ព័ត៌មានអន្ដរជាតិ

ចិន បរិហារ អាមេរិកនិងអ៊ីស្រាអែលវាយអ៊ីរ៉ង់ខុសច្បាប់ ជាដើមចមនៃការបិទច្រក Hormuz

បានផុស

៤ សប្តាហ៍ មុន

នៅ

ថ្ងៃសុក្រ ៣ មេសា ២០២៦

ដោយ

អ្នកនាំពាក្យក្រសួងការបរទេសចិន បានលើកឡើងនៅថ្ងៃព្រហស្បតិ៍ថា មូលហេតុចម្បងនៃការរំខាននៅច្រកសមុទ្រ Hormuz គឺដោយសារតែការវាយលុករួមគ្នាខុសច្បាប់របស់យោធាសហរដ្ឋអាមេរិក-អ៊ីស្រាអែលលើអ៊ីរ៉ង់។ ការណ៍នេះទីក្រុងប៉េកាំងជំរុញឱ្យភាគីទាំងបីបន្ធូរបន្ថយភាពតានតឹង ដើម្បីការពារការដឹកជញ្ជូនទូទាំងពិភពលោកឡើងវិញ។

យោងតាមគេហទំព័រក្រសួងការបរទេសចិននិងសារព័ត៌មាន TRT World ផ្សាយថ្ងៃទី០២ ខែមេសា អ្នកនាំពាក្យក្រសួងការបរទេសចិន លោកស្រី Mao Ning បានប្រាប់អ្នកយកព័ត៌មាននៅទីក្រុងប៉េកាំងថា៖ « មូលហេតុចម្បងនៃការរំខាននៅច្រកសមុទ្រ Hormuz គឺដោយសារការប្រតិបត្តិការយោធាខុសច្បាប់របស់សហរដ្ឋអាមេរិក-អ៊ីស្រាអែលប្រឆាំងនឹងអ៊ីរ៉ង់»។

លោកស្រី បន្តថា៖ « ប្រទេសចិនប្រឆាំងនឹងការវាយប្រហារលើជនស៊ីវិល និងកន្លែងស្នាក់នៅរបស់ពួកគេ។ ការវាយប្រហារលើសាលារៀនជាពិសេសគឺជាការរំលោភយ៉ាងធ្ងន់ធ្ងរលើច្បាប់មនុស្សធម៌អន្តរជាតិ។ យើងសូមអំពាវនាវម្តងទៀតឱ្យបញ្ចប់ប្រតិបត្តិការយោធាជាបន្ទាន់ ហើយវិលត្រឡប់ទៅរកការសន្ទនា និងចរចាឱ្យបានឆាប់តាមដែលអាចធ្វើទៅបាន ដើម្បីការពារគ្រោះមហន្តរាយមនុស្សធម៌កាន់តែអាក្រក់»។

អ្នកនាំពាក្យក្រសួងការបរទេសចិន លោកស្រី Mao Ning ។ រូបភាព៖ Reuters

ការថ្លែងរបស់ប្រទេសចិនកើតឡើងជាការឆ្លើយតបទៅនឹងការអត្ថាធិប្បាយរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ មួយថ្ងៃមុនថា៖ « សហរដ្ឋអាមេរិកស្ទើរតែគ្មានការនាំចូលប្រេងតាមរយៈផ្លូវទឹកនេះ( Hormuz)។

លោក ត្រាំ បន្តថា៖ « ហើយប្រទេសនានាក្នុងពិភពលោកដែលទទួលបានប្រេងតាមរយៈច្រកសមុទ្រ Hormuz ត្រូវតែថែរក្សាផ្លូវនេះ។ ពួកគេត្រូវតែថែរក្សាវា។ យើងក៏ណែនាំប្រទេសដែលមិនអាចទទួលប្រេងឥន្ធនៈពីច្រកនេះ គួរតែទិញប្រេងពីសហរដ្ឋអាមេរិក ឬបង្កើតភាពក្លាហានចាំទាល់តែច្រកនេះបើកឡើងវិញ ហើយទៅយកប្រេងខ្លួនឯងទៅ»។

គួរបញ្ជាក់ថាប្រទេសចិននាំចូលថាមពលភាគច្រើនមកពីមជ្ឈិមបូព៌ា បន្ទាប់ពីមានជម្លោះនេះ នាវាចំនួនបីគ្រឿងរបស់ទីក្រុងប៉េកាំងទើបតែបានឆ្លងកាត់ច្រកសមុទ្រ Hormuz ដែលស្ថិតនៅក្រោមការគ្រប់គ្រងរបស់អ៊ីរ៉ង់ ចាប់តាំងពីសហរដ្ឋអាមេរិកនិងអ៊ីស្រាអែលបើកការវាយលុករួមគ្នាលើអ៊ីរ៉ង់នៅថ្ងៃទី២៨ ខែកុម្ភៈ ដោយបានសម្លាប់មនុស្សជាង ១ ៣៤០នាក់ រួមទាំងមេដឹកនាំកំពូល លោក Ali Khamenei ផងដែរ៕

ប្រែសម្រួល៖ ណឺ មិនា