ហ្សេលេនស្គី៖ អ៊ុយក្រែនចង់​បាន​ថវិកា និង​បច្ចេកវិទ្យា ជា​ថ្នូរ​នឹង​ការ​ជួយ​អាមេរិក​ក្នុង​សង្គ្រាម​

លោកប្រធានាធិបតី វ៉ូឡូឌីមៀរ ហ្សេលេនស្គី ទើបតែបានទម្លាយឲ្យដឹងថា អ៊ុយក្រែនបានបញ្ជូនក្រុមអ្នកជំនាញពិសេសចំនួន៣​​ក្រុម​​ទៅកាន់ប្រទេសកាតា អេមីរ៉ាតអារ៉ាប់រួម អារ៉ាប៊ីសាអូឌីត និងមូលដ្ឋានទ័ពអាមេរិកក្នុងប្រទេសហ្ស៊កដានី ដើម្បីជួយទប់ទល់នឹងការវាយប្រហារដោយដ្រូនរបស់អ៊ីរ៉ង់។

តាម​ការ​ផ្សាយ​របស់ Al Jazeera កាល​ពីថ្ងៃទី​១៥​មីនា​​២០២៦ ទោះបីជាលោក​ហ្សលេនស្គីសង្កត់ធ្ងន់ថា អ៊ុយក្រែនមិនមែនកំពុងធ្វើសង្គ្រាមជាមួយអ៊ីរ៉ង់ក៏ដោយ ក៏​អ៊ុយក្រែនចង់ប្រើប្រាស់បទពិសោធន៍រយៈពេល៤ឆ្នាំពេញ ក្នុងការស្ទាក់ចាប់ដ្រូនអត្តឃាតដែលផលិតដោយអ៊ីរ៉ង់ ដើម្បីយកមកធ្វើជា «ដើមទុន» ក្នុងការវាយតម្លៃ និងបង្ហាញបច្ចេកទេសទៅកាន់បណ្តាប្រទេសទាំងនោះ។

គោលដៅពិតប្រាកដរបស់លោកហ្សេលេនស្គី គឺការដោះដូរយកកិច្ចព្រមព្រៀងរយៈពេលវែង ដោយលោកបានបញ្ជាក់យ៉ាងច្បាស់ថា «ទាំងបច្ចេកវិទ្យា និងថវិកា គឺសុទ្ធតែមានសារៈសំខាន់» សម្រាប់តម្រូវការការពារជាតិរបស់អ៊ុយក្រែនផ្ទាល់។ អ៊ុយក្រែនកំពុងសម្លឹងមើលកិច្ចព្រមព្រៀងដ្រូនដែលមានតម្លៃចន្លោះពី ៣៥ពាន់លាន ទៅ ៥០​ពាន់​លានដុល្លារឯណោះ។

ទោះជាយ៉ាងណា ផ្លូវនេះហាក់មិនរលូនប៉ុន្មានទេ ព្រោះប្រធានាធិបតីអាមេរិក លោក ដូណាល់ ត្រាំ បានប្រកាសថា លោកមិនត្រូវការជំនួយពីអ៊ុយក្រែនក្នុងការការពារគោលដៅរបស់អាមេរិកឡើយ។ រឿងនេះបានធ្វើ​ឲ្យ​លោកហ្សេលេនស្គី បង្ហាញការព្រួយបារម្ភយ៉ាងខ្លាំង ចំពោះការខ្វះខាតកិច្ចព្រមព្រៀងផ្លូវការជាមួយទីក្រុងវ៉ាស៊ីនតោន ហើយលោកក៏បានព្រមានដែរថា ការរីករាលដាលនៃជម្លោះនៅមជ្ឈិមបូព៌ា អាចនឹងធ្វើ​ឲ្យ​ការផ្គត់ផ្គង់ប្រព័ន្ធការពារអាកាសដែលអ៊ុយក្រែនកំពុងត្រូវការខ្លាំង ត្រូវបានបង្វែរទិសដៅទៅកន្លែងផ្សេងវិញ។

ដើម្បីគ្រប់គ្រងលើការចាប់អារម្មណ៍ពីអន្តរជាតិដែលកំពុងកើនឡើង លោកហ្សេលេនស្គី ក៏បានប្រកាសដាក់ចេញនូវបទបញ្ជាតឹងរ៉ឹងថ្មីមួយផងដែរ ដោយតម្រូវ​ឲ្យ​រដ្ឋាភិបាលបរទេស និងក្រុមហ៊ុនឯកជននានា ត្រូវចរចាកិច្ចសន្យាទិញដ្រូនតាមរយៈច្រកនយោបាយផ្លូវការរបស់រដ្ឋាភិបាលអ៊ុយក្រែនតែប៉ុណ្ណោះ មិនមែនទៅចរចាផ្ទាល់ជាមួយក្រុមហ៊ុនផលិតដូច​ពី​មុនទៀតឡើយ៕

ប្រែសម្រួល៖ ឈាង