ការរៀបចំកែលម្អហេដ្ឋារចនាសម្ព័ន្ធដងផ្លូវជុំវិញផ្សារដើមគរចាស់ សម្រេចលទ្ធផលបាន៩០ភាគរយ ពលរដ្ឋ និងអ្នកដំណើរសាទរ

ដងផ្លូវនានានៅជុំវិញផ្សារដើមគរចាស់ ត្រូវបានអាជ្ញាធរបើកឲ្យធ្វើលំហូរចរាចរណ៍ឡើងវិញទាំងអស់ហើយ ខណៈការរៀបចំសណ្តាប់ធ្នាប់ និងការកែលម្អហេដ្ឋារចនាសម្ព័ន្ធ សម្រេចលទ្ធផលបាន៩០ភាគរយហើយ។

ប្រជាពលរដ្ឋរស់នៅក្នុងតំបន់ និងអ្នកដំណើរដែលឧស្សាហ៍ឆ្លងកាត់ សម្តែងក្តីសាទរសប្បាយរីករាយ និងថ្លែងអំណរអរគុណ  ចំពោះអាជ្ញាធររាជធានីភ្នំពេញបានយកចិត្តទុកដាក់ការរៀបចំដងផ្លូវ និងចិញ្ចើមផ្លូវសាធារណៈឲ្យមានសណ្តាប់ធ្នាប់ របៀបរៀបរយ និង សោភ័ណភាពល្អប្រសើរឡើង ដើម្បីបរិស្ថានអនាម័យល្អ ក្នុងទីក្រុង។

ពលរដ្ឋដ៏ដែលបានបញ្ជាក់បន្ថែមថា កន្លងទៅធ្វើដំណើរឆ្លងកាត់តំបន់ផ្សារដើមគរ មានភាពស្ទះចង្អៀត ទាំងថ្ងៃទាំងយប់ ចំណែកចិញ្ជើមផ្លូវមិនមានកន្លែងសម្រាប់អ្នកដើរថ្មើរជើង ដូច្នេះក្រោយរៀបចំមានសភាពស្រឡះល្អ មានសោភ័ណភាពតាមដងផ្លូវ។

កាលពីរសៀលថ្ងៃទី២៤ ខែកុម្ភៈ ឆ្នាំ២០២៦ ក្នុងកិច្ចប្រជុំស្តីពីវឌ្ឍនភាពក្នុងការរៀបចំសណ្តាប់ធ្នាប់ និងការផ្ទេរអាជីវករដែលលក់ដូរនៅលើផ្លូវ និងចិញ្ចើមផ្លូវតំបន់ជុំវិញផ្សារដើមគរ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ឲ្យដឹងថា ៖ ផ្លូវជាច្រើនខ្សែនៅតំបន់ជុំវិញផ្សារដើមគរ ពិសេសមហាវិថីព្រះមុនីរ៉េត មហាវិថីម៉ៅសេទុង និងផ្លូវលេខ២៣០ ស្ថិតក្នុងមូលដ្ឋានខណ្ឌទួលគោក និងខណ្ឌបឹងកេងកង មកដល់ពេលនេះ ការរៀបចំសណ្តាប់ធ្នាប់ គឺអនុវត្តបានល្អប្រសើរប្រមាណ៩០%ហើយ ក្រោយពីអាជ្ញាធររាជធានីភ្នំពេញបានចាត់វិធានការមិនឱ្យអាជីវករលក់ដូរលើចិញ្ចេីមផ្លូវ និងទ្រូងផ្លូវ ក្នុងរយៈពេលជាង១ខែកន្លងមកនេះ។

លោក ឃួង ស្រេង បានមានប្រសាសន៍បន្តថា ការសម្រេចបានជោគជ័យដ៏ធំធេងនេះ គឺបានមកពីការយកចិត្តទុកដាក់អស់កម្លាំងកាយចិត្ត មិនថាយប់ ថ្ងៃរបស់អាជ្ញាធរ និងកងកម្លាំង ហើយអ្វីដែលពិសេសថែមទៀតនោះ គឺការចូលរួមគាំទ្រយ៉ាងពេញទំហឹងពីសំណាក់ប្រជាពលរដ្ឋ។ ការគាំទ្រនេះ ក៏ព្រោះតែការអនុវត្តការងារប្រកបដោយភាពទន់ភ្លន់ ស្លូតបូត តែម៉ឺងម៉ាត់ និងធ្វើឡើងដើម្បីផលប្រយោជន៍រួមសម្រាប់ប្រជាពលរដ្ឋ១៧លាននាក់។

ទន្ទឹមនឹងការរៀបចំសណ្តាប់ធ្នាប់នៅតំបន់ខាងលើ លោក ឃួង ស្រេង អភិបាលរាជធានីភ្នំពេញ ក៏បានណែនាំឱ្យអាជ្ញាធរខណ្ឌទាំង១៤ ត្រូវរៀបចំសណ្តាប់ធ្នាប់នៅក្នុងមូលដ្ឋានរបស់ខ្លួនឱ្យបានល្អ និងម៉ឺងម៉ាត់ ដោយមិនអនុញ្ញាតិឱ្យមានការលក់ដូរបំពានលើទ្រូងផ្លូវ និងចិញ្ចើមផ្លូវឡើយ។ ចំពោះការងារដោះស្រាយការកកស្ទះចរាចរណ៍តាមដងផ្លូវវិញក៏ត្រូវរួមគ្នាធ្វើឡើងជាប្រចាំផងដែរ ដោយនៅពេលនេះនៅរាជធានីភ្នំពេញ មានយានជំនិះច្រើនជាងចំនួនមនុស្សទៅហើយ៕ អត្ថបទ ៖សុភា