ការ​ប្រើ​ទិន្នន័យចាស់របស់អាមេរិក អាច​ជា​មូលហេតុ​បណ្តាលឲ្យកុមារី​១៥០នាក់ស្លាប់​​នៅ​អ៊ីរ៉ង់

ការវាយប្រហារដោយមីស៊ីលដ៏សាហាវទៅលើសាលារៀនកុមារីមួយកន្លែង ក្នុងទីក្រុង Minab ប្រទេសអ៊ីរ៉ង់ ដែលបានសម្លាប់សិស្សស្រីអស់ចំនួន​១៥០នាក់ ត្រូវបានគេសង្ស័យថា បណ្តាលមកពីកងទ័ព​អាមេរិកប្រើប្រាស់ទិន្នន័យកំណត់គោលដៅចាស់ហួសសម័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារ​​ព័ត៌មាន Reuters និង CNN បាន​ចុះ​ផ្សាយ​ដូច​គ្នា​ដោយ​​យោង​តាម​ប្រភព​សុំ​មិន​បញ្ចេញ​ឈ្មោះ​​ថា មន្ត្រីទទួលបន្ទុកលើការកំណត់គោលដៅហាក់ដូចជាបានពឹងផ្អែកលើព័ត៌មានសម្ងាត់ដែលលែងប្រើការបាន ដែលនាំ​ឲ្យ​កើតមានគ្រោះថ្នាក់ដល់ជនស៊ីវិលដ៏អាក្រក់បំផុតមួយក្នុងរយៈពេលរាប់សិបឆ្នាំចុងក្រោយនេះ។ តាមរយៈការវិភាគភស្តុតាងវីដេអូពីអ្នកជំនាញ បានបង្ហាញថា មីស៊ីលប្រភេទ Tomahawk របស់អាមេរិក បានហោះទៅបុកចំតំបន់នោះ ដែលស្ថិតនៅជាប់នឹងបន្ទាយរបស់កងទ័ពបដិវត្តន៍អ៊ីស្លាមអ៊ីរ៉ង់ (IRGC)។

ពាក់ព័ន្ធនឹងករណីនេះ ក្រសួងការពារជាតិអាមេរិក បានបដិសេធ​ផ្តល់ព័ត៌មានលម្អិតជាក់លាក់ ដោយគ្រាន់តែបញ្ជាក់ថា ការស៊ើបអង្កេតផ្ទៃក្នុងកំពុងតែបន្តធ្វើឡើងយ៉ាងយកចិត្តទុកដាក់។ ទោះបីជាកាលពីដំបូងឡើយ ប្រធានាធិបតីអាមេរិក លោក ដូណាល់ ត្រាំ បានអះអាងដោយគ្មានភស្តុតាងថា អ៊ីរ៉ង់ខ្លួនឯងជាអ្នកទទួលខុសត្រូវក៏ដោយ ប៉ុន្តែក្រោយមកលោកបានប្តូរឥរិយាបថមកវិញ ដោយនិយាយ​ថា លោកនឹងទទួលយកលទ្ធផលនៃការស៊ើបអង្កេតជាផ្លូវការ។ រដ្ឋមន្ត្រីការពារជាតិ លោក Pete Hegseth រួមជាមួយមន្ត្រីដទៃទៀត បានសង្កត់ធ្ងន់ថា សហរដ្ឋអាមេរិកមិនដែលមានចេតនាវាយប្រហារលើជនស៊ីវិលឡើយ ព្រោះសកម្មភាពបែបនេះនឹងត្រូវចាត់ទុកថាជា «ឧក្រិដ្ឋកម្មសង្គ្រាម» នៅក្រោមច្បាប់អន្តរជាតិ។

សោកនាដកម្មនេះបានកើតឡើងចំថ្ងៃដំបូងនៃការវាយប្រហាររបស់អាមេរិក និងអ៊ីស្រាអែលទៅលើប្រទេសអ៊ីរ៉ង់។ រូបភាពនៃពិធីបុណ្យសពរបស់ជនរងគ្រោះ ត្រូវបានចាក់ផ្សាយនៅលើទូរទស្សន៍រដ្ឋអ៊ីរ៉ង់ ដែលបង្ហាញពីទិដ្ឋភាពដ៏ក្តុកក្តួលនៃក្តាមឈូសតូចៗរាប់រយ ដណ្តប់ដោយទង់ជាតិអ៊ីរ៉ង់ ត្រូវបានដង្ហែឆ្លងកាត់ហ្វូងមនុស្សយ៉ាងច្រើនកុះករ។ រហូតមកដល់ពេលនេះ គេនៅមិនទាន់ដឹងច្បាស់ថា តើទិន្នន័យចាស់ទាំងនោះត្រូវបានជ្រើសរើសមកប្រើប្រាស់ដោយរបៀបណា ឬតើមានកត្តាអ្វីផ្សេងទៀតដែលបង្ក​ឲ្យ​មានកំហុសឆ្គងនេះឡើយ ហើយមន្ត្រីអាមេរិកក៏មិនទាន់បានបញ្ជាក់ពីកាលបរិច្ឆេទដែលត្រូវចេញរបាយការណ៍ស៊ើបអង្កេតចុងក្រោយនោះដែរ៕

ប្រែសម្រួល៖ ឈាង