ព័ត៌មានអន្ដរជាតិ

អ្នកកាទូតសហភាពអឺរ៉ុប៖ អាមេរិកនិងអឺរ៉ុបអាចបែកបាក់គ្នាដោយសារសង្រ្គាមអ៊ីរ៉ង់

បានផុស

១ ខែ មុន

នៅ

ថ្ងៃអង្គារ ២៤ មីនា ២០២៦

ដោយ

ការភ័យខ្លាចដ៏ធំបំផុតរបស់មេដឹកនាំអឺរ៉ុបគឺពេលប្រធានាធិបតីសហរដ្ឋអាមេរិក លោក ដូណាល់ ត្រាំ ផ្តោតតែលើសង្រ្គាមនៅអ៊ីរ៉ង់ ដែលអាចនាំឱ្យអាមេរិកបោះបង់អ៊ុយក្រែនចោល។

យោងតាម POLITICO ផ្សាយថ្ងៃទី២៣ ខែមីនា មេដឹកនាំអឺរ៉ុបកំពុងព្រួយបារម្ភថា លោក ត្រាំ អាចសងសឹកប្រឆាំងនឹងសម្ព័ន្ធមិត្តអឺរ៉ុបដែលបដិសេធចំពោះការអំពាវនាវរបស់លោកសម្រាប់ជំនួយនៅមជ្ឈិមបូព៌ា។ វាជាបញ្ហាចម្បងមួយដែលអាមេរិកអាចកាត់ផ្តាច់ជំនួយដែលនៅសល់ ដល់ទីក្រុងកៀវ។ នេះបើយោងតាមអ្នកការទូតសហភាពអឺរ៉ុបចំនួន ៤រូប។

ខណៈមេដឹកនាំអឺរ៉ុបតែងតែខិតខំជៀសវាង ការបែកបាក់គ្នាជាអចិន្ត្រៃយ៍ក្នុងទំនាក់ទំនងឆ្លងមហាសមុទ្រអាត្លង់ទិក។

យ៉ាងណាមេដឹកនាំទាំងអស់នោះសង្ឃឹមថា ការផ្តល់ការគាំទ្រមួយចំនួនសម្រាប់សកម្មភាពរបស់ លោក ត្រាំ ប្រឆាំងនឹងទីក្រុងតេហេរ៉ង់គឺគ្រប់គ្រាន់ ដើម្បីបញ្ចុះបញ្ចូលលោកឱ្យបន្តជំនួយក្នុងជម្លោះរុស្ស៊ីលើអ៊ុយក្រែន។

ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បានលើកឡើងក្នុងកិច្ចប្រជុំកំពូលសហភាពអឺរ៉ុបកាលពីសប្តាហ៍មុននៅទីក្រុងព្រុចសែលថា៖ « សង្គ្រាមនៅអ៊ីរ៉ង់មិនត្រូវបង្វែរការយកចិត្តទុកដាក់របស់យើងពីការគាំទ្រដល់អ៊ុយក្រែននោះទេ»។ នេះជាហេតុផលមួយចំនួនដែលអាចមើលឃើញថាហេតុអ្វីបានជាមេដឹកនាំសហភាពអឺរ៉ុបព្រួយបារម្ភខ្លាំង។

ជាក់ស្តែងក្នុងរយៈពេលប៉ុន្មានថ្ងៃថ្មីៗនេះ លោក ត្រាំ រិះគន់ចំពោះសម្ព័ន្ធមិត្តអឺរ៉ុបមិនជួយបើកច្រក Hormuz ឡើងវិញ។ លោក ត្រាំ បានរិះគន់សមាជិកណាតូ នៅក្នុងបណ្តាញសង្គម Truth Social Post កាលពីចុងសប្តាហ៍ថា៖ « អង្គការណាតូ គឺជាខ្លាក្រដាស!។ ពួកគេត្អូញត្អែរពីតម្លៃប្រេងឡើងខ្ពស់ ប៉ុន្តែមិនចង់ជួយបើកច្រកសមុទ្រ Hormuz ទេ […] មនុស្សកំសាក! យើងនឹងចងចាំទុក»។

បើតាមព័ត៌មានស៊ើបអង្កេតមួយរបស់ POLITICO កាលពីថ្ងៃសុក្រ ទីក្រុងមូស្គូកំពុងផ្តល់ឱ្យទីក្រុងវ៉ាស៊ីនតោននូវកិច្ចព្រមព្រៀងមួយ ដែលវិមានក្រឹមឡាំងនឹងឈប់ចែករំលែកព័ត៌មានស៊ើបការណ៍សម្ងាត់ពីអ៊ីរ៉ង់ ប្រសិនបើទីក្រុងវ៉ាស៊ីនតោនឈប់ផ្គល់ព័ត៌មានស៊ើបការណ៍សម្ងាត់ដល់អ៊ុយក្រែនពីរុស្ស៊ី។

ចំណេកប្រធានាធិបតីហ្វាំងឡង់ លោក Alexander Stubb ហាក់សម្តែងអារម្មណ៍សោកស្តាយ និងលើកឡើងក្នុងបទសម្ភាសន៍ជាមួយសារព័ត៌មាន Daily Telegraph ថា៖ « ឥឡូវនេះមានស្នាមប្រេះមួយកំពុងលេចចេញរវាងអឺរ៉ុប និងសហរដ្ឋអាមេរិកជាថ្មីម្តងទៀត ក្នុងនាមជាអ្នកគាំទ្រអាមេរិក និងអ្នកឆ្លងមហាសមុទ្រអាត្លង់ទិក ខ្ញុំសោកស្តាយ។ ប៉ុន្តែជាការពិតដែលខ្ញុំត្រូវតែប្រឈមមុខជាមួយរឿងនេះ។ ខ្ញុំច្បាស់ជាព្យាយាមជួយសង្គ្រោះតាមអ្វីដែលខ្ញុំអាចធ្វើបាន»៕

ប្រែសម្រួល៖ ណឺ មិនា