ព័ត៌មានអន្ដរជាតិ

អ៊ីស្រាអែល ព្រមានថា ទីក្រុងបីនៅអឺរ៉ុបអាចរងគ្រាប់មីស៊ីលពីអ៊ីរ៉ង់

បានផុស

១ ខែ មុន

នៅ

ថ្ងៃអាទិត្យ ២២ មីនា ២០២៦

ដោយ

អ៊ីស្រាអែល បានព្រមានថា ទីក្រុងធំៗនៅប៉ែកអឺរ៉ុប រួមមានទីក្រុងឡុងដ៍ ប៉ារីស និងប៊ែរឡាំង អាចរងការគំរាមកំហែងមីស៊ីលបាលីស្ទិករយៈចម្ងាយឆ្ងាយរបស់អ៊ីរ៉ង់ បន្ទាប់ពីរបបគ្រប់គ្រង់អ៊ីរ៉ង់បានវាយប្រហារមូលដ្ឋានយោធារបស់អង់គ្លេសនៅកោះ Chagos។

យោងតាមការចុះផ្សាយរបស់សារព័ត៌មានអង់គ្លេស Daily Mail នៅថ្ងៃទី២១ខែមីនា ឆ្នាំ២០២៦ មីស៊ីលផ្លោងពីរគ្រាប់បានបាញ់ឆ្ពោះទៅកាន់មូលដ្ឋានយោធា Diego Garcia ដែលជារបស់អាមេរិកជាមួយចក្រភពអង់គ្លេសនៅមហាសមុទ្រឥណ្ឌាកាលពីយប់ថ្ងៃសុក្រ។

ប្រភពបានផ្តល់ព័ត៌មានឱ្យដឹងថា មីស៊ីលមួយគ្រាប់បរាជ័យពេលហោះចេញទៅ ខណៈមួយទៀតត្រូវបានស្ទាក់ចាប់ដោយនាវាចម្បាំងអាមេរិក វាជាការវាយប្រហារលើកដំបូងលើមូលដ្ឋានយោធានេះទីឆ្ងាយ។

ទោះបីយ៉ាងណា ពេលវេលាពិតប្រាកដនៃឧប្បត្តិហេតុនេះមិនទាន់ដឹងនៅឡើយទេ ទោះបីជារដ្ឋាភិបាលបញ្ជាក់កាលពីថ្ងៃសៅរ៍ថា ហេតុការណ៍បានកើតឡើង មុនពេលនាយករដ្ឋមន្ត្រីអង់គ្លេស លោក Keir Starmer អនុញ្ញាតឱ្យ លោក ដូណាល់ ត្រាំ ប្រើប្រាស់មូលដ្ឋាននៅចក្រភពអង់គ្លេសសម្រាប់យន្តហោះទម្លាក់គ្រាប់បែកគំរាមកំហែងដល់ច្រកសមុទ្រ Hormuz ក៏ដោយ។

ចំណែកមេដឹកនាំគណបក្សអភិរក្សនិយមរបស់អង់គ្លេស លោកស្រី Kemi Badenoch ចោទប្រកាន់នាយករដ្ឋមន្ត្រីអង់គ្លេសថា បានបិទបាំងព័ត៌មានលម្អិត និងសួរលោក Starmer ហេតុអ្វីមិនជូនដំណឹងឱ្យសាធារណជនដឹងមុន?។

កងកម្លាំងការពារជាតិអ៊ីស្រាអែល (IDF) បញ្ជាក់ថាការវាយប្រហារលើមូលដ្ឋាន Diego Garcia ជាលើកដំបូងដែលអ៊ីរ៉ង់បាញ់មីស៊ីលរយៈចម្ងាយឆ្ងាយ មានរយៈចម្ងាយជាង ៤ ០០០គីឡូម៉ែត្រ ចាប់តាំងពីការចាប់ផ្តើមនៃសង្គ្រាម។

អ៊ីស្រាអែលបន្ថែមថា៖ « របបភេរវកម្មអ៊ីរ៉ង់កំពុងបង្កការគំរាមកំហែងជាសកល។ ពេលនេះ គ្រាប់មីស៊ីលអាចនឹងហោះទៅដល់ទីក្រុងឡុងដ៍ ប៉ារីស ឬប៊ែរឡាំង»។

ប៉ុន្មានម៉ោងបន្ទាប់ពីការវាយប្រហារលើមូលដ្ឋានអង់គ្លេស អ៊ីរ៉ង់ប្រកាសថា ប្រទេសនេះមានមីស៊ីលដែលមានសមត្ថភាពយ៉ាងលេចធ្លោ […] ហោះលើផ្ទៃមេឃនៃដែនដីដែលខ្លួនកាន់កាប់ ព្រមទាំងព្រមានថា៖ « យុទ្ធសាស្ត្រ និងប្រព័ន្ធបាញ់បង្ហោះថ្មីរបស់ប្រទេសនេះនឹងធ្វើឱ្យសហរដ្ឋអាមេរិក និងអ៊ីស្រាអែលភ្ញាក់ផ្អើល»។

ប្រែសម្រួល៖ ណឺ មិនា