ព័ត៌មានអន្ដរជាតិ

លោកត្រាំ រំពឹងមានកិច្ចព្រមព្រៀងជាមួយអ៊ីរ៉ង់នៅថ្ងៃទី៦មេសា ទោះច្រកហ័រមូសនៅបន្តបិទ

បានផុស

១ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

Chheang

លោកប្រធានាធិបតី ដូណាល់ ត្រាំ បានបង្ហាញឆន្ទៈក្នុងការបញ្ចប់សង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់ ឲ្យបានត្រឹមថ្ងៃទី៦ខែមេសាខាងមុខនេះ។ នេះបើយោងតាមរបាយការណ៍ចេញផ្សាយកាលពីយប់ថ្ងៃចន្ទទី៣០ខែមីនារបស់ The Wall Street Journal។

លោកត្រាំ ចង់ឲ្យជម្លោះនេះបញ្ចប់ទៅតាមកាលកំណត់៦សប្តាហ៍ដែលលោកបានដាក់ចេញឱសានវាទ ទោះបីជាច្រកសមុទ្រហ័រមូស (Hormuz) ដែលជាផ្លូវសេដ្ឋកិច្ចដ៏សំខាន់នៅតែបន្តបិទក៏ដោយ។ លោកបានបង្ហើបប្រាប់សារព័ត៌មានថា លោកកំពុងចរចាជាមួយក្រុមថ្នាក់ដឹកនាំថ្មីរបស់អ៊ីរ៉ង់ ដែលលោកយល់ថា «មានហេតុផលជាងមុន» និងងាយស្រួលធ្វើការជាមួយជាងក្រុមមុនៗ។

មូលហេតុចម្បងមួយដែលធ្វើឲ្យលោកត្រាំ ចង់ពន្លត់ភ្លើងសង្គ្រាមនេះឲ្យបានឆាប់ គឺដោយសារតែការចំណាយមានទំហំធំធេងហួសប្រមាណ។ ត្រឹមតែរយៈពេល៦ថ្ងៃដំបូងនៃសង្គ្រាម សហរដ្ឋអាមេរិកបានចំណាយប្រាក់អស់រហូតដល់ទៅ១១,៣ពាន់លានដុល្លារបាត់ទៅហើយ។ តាមរយៈអ្នកនាំពាក្យសេតវិមាន លោកត្រាំ ក៏មានបំណងចង់ឲ្យបណ្តាប្រទេសអារ៉ាប់ចូលរួមចំណែកជួយចេញថ្លៃចំណាយដ៏មហាសាលនៃសង្គ្រាមនេះផងដែរ ដើម្បីកាត់បន្ថយបន្ទុករបស់អាមេរិក។

ងាកមកមើលខាងភាគីអ៊ីរ៉ង់វិញ លោកប្រធានាធិបតី Masoud Pezeshkian បានអះអាងថា រាល់កិច្ចព្រមព្រៀងសន្តិភាពណាមួយ ត្រូវតែធានាឲ្យបាននូវកិត្តិយស និងសន្តិសុខជាតិរបស់អ៊ីរ៉ង់ជាចម្បង។ ស្របពេលជាមួយគ្នានេះ រដ្ឋមន្ត្រីការបរទេសអ៊ីរ៉ង់ក៏បានរិះគន់ប្រទេសនៅអឺរ៉ុបថា គិតតែពីផលប៉ះពាល់សេដ្ឋកិច្ចរបស់ខ្លួន ជាជាងខ្វល់ខ្វាយពីការវាយប្រហារដ៏សាហាវឃោរឃៅមកលើប្រជាជនអ៊ីរ៉ង់៕

ប្រែសម្រួល៖ ឈាង