ព័ត៌មានអន្ដរជាតិ

មេណាតូ អះអាងថា សម្ព័ន្ធមិត្តអឺរ៉ុបនឹងរកគ្រប់វិធីបើកច្រក Hormuz ឲ្យបាន

បានផុស

៤ ខែ មុន

នៅ

ថ្ងៃសុក្រ ២០ មីនា ២០២៦

ដោយ

ប្រធានអង្គការណាតូ (NATO) លោក Mark Rutte លើកឡើងដោយមានទំនុកចិត្តកាលពីថ្ងៃព្រហស្បតិ៍ថាសម្ព័ន្ធមិត្តអឺរ៉ុបនឹងរកវិធីសាស្រ្តនានា ធ្វើយ៉ាងណាឱ្យចរាចរណ៍តាមរយៈច្រកសមុទ្រ Hormuz ដំណើរការឡើងវិញ បន្ទាប់ពីច្រកដឹកប្រេងដ៏សំខាន់មួយនេះត្រូវបានបិទដោយភាគីអ៊ីរ៉ង់។ នេះបើយោងតាមសារព័ត៌មាន Politico ផ្សាយថ្ងៃទី១៩ ខែមីនា ឆ្នាំ២០២៦ ។

លោក Rutte ប្រាប់អ្នកយកព័ត៌មាននៅទីក្រុងព្រុចសែលថា៖ «សម្ព័ន្ធមិត្តទាំងអស់ […] កំពុងពិភាក្សាគ្នាយ៉ាងយកចិត្តទុកដាក់ [និង] ជាមួយសហរដ្ឋអាមេរិក […] រកគ្រប់មធ្យោបាយដែលល្អបំផុត ដើម្បីដោះស្រាយបញ្ហាសន្តិសុខដ៏ធំនេះ»។

ប្រធានអង្គការណាតូ លោក Mark Rutte ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា៖«ខ្ញុំជឿជាក់ថាសម្ព័ន្ធមិត្តដូចសព្វដងដែរនឹងធ្វើអ្វីគ្រប់យ៉ាង ដើម្បីគាំទ្រផលប្រយោជន៍រួមរបស់យើង ដូចអ្វីដែលយើងតែងតែធ្វើ។ ដូច្នេះយើងនឹងរកវិធីដោះស្រាយ ដើម្បីឆ្ពោះទៅមុខជាមួយគ្នា»។

គួរបញ្ជាក់ថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានអំពាវនាវដល់ដៃគូអឺរ៉ុបឱ្យជួយធានាសុវត្ថិភាពសរសៃឈាមពាណិជ្ជកម្ម តែសំណើមួយនេះភាគច្រើនត្រូវបានបដិសេធទាំងស្រុង។

មិនតែប៉ុណ្ណោះ លោក ត្រាំ បានរិះគន់សម្ព័ន្ធមិត្តណាតូដោយព្រមានថា អាមេរិកអាចពិចារណាឡើងវិញពីតួនាទីរបស់សហរដ្ឋអាមេរិកនៅក្នុងសម្ព័ន្ធភាពនេះ។

យ៉ាងណាកាលពីថ្ងៃអង្គារ ប្រធានាធិបតីអាមេរិកបានអះអាងថា លោកលែងត្រូវការការគាំទ្រពីអឺរ៉ុបសម្រាប់ប្រតិបត្តិការនេះទៀតហើយ។

តែលោក Rutte អះអាងថា៖ « ក្នុងសង្គ្រាមរបស់ លោក ត្រាំ មានការគាំទ្រយ៉ាងច្រើនក្នុងចំណោមសម្ព័ន្ធមិត្ត យើងសរសើរសហរដ្ឋអាមេរិកម្តងហើយម្តងទៀត ចំពោះការធ្វើឱ្យយោធាអ៊ីរ៉ង់ចុះខ្សោយ រួមទាំងមីស៊ីលផ្លោង និងសមត្ថភាពនុយក្លេអ៊ែរផងដែរ»។

លោកបន្តថា៖ « អ្វីដែលសហរដ្ឋអាមេរិកកំពុងធ្វើនៅពេលនេះ គឺធ្វើឱ្យសមត្ថភាពរបស់អ៊ីរ៉ង់ចុះខ្សោយ ហើយខ្ញុំគិតថាវាសំខាន់ណាស់។ នេះជារឿងសំខាន់សម្រាប់សន្តិសុខអឺរ៉ុប មជ្ឈិមបូព៌ា និងសម្រាប់អ៊ីស្រាអែលផងដែរ»៕

ប្រែសម្រួល៖ ណឺ មិនា