ព័ត៌មានជាតិ

បច្ចុប្បន្នភាពការដួលសន្លប់កម្មកររោងចក្រស៊ីហាវ ៖ ក្រសួងការងារថា កម្មករ ១៩ នាក់ ជាសះស្បើយចេញទៅផ្ទះវិញ ខណៈមូលហេតុបឋមអាចមកពីការកើនកម្ដៅក្នុងអគារផលិតកម្ម

បានផុស

២ ខែ មុន

នៅ

ថ្ងៃពុធ ៤ មីនា ២០២៦

ដោយ

កម្មករ-និយោជិត នៃរោងចក្រ ស៊ីហាវ ហ៊ែនប៊ែន ឯ.ក ដែលមានអាស័យដ្ឋាននៅភូមិកណ្ដាល ឃុំព្រែកអញ្ចាញ ស្រុកមុខកំពូល ខេត្តកណ្ដាល សរុប ១៩ នាក់ បានជាសះស្បើយ និងត្រឡប់ទៅផ្ទះវិញ កាលពីព្រឹកថ្ងៃទី ៤ ខែមីនា នេះ ខណៈកម្មករ ១២ នាក់ ផ្សេងទៀត កំពុងសម្រាកបន្តនៅមណ្ឌលសុខភាពព្រែកអញ្ចាញ និងមន្ទីរពេទ្យឯកជនគុយវ៉ែត។ នេះបើតាម លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។

លោកថ្លែងថា “សុខទុក្ខរបស់កម្មករ គឺជាការងារអាទិភាពរបស់ក្រសួងដែល ឯកឧត្ដមរដ្ឋមន្ត្រីក្រសួងការងារលោកយកចិត្តទុកដាក់។ ក្នុងនោះ ភ្លាមៗ ក្រោយទទួលបានដំណឹង ក្រុមមន្ត្រីជំនាញរបស់ក្រសួង រួមទាំងមន្ទីរ ក.ប.ខេត្តកណ្តាល ផង បានចុះពិនិត្យ និងជួយសម្រួលជូនបងប្អូនទៅកាន់មន្ទីរពេទ្យ និងបន្តសម្របសម្រួលនៅទីតាំងជាក់ស្តែង ខណៈដែលជំនាញផ្នែកសុវត្ថិភាពការងាររបស់ក្រសួង កំពុងអង្កេត និងសរុបលើការអង្កេត ដើម្បីផ្ដល់សេចក្ដីសន្និដ្ឋានរួម”។

អ្នកនាំពាក្យរូបនេះ បញ្ជាក់នៅព្រឹកថ្ងៃទី ៤ ខែមីនា ថា ការដួលសន្លប់កម្មករ-និយោជិត រោងចក្រស៊ីនហាវ ហ៊ែនប៊ែក ឯ.ក ស្ថិតនៅភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាលនេះ គឺផ្តើមចេញពីកម្មការិនីចំនួន ២ នាក់ ទី១-ឈ្មោះ រស់ ស្រីនី អាយុ ៣៦ ឆ្នាំ និង ទី២-ឈ្មោះ វេង ណៃលីន អាយុ ៣៤ ឆ្នាំ ដែលធ្វើការនៅផ្នែកដេរជាមួយគ្នា មានអាការវិលមុខ ថប់ដង្ហើម ទន់ដៃទន់ជើងសន្លប់។ បន្ទាប់មក កម្មករដែលនៅជិតគាត់បានគ្រាជនរងគ្រោះទៅបន្ទប់ពេទ្យរោងចក្រ ពេលនោះក្រុមការងារជំនួយការផ្នែករដ្ឋបាលបានជួយធ្វើការសង្រ្គោះបឋមភ្លាមៗ និង បានបញ្ជូនបន្តទៅមជ្ឈមណ្ឌលសុខភាពព្រែកអញ្ចាញ។ ចំណែកកម្មករផ្សេងទៀតដែលនៅក្បែរនោះបានឃើញហេតុការណ៍នេះ ក៏មានអាការភិតភ័យ ទន់ដៃទន់ជើង សន្លប់តគ្នា ជាបន្តបន្ទាប់។

លោកថ្លែងបន្តថា “មូលហេតុបឋមដែលក្រុមជំនាញ នៃក្រសួងការងាររកឃើញ គឺ រោងចក្រមានប្រព័ន្ធបញ្ចេញបញ្ចូលខ្យល់ និងការសំអាតបរិយាកាសក្នុងអគារផលិតកម្មពុំបានត្រឹមត្រូវ បរិយាការកម្ដៅក្នុងអគារផលិតកម្មមានសភាពក្ដៅ និងមានក្លិនកាវ”។