ព័ត៌មានអន្ដរជាតិ

ឧស្សាហកម្មនេសាទថៃអាចនឹងជាប់គាំង ដោយសារតែប្រេងឡើងថ្លៃជុំវិញជម្លោះមជ្ឈិមបូព៌ា

បានផុស

៤ សប្តាហ៍ មុន

នៅ

ថ្ងៃសុក្រ ២៧ មីនា ២០២៦

ដោយ

ការហក់ឡើងនៃតម្លៃប្រេងម៉ាស៊ូតដោយសារតែសង្គ្រាមរវាងសហរដ្ឋអាមេរិក និងអ៊ីស្រាអែលលើប្រទេសអ៊ីរ៉ង់ កំពុងរុញច្រានឧស្សាហកម្មនេសាទពាន់លានដុល្លាររបស់ប្រទេសថៃឱ្យឆ្ពោះទៅរកភាពជាប់គាំង ដោយអ្នកនេសាទថៃបានព្រមានថា ពួកគេអាចនឹងឈប់ចេញទូកក្នុងរយៈពេលប៉ុន្មានថ្ងៃទៀត លុះត្រាតែរដ្ឋាភិបាលចាត់វិធានការអន្តរាគមន៍។

លោក Jumpol Kanawaree ប្រធានសមាគមអ្នកលក់ត្រីខេត្ត សាមុតសាកន (Samut Sakhon) បានប្រាប់ទីភ្នាក់ងារសារព័ត៌មានរ៉យទ័រថា ទូកនេសាទជាងពាក់កណ្ដាល នៅកំពង់ផែនេសាទដ៏ធំជាងគេរបស់ថៃក្នុងខេត្ត សាមុតសាកន បានចូលផែវិញរួចទៅហើយ ហើយទូកផ្សេងៗទៀតដែលបន្តនេសាទ អាចនឹងឈប់ដំណើរការក្នុងរយៈពេលប៉ុន្មានថ្ងៃមុខ។

លោកបន្តថា៖ «ចាប់ពីថ្ងៃទី ១ ខែមេសាទៅ អ្នកអាចនឹងមិនឃើញគេលក់ត្រី ព្រោះទូកនេសាទលែងអាចទ្រាំទ្រនឹងការចំណាយរបស់កម្មករនេសាទ និងក្រុមគ្រួសាររបស់ពួកគេបានទៀតហើយ។ ពួកគេនឹងមិនអាចរកប្រាក់ចិញ្ចឹមជីវិតបានឡើយ»។

ទិន្នន័យរបស់រដ្ឋាភិបាលថៃបានបង្ហាញថា នៅឆ្នាំ ២០២៤ ថៃបាននាំចេញផលិតផលនេសាទក្នុងតម្លៃ ៧ ប៊ីលានដុល្លារទៅកាន់គោលដៅនានា រួមមានសហរដ្ឋអាមេរិក ជប៉ុន និងចិន។

ក្រសួងនេសាទថៃមិនបានប្រតិកម្មយ៉ាងណាទេជុំវិញបញ្ហានេះ ខណៈរដ្ឋមន្ត្រីក្រសួងហិរញ្ញវត្ថុថៃ លោក Ekniti Nitithanprapas ឯណោះវិញ បាននិយាយកាលពីពុធថា រដ្ឋាភិបាលកំពុងរៀបចំកញ្ចប់មួយដើម្បីគាំទ្រដល់អ្នកនេសាទ រួមទាំងការផ្គត់ផ្គង់ប្រេងម៉ាស៊ូតជីវ B20 និងប្រេងដូង ដើម្បីទប់ស្កាត់កំណើនតម្លៃប្រេងបន្ថែមទៀត។

យោងតាមមន្ត្រីថៃ ប្រទេសនេះមានប្រេងបម្រុងប្រហែល ១០០ ថ្ងៃប៉ុណ្ណោះ។

គេមើលឃើញថា តម្លៃប្រេងម៉ាស៊ូតថៃបានឡើងដល់ ៣៨,៩៤ បាត (១,១៩ ដុល្លារ)/លីត្រ កាលពីថ្ងៃព្រហស្បតិ៍ បន្ទាប់ពីប្រាក់ឧបត្ថម្ភរបស់រដ្ឋាភិបាលបានបញ្ចប់ ដោយកើនឡើងពី ២៩,៩៤ បាត/លីត្រ ក្នុងខែកុម្ភៈ មុនពេលជម្លោះផ្ទុះឡើង។

ប្រសិនបើតម្លៃប្រេងម៉ាស៊ូតឡើងដល់ ៤០ បាត/លីត្រ អ្នកនេសាទនឹងពិបាក ដែលធ្វើឱ្យពួកគេសន្សំសំចៃប្រេងឥន្ធនៈ។ អ្នកនេសាទម្នាក់ឈ្មោះ Boonchoo Lonluy បាននិយាយថា៖ «ឥឡូវនេះតម្លៃបានកើនឡើង យើងបានព្យាយាមបើកទូកយឺតជាងមុន ដែលបណ្តាលឱ្យចាប់ត្រីតិចជាងមុន»។

បើតាមលោក Jumpol ត្រីប្រហែល ៨០០ តោនមកពីតំបន់ឆ្នេរសមុទ្រចំនួន ២២ ត្រូវបានលក់នៅផ្សារត្រីសាមុតសាកន ជារៀងរាល់ថ្ងៃ ដោយបន្ថែមថា វិបត្តិប្រេងឥន្ធនៈបច្ចុប្បន្នគឺជាវិបត្តិដ៏អាក្រក់បំផុតក្នុងរយៈពេលជាច្រើនទសវត្សរ៍ ដោយធ្ងន់ធ្ងរជាងជំងឺរាតត្បាតកូវីដ១៩ ទៅទៀត៕