ព័ត៌មានអន្ដរជាតិ

តើប្រធានាធិបតីកូរ៉េខាងត្បូងរូបណាខ្លះ ធ្លាប់ជាប់ពន្ធនាគារ?

បានផុស

៥ ខែ មុន

នៅ

ថ្ងៃសុក្រ ២០ កុម្ភៈ ២០២៦

ដោយ

កាលពីថ្ងៃព្រហស្បតិ៍ទី១៩ខែកុម្ភៈឆ្នាំ២០២៦ អតីតប្រធានាធិបតីកូរ៉េខាងត្បូង លោក Yoon Suk Yeol ត្រូវបានតុលាការសម្រេចផ្ដន្ទាទោសដាក់ពន្ធនាគារអស់មួយជីវិត បន្ទាប់ពីរកឃើញថាមានទោសពីបទដឹកនាំការបះបោរ ក្នុងអំឡុងពេលប្រកាសច្បាប់អាជ្ញាសឹកកាលពីថ្ងៃទី៣ខែធ្នូឆ្នាំ២០២៤។

តាមការផ្សាយរបស់ BBC, សាលាដំបូងក្រុងសេអ៊ូលបានប្រកាសសាលក្រមជាប្រវត្តិសាស្ត្រនេះ ដោយសន្និដ្ឋានថា សកម្មភាពរបស់លោក Yoon រួមទាំងការបញ្ជូនកងទ័ពប្រដាប់អាវុធទៅកាន់វិមានសភាផងនោះ គឺជាការវាយប្រហារដោយផ្ទាល់ទៅលើគ្រឹះប្រជាធិបតេយ្យរបស់ជាតិ ដើម្បីរារាំងដំណើរការសភា និងចាប់ខ្លួនគូប្រជែងនយោបាយ។

យ៉ាងណា លោក Yoon មិនមែនទើបជាប្រធានាធិបតីកូរ៉េខាងត្បូង ដំបូងគេទេ ដែលត្រូវតុលាការផ្ដន្ទាទោសដាក់ពន្ធនាគារ។

នៅក្នុងប្រវត្តិសាស្រ្តប្រទេសនេះ មានប្រធានាធិបតី៤រូបទៀត ដែលក៏ត្រូវតុលាការផ្ដន្ទាទោសដាក់ពន្ធនាគារផងដែរ។

1. លោក Chun Doo-hwan (កាន់អំណាច ១៩៨០-១៩៨៨)

លោកត្រូវបានកាត់ទោសប្រហារជីវិត ប៉ុន្តែក្រោយមកក៏បន្ធូរមកត្រឹមជាប់ពន្ធនាគារអស់មួយជីវិតវិញ ពីបទធ្វើរដ្ឋប្រហារ និងការបង្ក្រាបបាតុកម្មនៅទីក្រុង ក្វាងជូ។ លោកត្រូវបានលើកលែងទោសនៅឆ្នាំ១៩៩៧។

2. លោក Roh Tae-woo (កាន់អំណាច ១៩៨៨-១៩៩៣)

លោកត្រូវបានកាត់ទោសឲ្យជាប់ពន្ធនាគារ១៧ឆ្នាំ ពីបទពុករលួយ និងចូលរួមក្នុងរដ្ឋប្រហារ ប៉ុន្តែលោកក៏ត្រូវបានលើកលែងទោសជាមួយលោក Chun Doo-hwan ដែរ នៅឆ្នាំដដែលនោះ។

3. លោក Lee Myung-bak (កាន់អំណាច ២០០៨-២០១៣)

លោកត្រូវបានកាត់ទោសឲ្យជាប់ពន្ធនាគារ១៥ឆ្នាំ ពីបទពុករលួយ និងទទួលសំណូកពីក្រុមហ៊ុន Samsung។ លោកត្រូវបានលើកលែងទោសដោយប្រធានាធិបតី Yoon Suk Yeol កាលពីចុងឆ្នាំ ២០២២។

4. លោកស្រី Park Geun-hye (កាន់អំណាច ២០១៣-២០១៧)

លោកស្រីជាប្រធានាធិបតីស្រីដំបូងគេដែលត្រូវបានសភាដកហូតតំណែង និងកាត់ទោសឲ្យជាប់ពន្ធនាគារ២៤ឆ្នាំ ពីបទពុករលួយនិងបែកធ្លាយការណ៍សម្ងាត់រដ្ឋ។ យ៉ាងណា លោកស្រីត្រូវបានលើកលែងទោសវិញកាលពីចុងឆ្នាំ២០២១៕

អត្ថបទ៖ សុខ សុវណ្ណ