាក់ចេញដោយសហរដ្ឋអាមេរិក។

គិតត្រឹមម៉ោង ៨៖០០ ព្រឹកថ្ងៃទី ១៧ ខែកុម្ភៈ ឆ្នាំ ២០២៦ តម្លៃហាងឆេងតាមបណ្ដាហាងនានានៅរាជធានីភ្នំពេញ ក្នុងតម្លៃ ៥៩៦២ ដុល្លារ ក្នុងមួយតម្លឹង។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities ប្រាប់កម្ពុជាថ្មីថា មូលហេតុនៃការធ្លាក់ចុះនេះ ជាធម្មតាគេវិភាគទៅលើចិត្តសាស្ត្រ ឬក៏របៀបនៃការវិនិយោគរបស់ធនាគារធំៗ គេតែងតែយកផលចំណេញក្នុងអំឡុងឆមាស ឬក៏ត្រីមាសទី១ មុន ដោយសារតែតម្លៃហាងឆេងមាសឡើងដល់គោលដៅដេលគេចង់បាន។

លោក ឡុង សំណាង បន្ថែមថា ប្រសិនបើស្ថានភាពនយោបាយមានភាពតានតឹង ឬក៏ពាក់ព័ន្ធជាមួយពន្ធមួយចំនួន តម្លៃហាងឆេងមាសអាចនឹងឡើងដល់ ៧ ពាន់ដុល្លារក្នុងមួយតម្លឹង នៅពាក់កណ្ដាលឆ្នាំ ២០២៦ នេះ ប៉ុន្តែនៅចន្លោះឆមាសទី១ នឹងមានការធ្លាក់ចុះ៕

អត្ថបទ៖ ឡេង ដេត