មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger

គ្រូបង្វឹករបស់ ព្រះខ័នរាជស្វាយរៀង លោក Matthew McConkey និងខ្សែបម្រើប្រយុទ្ធ Cristiano Roque បានមើលឃើញដូច​គ្នា​ពី​ចំណុចពិសេសមួយ​របស់ក្រុម Manila Digger ដែលគួរឱ្យព្រួយបារម្ភ គឺ «ការលេងវាយបកលឿន»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង និង Manila Digger ធ្លាប់បានជួបគ្នារួចម្តងហើយ កាលពីវគ្គចែកពូលនៃពូល D ក្នុងពាន AFC Challenge League នេះ កាលពីថ្ងៃទី ១ ខែ វិច្ឆិកា ឆ្នាំ ២០២៥ ដោយលទ្ធផលពេលនោះស្មើគ្នា ២-២។ តាមរយៈបទពិសោធនេះ បានធ្វើឱ្យលោក McConkey និងកីឡាករក្រុមរហស្សនាមព្រះខ័នខៀវ ទាំងមូលបានដឹងច្រើនអំពីរបៀបលេងរបស់ Manila Digger។

មុនជួបគ្នាក្នុងជើងទី ១ វគ្គពាក់កណ្តាលផ្តាច់ព្រ័ត្រពាន ACGL នៅល្ងាចថ្ងៃ ព្រហស្បតិ៍ ទី ៩ ខែ មេសា ស្អែក ទាំងលោក McConkey និង Cristian បានបង្ហាញការយល់ឃើញអំពីចំណុកពិសេសច្រើនរបស់ក្រុម Manila Digger ប៉ុន្តែចំណុចមួយ ដែលអ្នកទាំង ២ មើលឃើញដូចគ្នា គឺក្រុម Manila Digger លេងលឿនជាមួយការការពារវាយបក។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ ពុធ ទី ៨ ខែ មេសា នេះ លោក McConkey បានមានប្រសាសន៍ ថា៖ «យើងបានធ្វើអ្វីៗគ្រប់យ៉ាង តាមរយៈការវិភាគ ហើយយើងបានពិនិត្យមើលការប្រកួតមុនៗទាំងអស់រួចហើយ។ ថ្ងៃស្អែក យើងនឹងត្រូវប្រកួតជាមួយក្រុមមួយដែលខ្លាំងណាស់ មានសមត្ថភាពផ្នែកកាយសម្បទាល្អ មានល្បឿនលឿន ហើយអាចក្លាយជាគ្រោះថ្នាក់ខ្លាំងនៅក្នុងពេលខ្លះៗ»។

គ្រូបង្វឹកសញ្ជាតិ អៀឡង់ បានបន្ថែម ថា៖ «ខ្ញុំគិតថា ចំណុចសំខាន់បំផុតរបស់ពួកគេគឺ ពួកគេគ្រោះថ្នាក់ខ្លាំងនៅពេលប្ដូរពីការការពារទៅវាយប្រហារ។ ដូច្នេះ បើអ្នកបាត់បង់បាល់នៅតំបន់ដែលមិនគួរបាត់ ជាពិសេសនៅតំបន់កណ្ដាលទីលាន វាអាចបង្កបញ្ហាឲ្យយើងបាន។ ដូច្នេះយើងត្រូវគ្រប់គ្រងស្ថានភាពទាំងនោះឲ្យបានល្អ។ ពួកគេមានគុណភាពល្អក្នុងចំណុចជាច្រើន ដូចជា បាល់រៀបចំ ហើយពេលខ្លះក៏អាចរៀបចំការលេងពីក្រោមបានល្អផងដែរ។ ប៉ុន្តែ ចំណុចសំខាន់មួយដែលពួកគេល្អខ្លាំងបំផុត គឺការប្ដូរល្បឿនពីការការពារទៅវាយបក»។

ងាកមកកាន់ Cristian វិញ បានលើកឡើងនៅក្នុងសន្និសីទសារព័ត៌មាន ថា៖ «នេះជាការប្រកួតដ៏លំបាកមួយ ព្រោះពួកគេលេងខ្លាំង និងល្បឿនលឿន​យ៉ាងស្វាហាប់។ ប៉ុន្តែយើងត្រូវតែអនុវត្តតាមផែនការរបស់យើង។ ប្រសិនបើយើងអាចគ្រប់គ្រងការប្រកួត ចាត់ចែងការប្រកួតបានល្អ និងបង្កើតឱកាសបាន ខ្ញុំសង្ឃឹមថា យើងនឹងឈ្នះការប្រកួតនេះនៅថ្ងៃស្អែក»។

ទោះបីជាយ៉ាងណា លោក McConkey បានបញ្ជាក់រួចហើយ ថា ក្រុមព្រះខ័នរាជស្វាយរៀង បានត្រៀមរួចរាល់សម្រាប់ការប្រកួតទល់នឹងក្រុម Manila Digger ដើម្បីដណ្តើមជ័យជម្នះ មុនការប្រកួតជើងទី ២ ដែលនឹងត្រូវប្តូរទឹកដីទៅប្រទេស ហ្វីលីពីន នៅថ្ងៃទី ១៦ ខែ មេសា ឆ្នាំ ២០២៦៕

អត្ថបទ៖ សេម កុសល